ການຫັນປ່ຽນເພື່ອກ້າວໄປສູ່ດິຈິຕອນໃນອະນາຄົດ ແມ່ນໜຶ່ງໃນຫລາຍບູລິມະສິດສໍາຄັນທີ່ນອນຢູ່ໃນການເພີ່ມທະວີການ ເຊື່ອມຈອດ ເຊິ່ງແມ່ນສ່ວນໜຶ່ງຂອງຄໍາຂວັນໃນການເປັນປະທານອາຊຽນຂອງ ສປປ ລາວ ໃນປີ 2024.
ການຫັນປ່ຽນເພື່ອກ້າວໄປສູ່ດິຈິຕອນໃນອະນາຄົດ: ບູລິມະສິດນີ້ ແມ່ນເພື່ອສົ່ງ ເສີມໃຫ້ອາຊຽນ ເປັນເຂດເສດຖະກິດດິຈິຕອນທີ່ນຳຫນ້າ, ດ້ວຍການສ້າງໃຫ້ອາຊຽນມີການເຊື່ອມຈອດກັນພາຍໃນ ແລະ ເຊື່ອມຈອດກັບທົ່ວໂລກ ໂດຍການນໍາໃຊ້ເຄື່ອງ ມືທີ່ທັນສະໄໝ, ຊຶ່ງເຄື່ອງມືທັນສະໄໝດັ່ງກາວຈະສ້າງກາລະໂອ ກາດອັນໃໝ່ ແລະ ສ້າງຄວາມເຂັ້ມແຂງ ເພື່ອຮັບມືກັບສິ່ງທ້າທາຍຕ່າງໆ ຈາກເສດຖະກິດໂລກທີ່ທັນສະໄຫມ. ການຫັນເປັນດີຈີຕອນ ສາມາດເພີ່ມທະວີການເຊື່ອມຈອດໃນອາຊຽນ ເພາະຈະມີວິທີທາງໃໝ່ສຳລັບການຕິດຕໍ່ສື່ສານ, ການຮ່ວມມື ແລະ ການ ແລກປ່ຽນຂໍ້ມູນຂ່າວສານ. ດ້ວຍການນຳໃຊ້ເຕັກໂນໂລຊີດິຈີຕອນ, ວິທີການ ແລະ ກົນໄກການຊຳລະຜ່ານລະບົບເອເລັກໂຕຣນິກ, ອາຊຽນຈະສາມາດແກ້ໄຂບັນຫາສິ່ງທີ່ເປັນອຸປະສັກກີດ ຂວາງ ແລະ ສາມາດສື່ສານໄດ້ທັນເວລາ, ເສີມສ້າງການພັດທະນາປະຊາຄົມໃຫ້ມີ ການເຊື່ອມຈອດ ແລະ ເຊື່ອມໂຍງຫລາຍຂື້ນ.
ການຫັນເປັນດີຈີຕອນ ຍັງສາມາດສ້າງຄວາມເຂັ້ມແຂງຂອງອາຊຽນ ໂດຍການຍົກລະດັບຂີດຄວາມສາມາດໃນການປັບຕົວຕໍ່ການປ່ຽນແປງ ແລະ ບັນຫາຕ່າງໆ. ພາຍໃຕ້ການເປັນປະທານຂອງ ສປປ ລາວ, ຫນ້າວຽກ ບູລິມະສິດຈະສຸມໃສ່ການຫຼຸດຜ່ອນສະພາວະຊັກຊ້າໃນລະບົບການຄ້າ ຊຶ່ງເປັນການປູທາງ ໄປສູ່ລະ ບົບຜ່ານປະຕູດຽວອາຊຽນໃນຮູບແບບໃຫມ່ ແລະ ສ້າງແຜນງານເພື່ອກ້າວໄປສູ່ມາດຕະຖານການຄ້າດ້ານດິຈິຕອນແບບໃຫມ່ທີ່ສອດຄ່ອງກັບມາດຕະຖານຂອງສາກົນ.
ສປປ ລາວ ຈະຊຸກຍູ້ສົ່ງເສີມຫນ້າວຽກບູລິມະສິດ ເພື່ອສ້າງກາລະໂອກາດອັນໃໝ່ໃນຂະແໜງການດີຈິຕອນສໍາລັບບຸກຄົນ (individual) ໂດຍການເປີດນໍາໃຊ້ເວທີການສຶກສາຜ່ານລະບົບອອນລາຍ ໃນຍຸກອຸດສາຫະກໍາ 4.0 ແລະ ສໍາລັບທຸລະກິດ ໂດຍຜ່ານແຜນດຳເນີນງານການສ້າງຕັ້ງລະບົບຕົວເລກຂຶ້ນທະບຽນວິສາຫະກິດອາຊຽນ. ຫນ້າວຽກ ບູລິມະສິດເພື່ອຜັນຂະຫຍາຍບູລິມະສິດນີ້ ປະກອບມີ: ສຳເລັດການສຶກສາດ້ານເຕັກນິກກ່ຽວກັບ ລະບົບພາສີຜ່ານປະຕູດຽວອາຊຽນໃນຮູບແບບໃຫມ່ ໃນນີ້ຈະມີ ການຮັບຮອງເອົາແຜນງານວ່າດ້ວຍມາດຕະຖານການຄ້າດີຈີຕອນໃນອາຊຽນ, ແລະ ເວທີການສຶກສາຜ່ານລະບົບອອນລາຍໃນຍຸກອຸດສາຫະກໍາ 4.0; ແລະ ຮັບຮອງເອົາແຜນງານ ເພື່ອສ້າງຕັ້ງລະ ບົບຕົວເລກຂື້ນທະບຽນວິສາຫະກິດໃນອາຊຽນ.
