ອາຊຽນ-ຍີ່ປຸ່ນ ຕີລາຄາຮອບດ້ານຜົນສໍາເລັດການຮ່ວມມືໃນການຕ້ານອາຊະຍາກໍາຂ້າມຊາດ

ກອງປະຊຸມລັດຖະມົນຕີອາຊຽນ + ຍີ່ປຸ່ນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 9 ຈັດຂຶ້ນໃນວັນທີ 29 ສິງຫາ 2024, ທີ່ນະຄອນຫລວງວຽງຈັນ ໂດຍການເປັນປະທານຮ່ວມຂອງທ່ານ ນາງ ຊູນ ຊື້ລິງ ລັດຖະມົນຕີກະຊວງພາຍໃນ ແລະ ກະ ຊວງພັດທະນາສັງຄົມ ແລະ ຄອບຄົວ ແຫ່ງ ສາທາລະນະລັດ ສິງກະໂປ ແລະ ທ່ານ ຄູຊູໂນກິ ໂຢຊິໂນບຸ ຮອງຜູ້ບັນຊາການສູງສຸດ ຕໍາຫລວດແຫ່ງຊາດ ຍີ່ປຸ່ນ ໂດຍມີ ທ່ານ ດຣ ກາວ ກິມ ຮຸນ ເລຂາທິການໃຫຍ່ອາຊຽນ, ບັນດາລັດຖະມົນຕີປະເທດສະມາຊິກອາຊຽນ ແລະ ຕີມໍແລັດສະເຕ, ພ້ອມດ້ວຍຄະນະຜູ້ແທນທີ່ຮັບຜິດຊອບວຽກງານຕ້ານອາຊະຍາກໍາຂ້າມຊາດ ເຂົ້າຮ່ວມ ແລະ ໄດ້ຕີລາຄາຢ່າງຮອບດ້ານຕໍ່ກັບຜົນສໍາເລັດໃນການຮ່ວມມືຂອງອາຊຽນ ແລະ ຍິ່ປຸ່ນ ໃນການຕ້ານອາຊະຍາກໍາຂ້າມຊາດ, ສ້າງໃຫ້ພາກພື້ນ ແລະ ສາກົນ ມີຄວາມສະຫງົບປອດໄພໂດຍພື້ນຖານ.

ກອງປະຊຸມຍັງໄດ້ເອກະພາບຕໍ່ກັບຜົນຂອງ ກອງປະຊຸມເຈົ້າໜ້າທີ່ອາວຸໂສອາຊຽນ+ ຍີ່ປຸ່ນ ເພື່ອກະກຽມໃຫ້ແກ່ກອງປະຊຸມລັດຖະມົນຕີອາຊຽນ+ ຍີ່ປຸ່ນ ວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 9. ພ້ອມນີ້, ຄະນະຜູ້ແທນທີ່ເຂົ້າຮ່ວມໄດ້ແລກປ່ຽນທັດສະນະ ແລະ ໄດ້ປຶກສາຫາລືຫລາຍບັນຫາ ໂດຍສະເພາະ ແມ່ນບັນຫາກ່ຽວຂ້ອງກັບການຮ່ວມມືລະຫວ່າງ ອາຊຽນ-ຍິ່ປຸ່ນ ໃນການຕ້ານອາຊະຍາກໍາຂ້າມຊາດ ໃນນັ້ນ, ໄດ້ທົບທວນຄືນຄວາມຄືບໜ້າ ຂອງການຈັດຕັ້ງປະຕິບັດແຜນງານຂອງອາຊຽນ-ຍີ່ປຸ່ນ ກ່ຽວກັບການຮ່ວມມືເພື່ອຕ້ານອາຊະຍາກາຂ້າມຊາດ ໄລຍະຜ່ານມາ. ທັງໝົດນັ້ນ, ສະແດງໃຫ້ເຫັນເຖິງການຮ່ວມມືທີ່ແໜ້ນແຟ້ນ ລະຫວ່າງອາຊຽນ ແລະ ຍີ່ປຸ່ນ ໃນການຕ້ານອາຊະຍາກຳຂ້າມຊາດຕະຫລອດຫລາຍປີຜ່ານມາ ທີ່ມີຜົນສໍາເລັດຫລາຍດ້ານ.

ກອງປະຊຸມຄັ້ງນີ້, ຍັງໄດ້ເປັນເອກະພາບກັນ ຮັບຮອງເອົາຖະແຫລງການຮ່ວມຂອງກອງປະ ຊຸມລັດຖະມົນຕີອາຊຽນ + ຍີ່ປຸ່ນ ວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 9 ແລະ ບົດລາຍງານຜົນຂອງກອງປະຊຸມໃນຄັ້ງນີ້ຕື່ມອີກ, ເພື່ອເປັນພື້ນ ຖານເຮັດໃຫ້ການຮ່ວມມືຂອງອາຊຽນ ແລະ ຍີ່ປຸ່ນໃນການຕ້ານອາຊະຍາກໍາຂ້າມຊາດ ມີຄວາມເລິກເຊິ່ງ, ກວ້າງຂວາງ ແລະ ມີຜົນສໍາເລັດຕາມຄາດໝາຍ, ເຮັດໃຫ້ປະຊາ ຄົມໂລກ ກໍຄື ປະຊາຄົມອາຊຽນ ແລະ ຍີ່ປຸ່ນ ມີຄວາມສະຫງົບປອດໄພ, ເປັນການສ້າງເງື່ອນໄຂໃຫ້ແກ່ການພັດທະນາເສດຖະກິດ-ສັງຄົມ.