ໃນໂອກາດລາຍງານກ່ຽວກັບນະໂຍບາຍໃນການສ້າງໂຄງການຂົນສົ່ງແບບຍືນຍົງໃນຕົວເມືອງນະຄອນຫລວງວຽງຈັນ (ນວ) ກໍຄືແຜນການສະໜອງລົດເມດ່ວນ BRT ເມື່ອບໍ່ດົນມານີ້, ທ່ານ ນາງ ອຳໄພວັນ ແກ້ວປະດິດ ຮອງຫົວໜ້າກົມຂົນສົ່ງ ກະຊວງ ໂຍທາທິການ ແລະ ຂົນສົ່ງ (ຍທຂ) ໃຫ້ຮູ້ວ່າ: ປັດຈຸບັນ, ຕາມສະຖິຕິການຂຶ້ນທະບຽນຍານພາຫະນະທາງບົກທົ່ວປະເທດໃນປີ 2023 ມີຍານພາຫະນະຂຶ້ນທະບຽນທັງໝົດ 2.705.538 ຄັນ, 43% ແມ່ນຍານພາຫະນະຂຶ້ນທະບຽນໃນ ນວ. ໃນນີ້, ມີລົດຈັກສອງລໍ້ກວມເອົາ 67%, ລົດກະບະ 14%, ລົດເກັງ 6% ແລະ ອື່ນໆ 13%, ຖ້າທຽບໃສ່ອັດຕາການເຕີບໂຕຂອງປະຊາກອນເຫັນວ່າອັດຕາການຂຶ້ນທະບຽນຂອງຍານພາຫະນະໃນ ນວ ເກີນຈໍານວນປະຊາກອນ.
ສະນັ້ນ, ບັນຫາການນໍາໃຊ້ຍານພາຫະນະໃນຕົວເມືອງຈຳນວນ ຫຼາຍຈຶ່ງມີຜົນກະທົບອັນໃຫຍ່ຫຼວງຕໍ່ສັງຄົມເປັນຕົ້ນສະພາບ ການສັນຈອນແອອັດຕາມເສັ້ນທາງ 3 ແຍກ, 4 ແຍກໃນຕົວ ເມືອງ, ຕອນເຊົ້າ-ຕອນແລງ ໃນຊົ່ວໂມງເລັ່ງດ່ວນ, ສ້າງມົນລະພິດທາງອາກາດ ແລະ ທາງສຽງເພີ່ມຂຶ້ນເຮັດໃຫ້ຄົນເຈັບປວຍໄດ້ງ່າຍ. ນອກນັ້ນ, ອັດຕາການເກີດອຸບັດເຫດທາງຖະໜົນຍັງສູງ ເຫັນວ່າໃນປີ 2023 ທົ່ວປະເທດມີອຸບັດເຫດເກີດຂຶ້ນ 6.806 ກໍລະນີ ກວມເອົາ 17,4%.
ທ່ານ ນາງ ອຳໄພວັນ ແກ້ວປະດິດ ໃຫ້ຮູ້ຕື່ມວ່າ: ໃນໄລຍະຜ່ານມາ ໄດ້ມີນິຕິກຳ ແລະ ລະ ບຽບການຕ່າງໆ ເພື່ອຫຼຸດຜ່ອນບັນຫາແຕ່ຍັງບໍ່ສາມາດແກ້ໄດ້ໝົດເຊັ່ນ: ສ້າງຍຸດທະສາດຄວາມ ປອດໄພທາງຖະໜົນກຳນົດໃນປີ 2030 ໃຫ້ອັດຕາການເສຍຊີວິດຈາກອຸບັດເຫດຕາມຖະໜົນຫຼຸດລົງ 50% ເພື່ອຮັກສາຊີວິດ ແລະ ຊັບສິນຂອງປະຊາຊົນ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງສັງຄົມໃນການແກ້ໄຂບັນຫາລົດແອອັດໃນຕົວເມືອງ, ການຈອດລົດຊະຊາຍ ແລະ ການຫຼຸດຜ່ອນມົນລະ ພິດຈາກຍານພາຫະນະ, ໃນນັ້ນ ລັດຖະບານ ກໍຄືການນໍາກະຊວງ ຍທຂ ແລະ ການນໍາ ນວ ໄດ້ຂົນຂວາຍແຫຼ່ງທຶນຫຼາຍແຫຼ່ງມາຈັດຕັ້ງປະຕິບັດໂຄງການດັ່ງກ່າວເຊັ່ນ: ADB, EIB, OPEC ລວມທັງງົບປະມານຂອງລັດຖະບານ ແລະ ອື່ນໆ ລວມມູນຄ່າເບື້ອງຕົ້ນ 99 ລ້ານໂດລາ ເພື່ອປັບປຸງລະບົບການຂົນສົ່ງມວນ ຊົນໃນຕົວເມືອງວຽງຈັນໃຫ້ໄດ້ມາດຕະຖານສາກົນ ຊຶ່ງນໍາໃຊ້ລົດ ເມໄຟຟ້າໃຫ້ມີຄວາມສະດວກ, ສະບາຍ, ສະອາດ-ສວຍງາມ ແລະ ປອດໄພໃຫ້ປະຊາຊົນໄດ້ຊົມໃຊ້. ຄຽງຄູ່ກັນນັ້ນ, ໄດ້ປັບປຸງເສັ້ນ ທາງຊອຍເພື່ອອໍານວຍຄວາມສະດວກໃຫ້ກັບຜູ້ຄົນສາມາດຍ່າງ ໄປມາໄດ້ສະດວກ ແລະ ປອດໄພ, ປັບປຸງເສັ້ນທາງບາງເສັ້ນສໍາລັບລົດຖີບ ແລະ ປັບປຸງລະບົບການຈອດລົດແຄມທາງ ພ້ອມເຊື່ອ ໝັ້ນວ່າພາຍຫຼັງໂຄງການດັ່ງກ່າວສໍາເລັດ ນວ ຈະມີໃບໜ້າ ໃໝ່ກ່ຽວກັບການຈະລາຈອນທາງບົກດີຂຶ້ນ.
