ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ອາຊີບຫຍິບເຄື່ອງ ເປັນອາຊີບໜຶ່ງທີ່ສ້າງລາຍຮັບໃຫ້ຄອບຄົວ ແລະ ເຮັດໃຫ້ຊີວິດການເປັນຢູ່ດີຂຶ້ນ ເພາະຫລາຍຄົນໄດ້ໃຫ້ຄວາມສົນໃຈ ແລະ ຫັນເອົາອາຊີບຫຍິບເຄື່ອງມາເປັນອາຊີບຫລັກ ຫລື ສາມາດເປັນອາຊີບເສີມໄດ້ ເພາະຍຸກປັດຈຸບັນເຄື່ອງນຸ່ງຫົ່ມປະເພດຕ່າງໆ ບໍ່ວ່າຈະເປັນໂສ້ງ, ສິ້ນ, ເສື້ອ ຍັງເປັນສິ່ງຕ້ອງການຫລາຍໃນສັງຄົມ. ນາງ ພອນມະນີ ແສນມະນີ ກໍເປັນຜູ້ໜຶ່ງທີ່ໄດ້ຍຶດຖືເອົາອາຊີບຫຍິບເຄື່ອງເປັນອາຊີບຫລັກ ແລະ ໄດ້ເປີດຮ້ານຫຍິບເຄື່ອງ ຢູ່ບ້ານໜອງໄຮ ເມືອງຫາດຊາຍຟອງ ນະຄອນຫລວງວຽງຈັນ.
ນາງ ພອນມະນີ ແສນມະນີ ໄດ້ໃຫ້ສຳພາດວ່າ: ຕົນເອງແມ່ນມີຄວາມພູມໃຈຫລາຍໃນການເຮັດອາຊີບເປັນຊ່າງ ຫຍິບເຄື່ອງ ເຊິ່ງໄດ້ຮັບຫຍິບເຄື່ອງທົ່ວໄປ ເປັນຕົ້ນ ໂສ້ງ, ເສື້ອ ແລະ ຊຸດຜ້າໄໝ ມີລາຍໄດ້ຕໍ່ເດືອນປະມານ 4-5 ລ້ານກີບ, ເຮັດໃຫ້ຊີວິດການເປັນຢູ່ຂອງຕົນ ແລະ ຄອບຄົວດີຂຶ້ນ ສາມາດສົ່ງເສີມລູກໃຫ້ໄດ້ຮຽນໜັງສື, ທັງໄດ້ເຮັດວຽກຢູ່ເຮືອນ ສາມາດເບິ່ງແຍ່ງຄອບຄົວ-ເຮືອນຊານ ໄດ້ໃນຂະນະດຽວກັນ. ໃນປີ 2004 ຕົນເອງໄດ້ເຂົ້າເຮັດວຽກຢູ່ໂຮງງານຕັດຫຍິບ ໂດຍໄດ້ມີການພັດທະນາຝີມືໃນດ້ານການຫຍິບມາເລື້ອຍໆ ຈົນໄດ້ເລື່ອນຕໍາແໜ່ງເປັນຫົວໜ້າຂະແໜງດ້ານການຫຍິບເຄື່ອງ, ໃນເມື່ອກ່ອນການເຮັດວຽກຢູ່ໂຮງງານຕັດຫຍິບ ກໍສາມາດສ້າງລາຍຮັບໃຫ້ຕົນໃນລະດັບໜຶ່ງ ໂດຍອີງໃສ່ນະໂຍບາຍຕ່າງໆຂອງໂຮງງານ ມີທັງເງິນຂະຫຍັ່ນ, ເງິນຜະລິດ ມີລາຍໄດ້ສະເລ່ຍປະມານ 3 ລ້ານກີບຕໍ່ເດືອນ ເຊິ່ງເວລານັ້ນກໍຖືວ່າເປັນລາຍໄດ້ທີ່ສູງສົມຄວນ, ພ້ອມທັງຍັງມີນະໂຍບາຍສຸຂະພາບຕ່າງໆ.
ມາໃນທ້າຍປີ 2019 ໄດ້ເກີດມາການແພ່ລະບາດຂອງພະຍາດໂຄວິດ-19 ຕົນເອງຈຶ່ງໄດ້ອອກຈາກໂຮງງານ ແລະ ມາເປີດຮ້ານຫຍິບເຄື່ອງເປັນຂອງຕົນເອງ ໂດຍໄດ້ໃຊ້ບົດຮຽນ ແລະ ປະສົບການທີ່ຜ່ານມາ, ທຳອິດແມ່ນເລີ່ມຈາກການຮັບແປງເຄື່ອງ ແລະ ຫຍິບເຄື່ອງ ຈາກຄົນຮູ້ຈັກຂອບເຂດບ້ານໃກ້ເຮືອນຄຽງ, ເມື່ອເຫັນວ່າລາຍຮັບມີທ່ວງທ່າທີ່ດີ ຕົນເອງຈຶ່ງໄດ້ຫັນເອົາອາຊີບຕັດຫຍິບເປັນຫລັກໃນການສ້າງລາຍຮັບໃຫ້ຄອບຄົວ ແລະ ໄດ້ຊື້ຈັກຫຍິບເຄື່ອງ 1 ໜ່ວຍ ແລະ ຈັກແຊັກ 1 ໜ່ວຍ ແລະ ໄດ້ຕໍ່ເຕີມຂະຫຍາຍເຮັດເປັນຫ້ອງຫຍິບເຄື່ອງ. ຫລັງຈາກນັ້ນ, ກໍມີຮ້ານຂາຍເສື້ອຜ້າ, ຮ້ານຊຸດຜ້າໄໝຕ່າງໆ ໄດ້ຕິດຕໍ່ເອົາເສື້ອຜ້າຈໍານວນຫລາຍມາໃຫ້ຫຍິບເປັນປະຈໍາ ໂດຍຮ້ານດັ່ງກ່າວ ໄດ້ຕັດເປັນຮູບຮ່າງມາ ແລ້ວມາປະກອບຫຍິບເປັນໂຕ ເມື່ອສຳເລັດແລ້ວທາງຮ້ານຈຶ່ງມາຮັບເອົາ.
ຈາກການມາໃຊ້ບໍລິການຫຍິບເຄື່ອງຂອງລູກຄ້າ ເຫັນວ່າຕົນເອງກໍມີຄວາມຊໍານິຊຳນານ, ໝັ້ນໃຈຫລາຍຂຶ້ນ ຈາກປະສົບການ ການຫຍິບຕົວຈິງ ແລະ ການຖອດຖອນ ບົດຮຽນ ກໍຄື ການຕິຊົມຂອງລູກຄ້າ, ທັງເຮັດຕົວຈິງໄປນຳ, ຮຽນເພີ່ມໄປນຳ. ຈາກຄວາມຕັດສິນໃຈສູງບວກກັບຄວາມດຸໝັ່ນ, ອົດທົນ, ຕັ້ງໃຈ, ກ້າເຮັດກ້າຮັບຄຳຕຳນິຕິຊົມເພື່ອພັດທະນາຕົນເອງ ເຫັນວ່າ ກິດຈະການແມ່ນໄປໄດ້ດີສົມຄວນ ແລະ ໃນອານາຄົດຕົນເອງມີແຜນ ທີ່ຈະຮັບເອົາພະນັກງານ ຜູ້ທີ່ບໍ່ມີປະສົບການ, ຜູ້ທີ່ມີຄວາມສົນໃຈ ພ້ອມທີ່ຈະຮຽນຮູ້ ຢາກມາຫຍິບເຄື່ອງ ແຕ່ຍັງບໍ່ມີປະສົບການ ຫລື ຍັງຫຍິບເຄື່ອງບໍ່ເປັນມາກ່ອນ ຕົນເອງກໍພ້ອມທີ່ຈະສິດສອນ ແລະ ຖ່າຍທອດຄວາມຮູ້ໃຫ້ ແບບບໍ່ເສຍຄ່າ.
ໂອກາດນີ້, ນາງ ພອນມະນີ ແສນມະນີ ກໍໄດ້ມີຄຳເຫັນເນື່ອງໃນໂອກາດວັນກຳມະກອນສາກົນ ຄົບຮອບ 138 ປີ(1/5/1886-1/5/2024) ນີ້ວ່າ: ວັນທີ 1 ພຶດສະພາ ຫລື ວັນກໍາມະກອນສາກົນ ປຽບສະເໝືອນບຸນໃຫຍ່ຂອງຜູ້ອອກແຮງງານທຸກຄົນ ແລະ ເປັນວັນທີ່ສໍາຄັນສໍາລັບຊົນຊັ້ນກໍາມະກອນ ຫລື ຜູ້ອອກແຮງງານໝົດທຸກຄົນ ທີ່ໄດ້ອອກແຮງແຂ່ງຂັນຮ່ວມມືກັນ ປະກອບສ່ວນສ້າງສາພັດທະນາປະເທດຊາດ ຄົນລະເລັກລະໜ້ອຍ, ຂ້າພະເຈົ້າ ຂໍອວຍພອນໄຊໃຫ້ຊົນຊັ້ນກຳມະກອນ ແລະ ຜູ້ອອກແຮງງານໝົດທຸກຄົນ ມີສຸຂະພາບແຮງ, ປາສະຈາກໂລກໄພໄຂ້ເຈັບ, ປະຕິບັດໜ້າທີ່ຂອງຕົນໃຫ້ປະສົບຜົນສຳເລັດຕາມທີ່ຄາດໝາຍໄວ, ພ້ອມທັງສະຫລອງວັນກຳມະກອນສາກົນ ດ້ວຍຄວາມເບີກບານມ່ວນຊື່ນ ແລະ ມີສະຕິ.
ຂ່າວ-ພາບ: ສົມຫວັງ
May be an image of 2 people