ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ທ່ານ ໂພສີ ແກ້ວມະນີວົງ, ຮອງລັດຖະມົນຕີກະຊວງ ຖະ ແຫລງຂ່າວ, ວັດທະນະທຳ ແລະ ທ່ອງທ່ຽວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມສົ່ງເສີມການລົງທຶນດ້ານການທ່ອງທ່ຽວ ອາຊຽນ-ຈີນ ປະຈຳປີ 2023 ຈັດຂຶ້ນໃນ ວັນທີ 18 ພະຈິກ 2023 ທີ່ນະຄອນຄຸນໝິງ, ສປ ຈີນ ພາຍໃຕ້ຫົວຂໍ້: “ການພັດ ທະນາສີຂຽວ: ບັນລຸການຟື້ນຟູການທ່ອງທ່ຽວ ແລະ ອະນາຄົດທີ່ຍືນຍົງ”.
ກອງປະຊຸມຄັ້ງນີ້ຈັດຂຶ້ນໂດຍການຮ່ວມມືລະຫວ່າງສູນອາ ຊຽນ-ຈີນ ແລະ ກະຊວງທ່ອງທ່ຽວ, ສິລະປະ ແລະ ວັດທະນະທຳ ມາເລເຊຍ ຊຶ່ງຈັດຂຶ້ນໃນໂອກາດງານວາງສະແດງສິນຄ້າການທ່ອງ ທ່ຽວສາກົນຈີນ ປະຈຳປີ 2023 ຢູ່ນະຄອນຄຸນໝິງ ໃນລະຫວ່າງວັນທີ 17-19 ພະຈິກ 2023 ໂດຍມີ ທ່ານ ສີ ຈົງຈັນ, ເລຂາທິ ການໃຫຍ່ສູນອາຊຽນ-ຈີນ, ພ້ອມດ້ວຍຜູ້ຕາງ ໜ້າຂະແໜງການທ່ອງທ່ຽວຈາກ 8 ປະເທດສະມາຊິກອາຊຽນ ຄື: ກຳປູເຈຍ, ສປປ ລາວ, ມາເລເຊຍ, ມຽນມາ, ຟິລິບປິນ, ສິງກະໂປ, ໄທ ແລະ ຫວຽດນາມ, ລວມເຖີງຕາງໜ້າກອງເລຂາອາຊຽນ ແລະ ບັນດາຫົວໜ່ວຍທຸລະກິດການທ່ອງທ່ຽວພາຍໃນ ສປ ຈີນ ເຂົ້າຮ່ວມ.
ກອງປະຊຸມໄດ້ແລກປ່ຽນບົດຮຽນເຊິ່ງກັນ ແລະ ກັນກ່ຽວ ກັບການພັດທະນາດ້ານການທ່ອງທ່ຽວ ແລະ ການຊຸກຍູ້ສົ່ງເສີມການລົງທຶນດ້ານການທ່ອງທ່ຽວ ຫລັງຈາກໄດ້ຮັບຜົນກະທົບໜັກໜ່ວງຈາກການລະບາດຂອງພະຍາດໂຄວິດ 19 ຊຶ່ງຕາງຫນ້າຈາກແຕ່ລະປະເທດໄດ້ຜັດປ່ຽນກັນນຳສະເໜີກ່ຽວກັບສະພາບ ການພັດທະນາການທ່ອງທ່ຽວ, ບັນດາສະຖານທີ່ທ່ອງທ່ຽວ, ທ່າແຮງ ແລະ ເງື່ອນໄຂໃນການພັດທະນາການທ່ອງທ່ຽວ, ນະໂຍ ບາຍຂອງພາກລັດທີ່ມີຕໍ່ການສົ່ງເສີມການລົງທຶນດ້ານການທ່ອງ ທ່ຽວ ແລະ ອື່ນໆ ພາຍໃນປະເທດຂອງຕົນ ເພື່ອແນໃສ່ດຶງດູດໃຫ້ບັນດາຫົວ ໜ່ວຍທຸລະກິດດ້ານການທ່ອງທ່ຽວຈາກຕ່າງປະເທດ ໂດຍສະເພາະ ຈາກ ສປ ຈີນ ເຂົ້າໄປລົງທຶນພັດທະນາ. ພ້ອມນີ້ ຍັງເປັນການໂຄສະນາເພື່ອດຶງດູດນັກທ່ອງທ່ຽວຈາກ ສປ ຈີນ ແລະ ນັກທ່ອງທ່ຽວສາກົນເຂົ້າໄປທ່ອງທ່ຽວໃນປະເທດຕົນເອງໃຫ້ຫລາຍຂຶ້ນ.
ໃນໂອກາດນີ້, ຜູ້ຕາງໜ້າຈາກກົມແຜນການ ແລະ ການຮ່ວມມືສາກົນ, ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຈາກ ສປປ ລາວ ໄດ້ຂຶ້ນນຳສະເໜີໃຫ້ຮູ້ກ່ຽວກັບສະພາບຈຸດພິ ເສດຂອງປະເທດລາວ, ບັນດາພື້ນຖານໂຄງລ່າງທີ່ອຳນວຍຄວາມ ສະດວກໃຫ້ແກ່ການທ່ອງທ່ຽວ, ບັນດາສະຖານທີ່ທ່ອງທ່ຽວໃນປະເທດທີ່ມີ ທັງພັດທະນາແລ້ວ ແລະ ຍັງບໍ່ທັນໄດ້ຮັບການພັດ ທະນາ, ລວມເຖີງນະໂຍບາຍເພື່ອຊຸກຍູ້ສົ່ງເສີມການລົງທຶນດ້ານການທ່ອງທ່ຽວຂອງລາວ, ພ້ອມນີ້ ຍັງໄດ້ນຳສະເໜີກ່ຽວກັບບັນ ດາກິດຈະກຳທີ່ຈະຈັດຂຶ້ນຢູ່ລາວໃນໂອກາດເປີດປີທ່ອງທ່ຽວລາວ 2024 ແລະ ອື່ນໆ ເພື່ອແນໃສ່ຊຸກຍູ້ສົ່ງເສີມບັນດາຫົວໜ່ວຍທຸ ລະກິດຈາກ ສປ. ຈີນ ແລະ ຕ່າງປະເທດກົນເຂົ້າໄປລົງທຶນໃນຂະແຫນງການທ່ອງທ່ຽວຢູ່ລາວ, ລວມເຖີງດຶງດູກນັກທ່ອງທ່ຽວຈາກ ສປ. ຈີນ ແລະ ນັກທ່ອງທ່ຽວສາກົນອື່ນໆ ເຂົ້າໄປທ່ອງ ທ່ຽວລາວໃຫ້ຫລາຍຂຶ້ນກ່ວາເກົ່າ ຊຶ່ງຈະກາຍເປັນທ່າແຮງສຳຄັນເຂົ້າໃນການພັດທະນາເສດຖະກິດ-ສັງຄົມຂອງລາວໃຫ້ໄດ້ດີຂຶ້ນຢ່າງຕໍ່ເນື່ອງ.