ພິທີເປີດນໍາໃຊ້ອາຄານຕຶກນອນພິເສດໂຮງໝໍ ແມ່ ແລະ ເດັກເກີດໃໝ່ຢ່າງເປັນທາງການໄດ້ຈັດຂຶ້ນໃນວັນທີ 6 ກໍລະກົດ 2024 ນີ້ ທີ່ໂຮງໝໍ ແມ່ ແລະ ເດັກເກີດໃໝ່ ບ້ານໜອງພະຍາ ເມືອງໄຊທານີ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ດຣ ບຸນແຝງ ພູມມະໄລສິດ ລັດຖະມົນຕີກະ ຊວງສາທາລະນະສຸກ, ທ່ານ ນາງ ນາລີ ສີສຸລິດ ພັນລະຍາປະທານປະເທດ ແລະ ບັນດາພັນລະ ຍາການນໍາ, ມີ ດຣ ສີວັນໄຊ ຈັນທະວົງສັກ ຫົວໜ້າອໍານວຍການໂຮງໝໍແມ່ ແລະ ເດັກເກີດໃໝ່, ທ່ານ ນາງ ສຸນັດຕາ ລິດປັນ ຍາ ຫົວໜ້າບໍລິສັດ ລິດປັນຍາ ສໍາຫຼວດອອກແບບ-ກໍ່ສ້າງຈໍາກັດຜູ້ດຽວ ພ້ອມດ້ວຍບັນດາການນໍາພັກ-ລັດ ແລະ ແຂກຮັບເຊີນເຂົ້າຮ່ວມ.
ດຣ ສີວັນໄຊ ຈັນທະວົງສັກ ຫົວໜ້າອໍານວຍການໂຮງໝໍແມ່ ແລະ ເດັກເກີດໃໝ່ມີ ຄໍາເຫັນວ່າ: ໂຮງໝໍແມ່ ແລະ ເດັກເກີດໃໝ່ ສ້າງຕັ້ງຂຶ້ນໃນປີ 1994. ມາຮອດປັດຈຸບັນ ຍ້ອນມີປະຊາຊົນເຂົ້າ ມາໃຊ້ບໍລິການເປັນຈໍານວນຫລາຍ ເຮັດໃຫ້ສະຖານທີ່ບໍລິການຄົນ ເຈັບຂອງໂຮງໝໍຄັບແຄບ, ແອອັດ ເຮັດໃຫ້ການບໍລິການບໍ່ສະ ດວກ, ການຂະຫຍາຍຕຽງນອນມີຈໍາກັດ, ຍ້ອນເຫັນໄດ້ຄວາມສໍາຄັນວຽກງານແມ່ ແລະ ເດັກ, ພັກ ແລະ ລັດຖະບານ ກໍ່ຄື ກະຊວງ ສາທາລະນະສຸກ ຈິ່ງເຫັນດີອະນຸມັດໃຫ້ສ້າງໂຮງໝໍແມ່ ແລະ ເດັກຫຼັງໃໝ່ທີ່ບ້ານໜອງພະຍາ ເມືອງໄຊທານີ ນະຄອນຫຼວງວຽງຈັນ ປະກອບມີ 150 ຕຽງ ໂດຍເລີ່ມນໍາໃຊ້ແຕ່ເດືອນ ມິຖຸນາ ປີ 2015 ຈົນເຖິງປັດຈຸບັນ.
ໃນໂອກາດນີ້ ທ່ານ ນາງ ສຸນັດຕາ ລິດປັນຍາ ຫົວໜ້າບໍລິ ສັດ ລິດປັນຍາ ສໍາຫຼວດອອກແບບ-ກໍ່ສ້າງຈໍາກັດຜູ້ດຽວລາຍ ງານໂດຍຫຍໍ້ກ່ຽວກັບໂຄງການກໍ່ສ້າງຕຶກນອນພິເສດໂຮງໝໍແມ່ ແລະ ເດັກຫລັງໃໝ່ນີ້ວ່າ: ໂຄງການກໍ່ສ້າງຕຶກນອນພິເສດນີ້ ເປັນ ການຜັນຂະຫຍາຍຕາມນະໂຍບາຍກໍຄືແຜນພັດທະນາວຽກງານສາທາລະນະສຸກ ທີ່ກະຊວງສາທາລະນະສຸກ ໄດ້ວາງອອກ, ສອດ ຄ່ອງຕາມທິດຊີ້ນໍາ ຂອງ ລັດຖະບານ ກໍຄືສະພາບຄວາມຮຽກ ຮ້ອງຕ້ອງການຕົວຈິງ ຂອງສັງຄົມ ຊຶ່ງກະຊວງສາທາລະນະສຸກໄດ້ອອກຂໍ້ຕົກລົງສະບັບເລກທີ 1110 ຂອງສາທາລະນະສຸກ, ວ່າດ້ວຍການຕົກລົງເຫັນດີໃຫ້ໂຮງໝໍ ແມ່ ແລະ ເດັກເກີດໃໝ່ເຊັນສັນຍາຮ່ວມທຸລະກິດກັບ ບໍລິສັດ ລິດປັນຍາສໍາຫຼວດອອກ ແບບ-ກໍ່ສ້າງຈຳກັດຜູ້ດຽວໃນການກໍ່ສ້າງຕຶກນອນພິເສດຢູ່ໂຮງໝໍແມ່ ແລະ ເດັກເກີດໃໝ່.
ຈາກນັ້ນ ໂຮງໝໍ ແລະ ບໍລິສັດ ໄດ້ເປັນເຈົ້າການຈັດຕັ້ງຜັນ ຂະຫຍາຍຂໍ້ຕົກລົງດັ່ງກ່າວ ໃຫ້ເຂົ້າສູ່ຕົວຈິງ ໂດຍສົມທົບກັບພາກສ່ວນທີ່ກ່ຽວຂ້ອງ ແລະ ສອດຄ່ອງຕາມລະບຽບການ, ອາ ຄານນອນພິເສດຫຼັງໃໝ່ນີ້ ໄດ້ອອກແບບໃຫ້ກົມກຽວ ແລະ ເຊື່ອມຕໍ່ກັບລະບົບອາຄານທີ່ມີແລ້ວຂອງໂຮງໝໍແມ່ ແລະ ເດັກເກີດໃໝ່ ຊຶ່ງມີຂະໜາດກ້ວາງ 32,6 ແມັດ, ຍາວ 59 ແມັດ, ເປັນອາຄານ 3 ຊັ້ນ ປະກອບມີຫ້ອງນອນພິເສດທັງໝົດ 50 ຫ້ອງ, ໂດຍຈັດເປັນ 4 ປະເພດຫ້ອງ ຄື: ປະເພດ 1 ຫ້ອງ ພິເສດສູດ VIP Luxury ມີ 2 ຫ້ອງ,ປະເພດ 2 ຫ້ອງ ສູດ Luxury ມີ 4 ຫ້ອງ, ປະເພດ 3 ຫ້ອງ ພິເສດ VIP ມີ 21 ຫ້ອງ ແລະ ປະເພດ 4 ຫ້ອງທົ່ວໄປ Deluxe ມີ 23 ຫ້ອງ; ຫ້ອງໂຖງພະຍາບານຕ້ອນຮັບ ແລະ ອື່ນໆ.
ໂຄງການນີ້ ມີມູນຄ່າການກໍ່ສ້າງທັງໝົດ 144,6 ຕື້ກວ່າກີບ (ຫຼື ປະມານ 6,4 ລ້ານກວ່າໂດລາສະຫະລັດ ) ໃນນີ້ ບໍລິສັດລົງ ທຶນທັງໝົດ 101,2 ຕື້ກວ່າກີບ ຫລື ປະມານ 4,5 ລ້ານໂດລາສະຫະ ລັດ ) ຖືຮຸ້ນ 70 ສ່ວນຮ້ອຍ ແລະ ໂຮງໝໍແມ່ ແລະ ເດັກເກີດໃໝ່ປະກອບສິດນໍາໃຊ້ທີ່ດິນ 3,700 ຕາແມັດ ຖືເປັນມູນຄ່າປະກອບເຂົ້າເປັນທຶນ 43.3 ຕື້ກວ່າກີບ ເທົ່າກັບ 1,9 ລ້ານໂດລາສະຫະລັດ ຖືຮຸ້ນ 30 ສ່ວນຮ້ອຍ. ໄລຍະການລົງທຶນກໍ່ສ້າງແມ່ນ 3 ປີ ແລະ ໄລຍະດໍາເນີນບໍລິການຮ່ວມທຸລະກິດ 25 ປີ.
ດຣ ບຸນແຝງ ພູມມະໄລສິດ ລັດຖະມົນຕີກະຊວງ ສາທາລະ ນະສຸກ ໄດ້ມີຄໍາເຫັນເນັ້ນໜັກໃຫ້ຄະນະຮັບຜິດຊອບໂຮງໝໍນໍາອາຄານຕຶກນອນພິເສດຂອງໂຮງໝໍແມ່ ແລະ ເດັກເກີດໃໝ່ໃຫ້ໄດ້ຮັບປະສິດທິຜົນສູງສຸດ ກໍຄື ການບໍລິການຮັບໃຊ້ສັງຄົມຢ່າງມີປະສິດທິພາບ ແລະ ປະສິດທິຜົນທີ່ສຸດ.
