ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 1 ກຸມພາ 2024 ທີ່ສວນສາທາລະນະແຂວງ ອັດຕະປື ໄດ້ຈັດພິທີໂຮມຊຸມນຸມ ເພື່ອສະເຫຼີມສະຫຼອງວັນສ້າງຕັ້ງສະຫະພັນກໍາມະບານລາວ ຄົບຮອບ 68 ປີ ຄື: ວັນທີ 1 ກຸມພາ 1956 ຫາ 1 ກຸມພາ 2024, ໂດຍມີຄະນະນໍາຂອງແຂວງ, ພະນັກງານ-ລັດຖະກອນ ແລະສະມາຊິກກໍາມະບານເຂົ້າຮ່ວມ.
ທ່ານ ນາງ ບັນທະໄລ ແກ້ວມະນີວົງ ປະທານສະຫະພັນກໍາມະບານແຂວງ ອັດຕະປື ກ່າວຕໍ່ພິທີວ່າ: ຕະຫຼອດໄລຍະ 68 ປີ ຜ່ານມາ, ສູນກາງພັກໄດ້ມີມະຕິຕົກລົງສ້າງຕັ້ງຫ້ອງການກໍາມະບານລາວຂຶ້ນໃນວັນທີ 1 ກຸມພາ 1956 ຢູ່ເຂດທີ່ໝັ້ນແຂວງຫົວພັນ ເພື່ອສືບຕໍ່ໂຄສະນາຂົນຂວາຍ, ເຕົ້າໂຮມກໍາມະກອນ, ຊາວຜູ້ອອກແຮງງານລາວບັນດາເຜົ່າ ໃຫ້ມີຄວາມຕື່ນຕົວປະຕິວັດ, ມີນໍ້າໃຈຮັກຊາດ, ມີທັດສະນະຊົນຊັ້ນກໍາມະກອນ, ຄວາມຕື່ນຕົວທາງດ້ານຊົນຊັ້ນຢ່າງຈະແຈ້ງ; ເປັນຕົວແທນໃຫ້ແກ່ການປົກປ້ອງສິດຜົນປະໂຫຍດອັນຊອບທໍາຂອງກໍາມະກອນ ແລະ ຊາວຜູ້ອອກແຮງງານລາວບັນດາເຜົ່າ,ເປັນເຈົ້າການໃນການຕໍ່ສູ້ກູ້ຊາດ, ປົກປັກຮັກສາ ແລະ ພັດທະນາປະເທດຊາດ.
ຕະຫຼອດໄລຍະຜ່ານມາສູນກາງພັກ ໄດ້ເອົາໃຈໃສ່ປັບປຸງການຈັດຕັ້ງກໍາມະບານລາວໃຫ້ມີຄວາມໜັກແໜ້ນ ແລະ ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ, ຊຶ່ງໜ້າທີ່ຕົ້ນຕໍຂອງກໍາມະບານ ແມ່ນໄດ້ຖືເອົາວຽກງານໂຄສະນາການປະຕິບັດແນວທາງນະໂຍບາຍຂອງພັກແຕ່ລະໄລຍະ ເປັນເນື້ອໃນໃຈກາງຂອງການເຄື່ອນໄຫວສ້າງຂະບວນການຕ່າງໆ, ທຸກສິ່ງທຸກຢ່າງເພື່ອຮັບໃຊ້ແນວໜ້າ, ຕີເອົາຊະນະສັດຕູ ແລະ ປົກປັກຮັກສາເຂດປົດປ່ອຍໃຫ້ເຂັ້ມແຂງ, ປຸກລະດົມຊຸກຍູ້ຂະບວນການຕໍ່ສູ້ຂອງມະຫາຊົນໃຫ້ຟົດຟື້ນຢ່າງຕໍ່ເນື່ອງ ໂດຍຢຶດໝັ້ນແນວທາງນະໂຍບາຍຂອງພັກ “ສັນຕິພາບ ເອກະລາດ ປະຊາທິປະໄຕ ແລະ ເອກະພາບ”. ພາຍໃຕ້ການນໍາພາຂອງພັກ ອົງການຈັດຕັ້ງກໍາມະບານລາວ ໄດ້ເຕີບໃຫຍ່ຂະຫຍາຍຕົວທາງດ້ານຈໍານວນ ແລະ ຄຸນນະພາບ, ໄດ້ສືບຕໍ່ປັບປຸງພາລະບົດບາດ, ໜ້າທີ່ແບບແຜນວິທີເຮັດວຽກ, ໂຄງປະກອບບຸກຄະລາກອນ, ຂະຫຍາຍການຈັດຕັ້ງ ແລະ ສະມາຊິກກໍາມະບານໄປສູ່ຂົງເຂດຫົວໜ່ວຍທຸລະກິດເອກະຊົນ ແລະ ການລົງທຶນຂອງຕ່າງປະເທດ, ປະກອບສ່ວນເຂົ້າໃນການປຸກລະດົມ, ສຶກສາອົບຮົມຊົນຊັ້ນກໍາມະກອນ ແລະ ຊາວຜູ້ອອກແຮງງານລາວເປັນເຈົ້າການປົກປັກຮັກສາ ແລະ ພັດທະນາປະເທດຊາດ.
ໃນພິທີຍັງໄດ້ມອບໃບຍ້ອງຍໍໃຫ້ແກ່ສະຫະພັນກຳມະບານພະແນກການ ແລະ ກຳມະບານຮາກຖານອ້ອມຂ້າງແຂວງ ທີ່ມີຜົນງານດີເດັ່ນໃນການປະກອບສ່ວນວັດຖຸປັດໃຈ ອວຍພອນອ້າຍນ້ອງທະຫານຊາຍແດນ ແລະ ກອງບັນຊາການທະຫານແຂວງ ເນື່ອງໃນໂອກາດວັນສ້າງຕັ້ງກອງທັບປະຊາຊົນປະຕິວັດລາວຄົບຮອບ 75 ປີ, ພ້ອມນັ້ນຍັງມີກິດຈະກຳ ການເຕັ້ນເອໂຣບິກ ເພື່ອສຸຂະພາບ ເຊິ່ງມີການນຳພັກ-ລັດ ແລະ ສະມາຊິກກຳມະບານທັງໝົດເຂົ້າຮ່ວມຢ່າງເປັນຂະບວນການຟົດຟື້ນ.
ຂ່າວ: ວັດທະນາ ຂ.ອັດຕະປື