ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ ຈັດກອງປະຊຸມ ກຸ່ມວຽກອາຊຽນ ກ່ຽວກັບສະຖິຕິການຄ້າສິນຄ້າສາກົນ ຄັ້ງທີ 10 ໃນລະຫວ່າງວັນທີ 10-11 ກໍລະກົດ ນີ້ ທີ່ນະຄອນຫຼວງວຽງຈັນ ໂດຍການເປັນປະທານຮ່ວມຂອງ ທ່ານ ນາງ ການຈະນາ ພູມະລີ ຜູ້ອຳນວຍການ ກອງນະໂຍບາຍ ແລະ ວິຊາການ ສະຖິຕິ ສຳນັກງານສະຖິຕິແຫ່ງຊາດ ແຫ່ງຣາຊະອານາຈັກໄທ ທ່ານ ນາງ ສາລິກາ ຈັນທະລາວົງ ຮອງກົມສະຖິຕິເສດຖະກິດ ສູນສະຖິຕິແຫ່ງຊາດແຫ່ງ ສປປ ລາວ.
ກອງປະຊຸມຄັ້ງນີ້ ເປັນການສ່ອງແສງກ່ຽວກັບຄວາມຄືບໜ້າ ແລະ ການເພີ່ມຄຸນນະພາບຂອງຂໍ້ມູນສະຖິຕິການຄ້າສິນຄ້າສາກົນ ແລະ ຕິດຕາມແຜນງານກຸ່ມວຽກອາຊຽນ ກ່ຽວກັບສະຖິຕິການຄ້າສິນຄ້າສາກົນ ແລະ ແຜນງານໃນຕໍ່ໜ້າ ຊຶ່ງມີການສະເໜີ ແລະ ປຶກສາຫາລືຫຼາຍໆຫົວຂໍ້ທີ່ສໍາຄັນ ໂດຍໄດ້ທົບທວນການຈັດຕັ້ງປະຕິບັດແຜນງານຕ່າງໆ ທີ່ໄດ້ຕົກລົງໃນກອງປະຊຸມຄະນະກຳມາທິການສະຖິຕິອາຊຽນ ຄັ້ງທີ 13 ແລະ ກອງປະຊຸມອະນຸກຳມະການວຽກງານແຜນການ ແລະ ການປະສານງານຂອງຄະນະກຳມາທິການສະຖິຕິອາຊຽນຄັ້ງທີ 27 ທີ່ຜ່ານມາ, ການອັບເດດກ່ຽວກັບສະຖານະການການສົ່ງຂໍ້ມູນ, ການປັບປຸງກ່ຽວກັບການພັດທະນາຄູ່ມືການວິເຄາະ, ແຜນການຈັດຕັ້ງປະຕິບັດ ແລະ ກໍານົດເວລາຂອງອາຊຽນ -ຊ່ວຍເຫຼືອ – ອາຊຽນ, ແຜນບຸລິມະສິດ ໃນປີ 2024 ແລະ ແຜນພັດທະນາປີ 2025 ຕະຫຼອດຈົນເຖິງການປັບປຸງບັນຫາຂ້າມຜ່ານ ກ່ຽວກັບສະຖິຕິການຄ້າສິນຄ້າສາກົນ, ປັບປຸງລະບົບສະຖິຕິອະນຸກໍາມະການອາຊຽນ (ACSS), ການທົບທວນການປະຕິບັດຂໍ້ມູນ (CoP) ໃນພາກ B (ຂະບວນການສະຖິຕິ) ແລະ ພາກທີ C (ຜົນຜະລິດສະຖິຕິ) ແລະ ແຜນກິດຈະກໍາຂອງທີມງານວຽກງານການຄ້າ.
ທັງນີ້, ເພື່ອປະເມີນການຈັດຕັ້ງປະຕິບັດວຽກງານສະຖິຕິ ໃນລະດັບຊາດ ແລະ ພາກພື້ນ ໂດຍສະເພາະໃນອາຊຽນ ກໍຄືການຮັບປະກັນດ້ານການສະໜອງຂໍ້ມູນ ແລະ ຄຸນນະພາບຂອງຂໍ້ມູນ ໂດຍເລັ່ງໃສ່ການເພີ່ມປະສິດທິພາບໃນການຜະລິດສະຖິຕິທາງການ, ຄວາມເປັນເອກະພາບດ້ານຫຼັກການເກັບກໍາສັງລວມ ຕະຫຼອດຈົນເຖິງການຊ່ວຍເຫຼືອກັນຊຶ່ງກັນ ແລະ ກັນພາຍໃນປະເທດອາຊຽນ ຊຶ່ງເປັນກອງປະຊຸມທີ່ສຳຄັນ ກ້າວໄປສູ່ກອງປະຊຸມ ກຳມະການສະຖິຕິອາຊຽນ ໃນເດືອນພະຈິກ 2024.
ຂໍ້ມູນຈາກ: ສູນສະຖິຕິແຫ່ງຊາດລາວ