ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມລັດຖະມົນຕີສິ່ງແວດລ້ອມອາຊຽນ ບວກ 3 ຄັ້ງທີ 18 (ສປ ຈີນ, ຍີ່ປຸ່ນ, ສ.ເກົາຫຼີ) ຈັດຂຶ້ນໃນຕອນເຊົ້າວັນທີ 24 ສິງຫາ 2023 ນີ້ ທີ່ຫໍປະຊຸມແຫ່ງຊາດ, ນະຄອນຫລວງວຽງຈັນ ພາຍໃຕ້ການເປັນປະທານຂອງ ທ່ານ ນາງ ບຸນຄໍາ ວໍລະຈິດ, ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ແຫ່ງ ສປປ ລາວ, ມີບັນດາລັດຖະມົນຕີສິ່ງແວດລ້ອມຈາກປະເທດສະມາຊິກອາຊຽນ, ສປ ຈີນ, ຍີ່ປຸ່ນ, ສ.ເກົາຫລີ, ຕາງໜ້າກອງເລຂາອາຊຽນ ແລະ ພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ແມ່ນເວທີທີ່ສຳຄັນເພື່ອເພີ່ມທະວີການພົວພັນແລະການຮ່ວມມືດ້ານສິ່ງແວດລ້ອມ ລະຫວ່າງບັນດາປະເທດສະມາຊິກອາຊຽນ ເທົ່ານັ້ນ, ແຕ່ຫາກລວມເຖິງຄູ່ຮ່ວມມືທີ່ດີ ຄື: ສປ ຈີນ, ຍີ່ປຸ່ນ ແລະ ສ.ເກົາຫຼີ. ກອງປະຊຸມຄັ້ງນີ້ ມີ 2 ຈຸດປະສົງສໍາຄັນເພື່ອແນໃສ່ຜົນປະໂຫຍດເຊິ່ງກັນແລະກັນໃນອະນາຄົດ ຄື: ປຶກສາຫາລືກ່ຽວກັບຄວາມຄືບໜ້າໃນການຈັດຕັ້ງປະຕິບັດບັນດາກິດຈະກໍາຂອງການຮ່ວມມືດ້ານສິ່ງແວດລ້ອມ ແລະ ແຜນການສືບຕໍ່ຮ່ວມມືດ້ານສິ່ງແວດລ້ອມລະຫວ່າງອາຊຽນກັບ ສປ ຈີນ, ຍີ່ປຸ່ນ ແລະ ສ.ເກົາຫຼີ ໃນປີ 2024.
ທ່ານ ນາງ ບຸນຄໍາ ວໍລະຈິດ ກ່າວໄຂກອງປະຊຸມຄັ້ງນີ້ວ່າ: ສິ່ງແວດລ້ອມແມ່ນບັນ ຫາທີ່ສໍາຄັນ ແລະ ມີຜົນກະທົບອັນໃຫຍ່ຫຼວງຕໍ່ການພັດທະນາເສດຖະກິດ-ສັງຄົມ ກໍຄື ຊີວິດການເປັນຢູ່ຂອງມວນມະນຸດທັງໃນລະດັບພາກພື້ນ ແລະ ໃນໂລກ. ດັ່ງນັ້ນ, ຄວາມພະຍາຍາມຮ່ວມກັນແມ່ນມີຄວາມຈໍາເປັນເພື່ອແກ້ໄຂບັນຫາດັ່ງກ່າວ. ພວກເຮົາມີຄວາມຮັບຜິດຊອບຢ່າງເຕັມທີ່ ເພື່ອແນໃສ່ນຳເອົາໝາກຜົນຂອງກອງປະຊຸມສະຫະປະຊາຊາດ ວ່າດ້ວຍການພັດທະນາແບບຍືນຍົງ ເຊິ່ງລວມມີຫຼາຍບັນຫາກ່ຽວ ກັບການເຄື່ອນໄຫວພາຍໃຕ້ຂອບອາຊຽນບວກສາມ ເຊັ່ນ: ການປົກປັກຮັກສາສິ່ງແວດລ້ອມ, ເມືອງທີ່ຍືນຍົງ, ໄພພິບັດດ້ານສິ່ງແວດລ້ອມ ແລະ ການປ່ຽນແປງດິນຟ້າອາກາດ, ຊີວະນາໆພັນ ແລະ ອື່ນໆ.
ທ່ານ ນາງ ບຸນຄໍາ ວໍລະຈິດ ກ່າວຕື່ມວ່າ: ການຮ່ວມມືເປັນສິ່ງສໍາຄັນເພື່ອແກ້ໄຂບັນຫາ. ສະນັ້ນ, ການພົວພັນ ຮ່ວມມືກັນຢ່າງເລິກເຊິ່ງກັບປະຊາຊົນນອກພາກພື້ນ ເຊັ່ນ: ສປ ຈີນ, ຍີ່ປຸ່ນ ແລະ ສ.ເກົາຫຼີ ໃນທຸກຂົງເຂດດັ່ງກ່າວຈະນຳເອົາໝາກຜົນທີ່ສຳຄັນບໍ່ສະເພາະພຽງແຕ່ມາໃຫ້ປະຊາຊົນຂອງພວກເຮົາເທົ່ານັ້ນ, ແຕ່ຍັງລວມເຖິງປະຊາຊົນໃນທົ່ວໂລກ ໃນດ້ານສະຖຽນລະພາບ, ຄວາມໝັ້ນຄົງ, ຄວາມຈະເລີນຮຸ່ງເຮືອງ ແລະ ຄວາມຍືນຍົງ. ດັ່ງນັ້ນ, ການຮ່ວມມືໃນດ້ານນະວັດຕະກໍາກັບ 3 ຄູ່ຮ່ວມ ມືທີ່ມີຄຸນຄ່າຂອງອາຊຽນຕ້ອງໄດ້ຮັບການປັບປຸງ ເຊິ່ງຈະເປັນແນວທາງສໍາຄັນເພື່ອເຮັດໃຫ້ ສາມາດເອົາຊະນະສິ່ງທ້າທາຍລະດັບໂລກເຫລົ່ານີ້ໄດ້. ການສືບຕໍ່ຮ່ວມມືກັບ ສປ ຈີນ, ຍີ່ປຸ່ນ ແລະ ສ.ເກົາຫຼີ ແມ່ນກຸນແຈເພື່ອບັນລຸການພັດທະນາແບບຍືນຍົງສໍາລັບປະເທດສະມາຊິກອາຊຽນ.
ທ່ານຍັງໄດ້ຖືໂອກາດນີ້ ຕາງໜ້າໃຫ້ລັດຖະບານລາວ ແລະ ປະເທດສະມາຊິກອາຊຽນສະແດງຄວາມຂອບໃຈຢ່າງຈິງໃຈຕໍ່ ສປຈີນ, ຍີ່ປຸ່ນ ແລະ ສ.ເກົາຫຼີ ທີ່ໄດ້ໃຫ້ການສະໜັບສະໜູນ ແລະ ການຮ່ວມມືຢ່າງຕັ້ງໜ້າແກ່ອາຊຽນ, ພ້ອມນີ້ ຍັງສະແດງຄວາມຂອບໃຈຕໍ່ກອງເລຂາອາຊຽນທີ່ໄດ້ເຮັດວຽກຢ່າງບໍ່ອິດເມື່ອຍໃນການໃຫ້ການຊ່ວຍເຫຼືອ ແລະ ສະໜັບສະໜູນແກ່ປະເທດສະມາຊິກອາຊຽນຕະຫລອດມາ.
ຂ່າວບພາບ: ຄໍາກອງ ກິດຕິຄຸນ+ດວງສະຫວັນ ຂັນທະວົງສາ