ອາຊຽນ ຮັບຮອງເອົາຫຼາຍບັນຫາສຳຄັນຕິດພັນກັບການສ້າງກົນໄກໃຫ້ແກ່ແຮງງານເຄື່ອນຍ້າຍ

ກອງປະຊຸມສ້າງຄວາມເຂັ້ມແຂງໃຫ້ກັບກຳມະບານອາຊຽນໃນການເພີ່ມທະວີໃນການເຊື່ອມໂຍງກັບແຮງງານເຄື່ອນຍ້າຍ ຈັດຂຶ້ນດ້ວຍຜົນສໍາເລັດໃນວັນທີ 23 ສິງຫາ ນີ້ ທີ່ນະຄອນຫຼວງວຽງຈັນ, ເປັນປະທານຮ່ວມຂອງ ທ່ານ ວິໄລ ວົງຂະເສີມ ຮອງປະ ທານສູນກາງສະຫະພັນກຳມະບານລາວ (ສກລ); ທ່ານ ໂຣບິນ ໂຕເຣດ ເລຂາທິການໃຫຍ່ສະພາກໍາມະບານອາຊຽນ ມີຜູ້ຕາງໜ້າຈາກປະເທດອາຊຽນ ແລະ ຂະແໜງການກ່ຽວຂ້ອງເຂົ້າຮ່ວມ.

ກອງປະຊຸມໃນຄັ້ງນີ້ໄດ້ຮັບຟັງການແລກປ່ຽນບົດຮຽນໃນຫຼາຍຫົວຂໍ້ທີ່ສຳຄັນ ພ້ອມກັນສະຫຼຸບ ແລະ ກຳນົດທິດທາງແຜນການໃນຕໍ່ໜ້າ ພ້ອມທັງຮັບຮອງເອົາຫຼາຍບັນຫາສຳຄັນເປັນຕົ້ນ ເພີ່ມທະວີການພົວພັນຮ່ວມມືກັນຢ່າງເປັນປົກກະຕິລະຫວ່າງບັນດາກຳມະບານປະເທດອາຊຽນດ້ວຍການສ້າງຈຸດປະສານງານຢ່າງເປັນທາງການ ສົ່ງເສີມໃຫ້ບັນດາກຳມະບານປະເທດອາຊຽນໃນການສ້າງ MOU ຂອງສອງຝ່າຍ ຫຼື ຫຼາຍຝ່າຍ, ສ້າງກົນໄກໃຫ້ແຮງງານເຄື່ອນຍ້າຍສາມາດເຂົ້າເປັນສະມາ ຊິກກຳມະບານຂອງປະເທດທີ່ຮັບແຮງງານ, ເພີ່ມທະວີການຮ່ວມມືລະຫວ່າງກຳມະ ບານອາຊຽນກັບ CSO ໃນການປົກປ້ອງສິດທິແຮງງານຂອງແຮງງານເຄື່ອນຍ້າຍ, ຊຸກຍູ້ໃຫ້ມີການສ້າງຕັ້ງກອງທຶນພັດທະນາກຳມະບານອາຊຽນ, ສົ່ງເສີມໃຫ້ບັນດາກຳມະບານປະເທດອາຊຽນທີ່ຖືກເປັນປະທານອາຊຽນໄດ້ມີການຈັດກອງປະຊຸມກຳມະ ບານອາຊຽນຂຶ້ນໃນແຕ່ລະປີ.