ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ທ່ານ ຈາຢານ ໂກບຣາກາດີ (sh. jayant N. khobragade) ເອກອັກຄະລັດຖະທູດອິນເດຍ ປະຈຳອາຊຽນ ຮ່ວມກັນເປັນປະທານກອງປະຊຸມທ່ອງທ່ຽວອາຊຽນ-ອິນເດຍ ຄັ້ງທີ 11 ຈັດຂຶ້ນໃນວັນທີ 25 ມັງກອນ 2024 ນີ້ ທີ່ນະຄອນຫລວງວຽງຈັນ, ສປປ ລາວ ພາຍໃຕ້ຫົວຂໍ້ “ການທ່ອງທ່ຽວທີ່ມີຄຸນນະພາບ ແລະ ມີຄວາມຮັບຜິດຊອບ ເພື່ອຄວາມຍືນຍົງໃນອະນາຄົດຂອງອາ ຊຽນ” .
ກອງປະຊຸມໄດ້ປຶກສາຫາລື ເເລະ ເເລກປ່ຽນຂໍ້ມູນ ເຊິ່ງກັນ ແລະ ກັນ ໃນຫລາຍບັນຫາສຳຄັນ, ແນໃສ່ເຮັດໃຫ້ແຜນການຮ່ວມມືດ້ານການທ່ອງທ່ຽວລະຫວ່າງອາຊຽນ ແລະ ອິນເດຍ ໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ ແລະ ໄດ້ຮັບການພັດທະນາຂຶ້ນໄປເລື້ອຍໆ.
ກອງປະຊຸມຄັ້ງນີ້ຍັງເປັນໝາກຜົນອັນສຳຄັນ ປະກອບສ່ວນເຂົ້າໃນການ ເພີ່ມທະວີການຮ່ວມມື ເເລະ ການຈັດຕັ້ງປະຕິບັດ ເເຜນຍຸດທະສາດການທ່ອງທ່ຽວອາຊຽນ-ອິນເດຍ 2023-2027 ເເນໃສ່ອຳນວຍຄວາມສະດວກ ການເດີນທາງອາຊຽນ-ອິນເດຍ, ການພັດທະນາດ້ານບຸກຄະລາກອນ, ການເເລກປ່ຽນຂໍ້ມູນຂ່າວສານ ເເລະ ສ້າງໂອກາດໃຫ້ເເກ່ການລົງທຶນ ສຳລັບ ຂະເເໜງການທ່ອງທ່ຽວອາຊຽນ ໃຫ້ນັບມື້ນັບຂະຫຍາຍຕົວ ເເລະ ປະກົດຜົນເປັນຈິງ.
ທ່ານນາງ ສວນສະຫວັນ ວິຍະເກດ ກ່າວວ່າ: ອິນເດຍ ເເມ່ນຄູ່ເຈລະຈາອາຊຽນ ທີ່ມີຄວາມສຳຄັນເປັນຢ່າງຍິ່ງ, ເປັນຕະຫລາດທ່ອງທ່ຽວ ທີ່ໃຫຍ່ຂອງອາຊຽນ ເເລະ ບັນດານັກທ່ອງທ່ຽວອິນເດຍ ທີ່ໄດ້ເດີນທາງເຂົ້າມາທ່ອງທ່ຽວໃນບັນດາປະເທດ ສະມາຊິກອາຊຽນ ນັບມື້ນັບເພີ່ມຂື້ນຢ່າງຫລວງຫລາຍ ເຊິ່ງໄດ້ປະກອບສ່ວນອັນສຳຄັນໃຫ້ເເກ່ການທ່ອງທ່ຽວອາຊຽນເປັນຢ່າງດີ. ພ້ອມນີ້, ອິນເດຍຍັງໃຫ້ການຮ່ວມມືຢ່າງຕັ້ງໜ້າ ໃນວຽກງານພັດທະນາບຸກຄະລາກອນທ່ອງທ່ຽວອາຊຽນ, ການເເລກປ່ຽນຂໍ້ມູນຂ່າວສານດ້ານການທ່ອງທ່ຽວ ເເລະ ການຈັດຕັ້ງປະຕິບັດເເຜນການຮ່ວມມື ດ້ານການທ່ອງທ່ຽວອາຊຽນ-ອິນເດຍ ໄດ້ເປັນຢ່າງດີ.
ພ້ອມນີ້ ທ່ານສະແດງຄວາມຫວັງວ່າ ອິນເດຍ ຈະສືບຕໍ່ ຈັດຕັ້ງປະຕິບັດແຜນການຮ່ວມມື ໃຫ້ເກີດເປັນຮູບປະທຳ ນັບມື້ນັບເພີ່ມ ຂຶ້ນ ເເນໃສ່ໂຄສະນາການທ່ອງທ່ຽວ, ອໍານວຍຄວາມສະດວກ ສົ່ງເສີມການເດີນທາງທ່ອງທ່ຽວອາຊຽນ-ອິນເດຍ ເເລະ ການທ່ອງທ່ຽວອິນເດຍ-ອາຊຽນ ໃຫ້ນັບມື້ກວ້າງຂວາງຂຶ້ນກວ່າເກົ່າ.