ກອງປະຊຸມໜ່ວຍງານພັດທະນາແຜນຍຸດທະສາດ ປະຊາຄົມ ວັດທະນະທໍາ-ສັງຄົມ ອາຊຽນ ຫລັງປີ 2025 ຄັ້ງທີ 7 ຈັດຂຶ້ນ ໃນວັນທີ 24 ກັນຍາ 2024 ນີ້, ຢູ່ ນະຄອນຫລວງວຽງຈັນ ສປປ ລາວ ໂດຍການເປັນປະທານຮ່ວມ ຂອງທ່ານ ຄຳພູ ເພັຍສັກຂາ ຮອງຫົວໜ້າກົມແຜນການ ແລະ ການຮ່ວມມືສາກົນ ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ, ທັງເປັນເຈົ້າໜ້າທີ່ອາວຸໂສວັດທະນະທຳ-ສັງຄົມອາຊຽນ ແລະ ທ່ານນາງ ຄຣິສຕີນາ ໂຢເຄນຢິບ (CHRISTINA YEO KEO YIN) ໂດຍມີໜ່ວຍງານພັດທະນາແຜນຍຸດທະສາດ ປະຊາຄົມ ວັດທະນະທຳ-ສັງຄົມ ອາຊຽນ, ຕີມໍແລດເຕ, ຮອງເລຂາທິການໃຫຍ່ອາຊຽນ ແລະ ຄະນະຜູ້ແທນຈາກປະເທດສະມາຊິກອາຊຽນ ເຂົ້າຮ່ວມ.
ທ່ານ ຄຳພູ ເພັຍສັກຂາ ກ່າວວ່າ: ກອງປະຊຸມ ໃນຄັ້ງນີ້, ແນໃສ່ພັດທະນາແຜນຍຸດທະສາດປະຊາຄົມວັດທະນະທຳ-ສັງຄົມອາຊຽນ ຫລັງປີ 2025 ໃຫ້ສຳເລັດຕາມເປົ້າໝາຍທີ່ວາງໄວ້ ເຊິ່ງໄດ້ສືບຕໍ່ປຶກສາຫາລື ບາງວຽກງານທີ່ຍັງຄົງຄ້າງ ເປັນຕົ້ນ, ວຽກງານການສົ່ງເສີມ-ປົກປ້ອງສິດທິມະນຸດ ແລະ ມູມມອງອາຊຽນຕໍ່ອິນໂດ-ປາຊິຟິກ ລວມທັງ ກວດກາຄືນບັນດາຕົວຊີ້ວັດຍຸດທະສາດ ຈຳນວນ 62 ຂໍ້ ທີ່ໄດ້ຮັບຄຳເຫັນຈາກບັນດາປະເທດສະມາຊິກອາຊຽນ. ຜ່ານການປຶກສາຫາລື ແລະ ຕີລາຄາ ໃນກອງປະຊຸມ ສາມາດປະຕິບັດໄດ້ຕາມແຜນການ ແລະ ສາມາດເອກະພາບກັນ ໃນການສ້າງແຜນຍຸດທະສາດ ດັ່ງກ່າວ ແລະ ຄາດວ່າ ຈະສົ່ງຮ່າງແຜນຍຸດທະສາດປະຊາຄົມວັດທະນະທຳ-ສັງຄົມ ອາຊຽນ ຫລັງປີ 2025 ໃຫ້ຄະນະສະເພາະກິດລະດັບສູງ ວິໄສທັດປະຊາຊົມອາຊຽນ ໃນຕົ້ນເດືອນພະຈິກ 2024.
ສຳລັບ ກອງປະຊຸມຄັ້ງຕໍ່ໄປ ກໍຄື ຄັ້ງທີ 8 ຈະຈັດຂຶ້ນທີ່ ນະຄອນຫລວງຈາກາຕາ ປະເທດອິນໂດເນເຊຍ ເພື່ອພັດທະນາເອກະສານດັ່ງກ່າວນີ້ ໃຫ້ສົມບູນ.
ຂ່າວ: ທະນູທອງ
ພາບ:ຄໍາກອງ
