ກອງປະຊຸມປຶກສາຫາລື ລະຫວ່າງ ລັດຖະມົນຕີເສດຖະກິດອາຊຽນ ແລະ ອິນເດຍ (21st AEM-INDIA CONSULTATION) ໄດ້ຈັດຂຶ້ນ, ໃນວັນທີ 20 ກັນຍາ 2024 ນີ້ ທີ່ໂຮງແຮມຄຣາວພາຊາ ນະຄອນຫຼວງວຽງຈັນ, ໂດຍການເປັນປະທານຂອງທ່ານ ມະໄລທອງ ກົມມະສິດ ລັດຖະມົນຕີກະຊວງ ອຸດສາຫະກໍາ ແລະ ການຄ້າ, ທັງເປັນລັດຖະມົນຕີເສດຖະກິດອາ ຊຽນ ຂອງ ສປປ ລາວ ແລະ ເປັນປະທານຮ່ວມຂອງທ່ານ ປີຢຸດ ໂກຢໍ ລັດຖະມົນຕີ ກະຊວງການຄ້າ ແລະ ອຸດສາຫະກໍາ ຂອງອິນ ເດຍ, ມີບັນດາທ່ານລັດຖະມົນຕີເສດຖະກິດອາຊຽນ, ທ່ານເລຂາທິການໃຫຍ່ອາຊຽນ, ທ່ານລັດຖະມົນຕີກະຊວງການຄ້າ ແລະ ອຸດສາຫະກໍາ ຈາກປະເທດຕີມໍເລດສເຕ ແລະ ບັນດາຜູ້ ແທນທີ່ເຂົ້າຮ່ວມກອງປະຊຸມທັງໝົດ ເຂົ້າສູ່ກອງປະຊຸມປຶກສາ ຫາລື ລະຫວ່າງ ລັດຖະມົນຕີເສດຖະກິດອາຊຽນ ແລະ ອິນເດຍ ຄັ້ງທີ 21.
ທ່ານ ມະໄລທອງ ກົມມະສິດ ລັດຖະມົນຕີກະຊວງ ອຸດສາ ຫະກໍາ ແລະ ການຄ້າ, ທັງເປັນລັດຖະມົນຕີເສດຖະກິດອາຊຽນ ຂອງ ສປປ ລາວ ໃຫ້ຮູ້ວ່າ: ອາຊຽນ ແລະ ອິນເດຍ ເປັນຄູ່ຮ່ວມມືທາງດ້ານເສດຖະກິດທີ່ຍາວນານ ແລະ ມີການເຊື່ອມໂຍງທາງການຄ້າ ແລະ ການລົງທຶນທີ່ເຂັ້ມແຂງ. ໃນປີ 2023, ການຄ້າດ້ານສິນ ຄ້າ ລະຫວ່າງ ອາຊຽນ ແລະ ອິນເດຍ ມີມູນຄ່າ 100,7 ຕື້ໂດລາສະຫະລັດ, ກວມເອົາ 2.9% ຂອງມູນຄ່າການຄ້າທັງໝົດຂອງອາຊຽນ, ເຮັດໃຫ້ ອິນເດຍ ເປັນຄູ່ຄ້າອັນດັບທີ 12 ຂອງອາ ຊຽນ.
ມູນຄ່າການລົງທຶນໂດຍກົງ (FDI) ຂອງນັກລົງທຶນຈາກອິນ ເດຍຢູ່ບັນດາປະເທດສະມາຊິກອາຊຽນ ມີປະມານ 5,6 ຕື້ໂດລາສະຫະລັດ, ກວມເອົາ 2.5% ຂອງມູນຄ່າການລົງທຶນໂດຍກົງຈາກຕ່າງປະເທດ ຢູ່ໃນອາຊຽນ ໃນປີ 2023, ເຮັດໃຫ້ອິນເດຍ ເປັນອັນດັບທີ 10 ຂອງບັນດາປະເທດທີ່ມີມູນຄ່າການລົງທຶນຫຼາຍຢູ່ໃນອາຊຽນ.
ທ່ານຍັງສະແດງຄວາມຫວັງຢ່າງວ່າ ການເຊື່ອມໂຍງດ້ານການຄ້າ ແລະ ການລົງທຶນຂອງອາຊຽນ-ອິນເດຍຈະຍິ່ງແໜ້ນແຟ້ນຂຶ້ນຕື່ມ ພາຍຫຼັງທີ່ພວກເຮົາ ສໍາເລັດການເຈລະຈາປັບປຸງເນື້ອໃນສັນຍາ ແລະ ຮ່ວມກັນຈັດຕັ້ງປະຕິບັດສັນຍາການຄ້າເສລີສະບັບປັບປຸງ ລະຫວ່າງສອງພາກພື້ນຢ່າງມີປະສິດທິຜົນ.
ປີຜ່ານມາ ສອງຝ່າຍໄດ້ມີການປຶກສາຫາລື ໃນຫຼາຍບັນຫາທີ່ຕິດພັນກັບການຮ່ວມມື ລະຫວ່າງ ອາຊຽນ ແລະ ອິນເດຍ ເຊິ່ງໃນນັ້ນ ພວກເຮົາໄດ້ປຶກສາຫາລືການຮ່ວມມື ລະຫວ່າງສອງພາກ ພື້ນ ເພື່ອຫຼຸດຜ່ອນຜົນກະທົບຂອງບັນດາສິ່ງທ້າທາຍຈາກສາກົນ. ພວກເຮົາ ຍັງໄດ້ແລກປ່ຽນທັດສະນະ ກ່ຽວກັບ ການພັດທະນາເສດຖະກິດແບບຍືນຍົງ, ການນໍາໃຊ້ເຕັກໂນໂລຊີເຂົ້າໃນວຽກງານການຄ້າ ແລະ ການລົງທຶນ ແລະ ການສ້າງຄວາມເຂັ້ມ ແຂງແກ່ຕ່ອງໂສ້ການສະໜອງ. ພ້ອມກັນນັ້ນ, ພວກເຮົາ ຍັງໄດ້ຊົມເຊີຍຄວາມຄືບໜ້າຂອງການທົບທວນສັນຍາການຄ້າເສລີອາຊຽນ-ອິນເດຍ ແລະ ຮັບຮອງເອົາພາລະບົດບາດ ຂອງຄະນະ ກໍາມະການຮ່ວມ, ແຜນວຽກຂອງການເຈລະຈາ ແລະ ໂຄງປະ ກອບຂອງການເຈລະຈາ ພາຍໃຕ້ສັນຍາການຄ້າເສລີອາຊຽນ- ອິນເດຍ.
ກອງປະຊຸມຄັ້ງນີ້ ໄດ້ເນັ້ນໃສ່ປຶກສາຫາລືກ່ຽວກັບບັນດາຂໍ້ ສະເໜີຂອງສະພາທຸລະກິດອາຊຽນ-ອິນເດຍ, ທົບທວນຄືນຄວາມຄືບໜ້າຂອງການເຈລະຈາທົບທວນຄືນສັນຍາການຄ້າເສລີອາຊຽນ-ອິນເດຍ ແລະ ຮັບຟັງການລາຍງານ ກ່ຽວກັບ ການ ກະກຽມກອງປະຊຸມສຸດຍອດ ອາຊຽນ-ອິນເດຍ ຄັ້ງທີ 21.
