ກອງປະຊຸມໜ່ວຍງານຮັບຜິດຊອບ ຖະແຫຼງການວ່າດ້ວຍວັດທະນະທຳການປ້ອງກັນເຫດອາຊຽນ ຄັ້ງທີ 7 ເພື່ອໃຫ້ສັງຄົມມີສັນຕິພາບ, ກວມລວມ, ເຂັ້ມແຂງ, ສຸຂະພາບດີ ແລະ ສາມັກຄີປອງດອງກັນ (the 7th WG on CoP Meeting) ຈັດຂຶ້ນໃນຕອນເຊົ້າ ວັນທີ 25 ກັນຍາ 2024 ທີ່ແລນມາກ ລີເວີໄຊ ນະຄອນຫລວງວຽງຈັນ, ພາຍໃຕ້ການເປັນປະທານຂອງ ທ່ານ ຄຳພູ ເພັຍສັກຂາ ຮອງຫົວໜ້າກົມແຜນການ ແລະ ການຮ່ວມມືສາກົນ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ຫົວໜ້າເຈົ້າໜ້າທີ່ອາວຸໂສວັດທະນະທຳ-ສັງຄົມອາຊຽນ ໂດຍມີບັນດາເຈົ້າໜ້າທີ່ອາວຸໂສເສົາຄ້ຳວັດທະນະທຳ-ສັງຄົມອາຊຽນ, ປະເທດ ຕີມໍແລດສະເຕ, ທ່ານຮອງເລຂາທິການໃຫຍ່ອາຊຽນ, ບັນດາປະທານຂະແໜງການທີ່ກ່ຽວຂ້ອງ ແລະ ຄະນະຜູ້ແທນຈາກປະເທດສະມາຊິກອາຊຽນ ເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອຮັບຟັງການລາຍງານຄວາມຄືບໜ້າການຈັດຕັ້ງປະຕິບັດແຜນງານ ກໍ່ຄືການຕີລາຄາບັນດາກິດຈະກໍາທີ່ໄດ້ຈັດຕັ້ງປະຕິບັດໃນການຊຸກຍູ້ຜັນຂະຫຍາຍຖະແຫຼງກ່າວດັ່ງກ່າວໃນໄລຍະຜ່ານມາ ພ້ອມທັງພ້ອມກັນປຶກສາຫາລືທິດທາງແຜນການຕໍ່ໜ້າ ໂດຍສະເພາະແຜນຮ່ວມມືລະຫວ່າງຂະແໜງການທີ່ກ່ຽວຂ້ອງທັງພາຍໃນອາຊຽນ ແລະ ບັນດາປະເທດຄູ່ຮ່ວມເຈລະຈາ ກໍ່ຄືຂະແໜງການທີ່ກ່ຽວຂ້ອງອື່ນໆ ເພື່ອຊຸກຍູ້ສົ່ງເສີມການຈັດຕັ້ງຜັນຂະຫຍາຍຖະແຫຼງການດັ່ງກ່າວໃຫ້ເປັນຮູບປະທໍາຍິ່ງຂຶ້ນ ແນໃສ່ຮັບປະກັນຄວາມຖືກຕ້ອງສອດຄ່ອງກັບແຜນບູລິມະສິດ ທີ່ກ່ຽວຂ້ອງຂອງອາຊຽນ ລວມທັງແຜນຍຸດທະສາດ ຂອງປະຊາຄົມວັດທະນະທໍາ-ສັງຄົມອາຊຽນ ຫຼັງປີ 2025.
