ອັດຕະປື ເປີດຂະບວນປູກຕົ້ນໄມ້ແຫ່ງຊາດ ແລະ ສະເຫຼີມສະຫຼອງວັນເດັກນ້ອຍສາກົນ

ແຂວງອັດຕະປື ຂະບວນສະເຫລີມສະຫລອງວັນເດັກສາກົນ ຕິດພັນກັບວັນປູກຕົ້ນໄມ້ແຫ່ງຊາດໃນທົ່ວແຂວງ ໃນວັນທີ 31 ພຶດສະພາ ໂດຍໃຫ້ກຽດເຂົ້າຮ່ວມຢູ່ເມືອງ ສະໜາມໄຊ ຄື ຈຸດປູກເຂດແຫຼ່ງທ່ອງທ່ຽວຕາດແຊພະແຊປ້ອງໄລ ມີທ່ານ ພົນໂທ ວັນທອງ ກອງມະນີເຈົ້າແຂວງ, ຈຸດແຫຼ່ງທ່ອງທຽວຖານທີ່ໝັ້ນຂອງການປະ ຕິວັດເຂດໃຕ້ ມີ ທ່ານ ທະນູໄຊ ບັນຊາລິດ ຄະນະປະຈຳພັກແຂວງຮອງເຈົ້າແຂວງ ແລະ ຈຸດເທດສະບານເມືອງສາມັກຄີໄຊ ມີ ທ່ານ ບຸນເສີດ ເສດທິລາດ ຄະນະປະຈຳພັກແຂວງຮອງເຈົ້າແຂວງ.

ໃນແຕ່ລະຈຸດປູກຄະນະຮັບຜິດຊອບຂັ້ນເມືອງ ໄດ້ກ່າວເຖິງຄວາມເປັນມາວັນປູກຕົ້ນໄມ້ແຫ່ງຊາດ ແລະ ສະເຫຼີມສະຫຼອງວັນເດັກນ້ອຍສາກົນວັນທີ 01 ມິຖຸນາ ເພື່ອໃຫ້ມວນຊົນຮັບຮູ້ເຂົ້າໃຈ ແລະ ພ້ອມກັນປູກ ແລະ ປົກປັກຮັກສາສິ່ງແວດລ້ອມ ແລະ ປ່າໄມ້ ເຫັນໄດ້ຄວາມໝາຍຄວາມສໍາຄັນ, ຄຸນປະໂຫຍດຂອງປ່າ ເພື່ອເຮັດປວງຊົນທຸກຊັ້ນຄົນຮັບຮູ້ ເຂົ້າໃຈ ກ່ຽວກັບຄວາມໝາຍ ຄວາມສຳຄັນຂອງການປູກໄມ້ ພ້ອມທັງໄດ້ຮຽກຮ້ອງມາທົ່ວສັງຄົມ ໃຫ້ມີນ້ຳໃຈປົກປັກຮັກສາປ່າໄມ້, ສ້າງຂະບວນ ການໃນການຄຸ້ມຄອງ ປັກປັກຮັກສາຊັບພະຍາກອນອັນເປັນມໍລະດົກຂອງຊາດໄດຮັບການປົກປັກຮັກສາດ້ານສິ່ງແວດລ້ອມ ແລະ ຄືນຄວາມອຸດົມສົມບູນທີ່ດີກວ່າໃນອານາຄົດ.

ໃນໂອກາດດຽວກັນຍັງໄດ້ກ່າວເຖິງວັນເດັກນ້ອຍສາກົນ ຈົ່ງໄດ້ເອົາໃຈໃສ່ລ້ຽງດູເບິ່ງແຍງໃຫ້ເດັກເຕີບໂຕ ແລະ ເຕີບໃຫຍ່ຕາມໄວຈະເລີນພັນ, ມີໂອກາດໄດ້ເຂົ້າເຖິງລະບົບຮັກສາສຸຂະພາບ ແລະ ລະບົບການສຶກສາຢ່າງທົ່ວເຖິງ, ທັງເປັນການປູກຈິດສຳນຶກໃຫ້ເດັກນ້ອຍ ມີສ່ວນຮ່ວມແຕ່ເຍົາໄວ ມີການການປົກປັກຮັກສາ ແລະ ສ້າງ ສາພັດທະນາປະເທດຊາດ ກໍຄືເຂດບ້ານເມືອງຂອງຕົນ ແລະ ອື່ນໆ.

ຂ່າວ: ວັດທະນາ