ໃນວັນທີ 21 ກັນຍາ 2023 ບໍລິສັດທາງລົດໄຟ ລາວ -ຈີນ ໄດ້ໃຫ້ການຊ່ວຍເຫຼືອອຳນວຍຄວາມສະດວກ ແກ່ນັກຮຽນ ຈໍານວນ 15 ຄົນ ແລະ ຄູ-ອາຈານ 6 ທ່ານ ຂອງໂຮງຮຽນສຶກສາຄົນພິການ ຂອງ 8 ແຂວງພາກເໜືອ ທີ່ຕັ້ງຢູ່ແຂວງຫຼວງພະບາງ ເພື່ອຊ່ວຍໃຫ້ເຂົາເຈົ້າໄດ້ມີຄວາມສະດວກໃນການເດີນທາງ ມາຮ່ວມງານສະເຫຼີມສະຫຼອງວັນພາສາມືສາກົນ ຄັ້ງທີ II ທີ່ຈັດຂຶ້ນໃນວັນທີ 23 ກັນຍານີ້.
ທ່ານ ສົມຫວັງ ສິລິປັນຍາ ອຳນວຍການໂຮງຮຽນດັ່ງກ່າວ ໄດ້ເປີດເຜີຍວ່າ: ເນື່ອງຈາກໃນປີຜ່ານມາ, ນັກຮຽນ ແລະ ຄູ-ອາຈານຂອງໂຮງຮຽນ ໄດ້ເດີນທາງມາຮ່ວມງານວັນພາສາມືສາກົນ ທີ່ນະຄອນຫຼວງວຽງຈັນ ໂດຍການເຊົ່າເໝົາລົດເມ ຊຶ່ງດ້ວຍໄລຍະທາງ ແລະ ຫົນທາງທີ່ຍາວ ແລະ ໂຄ້ງ ຈຶ່ງເຮັດໃຫ້ການເດີນທາງສຳລັບນັກຮຽນ ແລະ ຄູ-ອາຈານບໍ່ສະດວກ. ສະນັ້ນ, ໃນປີນີ້, ທາງພາກສ່ວນກ່ຽວຂ້ອງຂອງໂຮງຮຽນ ກໍຄືສູນມືແຫ່ງຄວາມຫວັງ ຢູ່ນະຄອນຫຼວງວຽງຈັນ ຈຶ່ງໄດ້ຂຽນໃບສະເໜີຂໍການຊ່ວຍເຫຼືອຈາກບໍລິສັດທາງລົດໄຟລາວ-ຈີນ ເພື່ອໃຫ້ໄດ້ຂີ່ລົດໄຟມານະຄອນຫຼວງວຽງຈັນ ໂດຍທາງບໍລິສັດ ກໍໄດ້ເຫັນດີໃຫ້ການຊ່ວຍເຫຼືອ ການເດີນທາງໄປ-ກັບໂດຍບໍ່ເສຍຄ່າ. ພ້ອມດຽວກັນນີ້, ກໍຈັດໃຫ້ມີອາຫານ, ເຄື່ອງດື່ມ, ຂະໜົມ ແລະ ໝາກໄມ້ ໃຫ້ແກ່ນັກຮຽນ ແລະ ຄູ-ອາຈານ.
ການເດີນທາງຄັ້ງນີ້, ນັກຮຽນ ແລະ ຄູ-ອາຈານ ກໍໄດ້ສະແດງຄວາມຮູ້ສຶກດີໃຈ ແລະ ຂອບໃຈຕໍ່ບໍລິສັດທາງລົດໄຟລາວ-ຈີນ ທີ່ໄດ້ໃຫ້ການຊ່ວຍເຫຼືອ ໃຫ້ນັກຮຽນຄົນພິການ ໄດ້ມີໂອກາດຂີ່ລົດໄຟ ແລະ ໄດ້ຮັບການເດີນທາງທີ່ສະດວກສະບາຍກວ່າແຕ່ກ່ອນ ແລະ ວັນທີ 25 ກັນຍານີ້, ບໍລິສັດທາງລົດໄຟລາວ-ຈີນ ກໍຈະກະກຽມເພື່ອຊ່ວຍເຫຼືອ ອຳນວຍຄວາມສະດວກແກ່ນັກຮຽນ ແລະ ຄູ-ອາຈານ ເດີນທາງກັບມາແຂວງຫຼວງພະບາງດ້ວຍລົດໄຟ ຢ່າງສະດວກສະບາຍຕື່ມອີກ.
