ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ອຸຍນິເຊບ ສືບຕໍ່ຊ່ວຍເຫລືອວຽກງານ ແມ່ ແລະ ເດັກ ມູນຄ່າ 7 ລ້ານກ່ວາໂດລາ

ໃນ​ວັນ​ທີ 17 ມີນາ 2017 ທີ່​ກະຊວງ​ສາທາລະນະ​ສຸກ ​ໄດ້ຈັດ​​ພິທີ​ເຊັນ​ສັນຍາ ຊ່ວຍ​ເຫລືອ​ປະຈຳ​ປີ 2017-2018 ມູນ​ຄ່າ 7,200,000 ​ໂດ​ລາ​ສະຫະລັດ ລະຫວ່າງ ​ກະຊວງ​ສາທາລະນະ​ສຸກ ​ແລະ ອົງການ​ອຸຍນິ​ເຊບ ປະຈຳ ສປປ ລາວ, ​ໃຫ້​ກຽດ​ລົງ​ນາມ​ໃນ​ຄັ້ງ​ນີ້ ​ໂດຍ​ທ່ານ ຮສ.ດຣ ບຸນ​ກອງ​ ສີ​ຫາ​ວົງ ລັດຖະມົນຕີ ​ກະຊວງ​ສາທາ​ລະ​ສຸກ ​ແລະ ທ່ານ ນາງ ຫົງ​ເວ ກາວ ຜູ້​ຕາງ​ຫນ້າ​ອົງການອຸຍນິ​ເຊບ ປະຈຳ ສປປ ລາວ ພ້ອມ​ດ້ວຍ​ພາກສ່ວນ​ກ່ຽວຂ້ອງ​ ເຂົ້າ​ຮ່ວມ.

 

​ໃນ​ໂອກາດ​ນີ້, ທ່ານ ຮສ.ດຣ ບຸນ​ກອງ ສີ​ຫາ​ວົງ ​ໄດ້​ກ່າວ​ວ່າ: ​​​ແຜນ​ການຮ່ວມ​ມື​ ປະຈຳ​ປີ 2017-2018 ​ເພື່ອ​ຮັບປະກັນ​ ການ​ໃຫ້ການ​ບໍ​ລິການ​ເຊື່ອມ​ສານ​ ຂອງ​ວຽກ​ງານ​ສຸຂະພາບ ​ແມ່ ​ແລະ ​ເດັກ, ການ​ສັກ​ຢາ​ກັນ​ພະຍາດ ​ແລະ ການ​ບໍລິການ ​ດ້ານ​ໂພຊະ​ນາ​ການ ​ໃຫ້​ແກ່​ປະຊາຊົນ​ ທີ່​ມີ​ຄວາມ​ສ່ຽງ​ສູງ ​ແລະ ຜູ້​ທຸກ​ຍາກ​ຂາດ​ເຂີນ ​​ໃນ​ຊຸມ​ຊົນ ​ແລະ ສຸກສາລາ​ເປົ້າໝາຍ, ຮັບປະກັນ ​ໄດ້​ໃນ​ການ​ຮັກສາ ​ແລະ ການ​ປິ່ນ​ປົວ​ການ​ເຈັບ​ເປັນ​ ທົ່ວ​ໄປ​ຂອງ​ເດັກ. ນອກ​ນັ້ນ ຍັງ​ສະໜັບສະໜູນ ​ເຖິງ​ການຈັດ​ຕັ້ງ​ປະຕິບັດ​ ວຽກ​ງານ​ມາດ​ຕະການ ດ້ານ​ໂພຊະ​ນາ​ການ ລວມ​ໄປ​ເຖິງ​ການ​ລ້ຽງ​ດູ​ເດັກ​ອ່ອນ ​ແລະ ​ເດັກນ້ອຍ ​ໂດຍ​ຜ່ານ​ການ ໃຫ້ການ​ບໍລິການ​ຊຸມ​ຊົນ.

 

ທ່ານ ທ່ານ ຮສ.ດຣ ບຸນ​ກອງ ສີ​ຫາ​ວົງ ຍັງ​ກ່າວ​ຕື່ມ​ອື​ກວ່າ: ​ແຜນການ​ດັ່ງກ່າວ ​ຍັງ​ເປັນ​ການ​ປະກອບສ່ວນ ​ເພື່ອ​ບັນລຸ​ເປົ້າ​ໝາ​ຍ ການ​ພັດທະນາ​ແບບ​ຍືນ​ຍົງ ​ໂດຍ​ສະ​ເພາະ ​ວຽກ​ງານ​ສົ່ງ​ເສີມ ສຸຂະພາບ​ແມ່ ​ແລ​ະ ​ເດັກ ​ແບບ​ເຊື່ອມ​ສານ ​ໄດ້​ຮັບ​ການ​ປັບປຸງ​ດີ​ຂຶ້ນ, ວຽກ​ງານ​ໂພຊະນາການນ້ຳ ​ແລະ ສຸຂະ​ອະນາ​ໄມ ​ເຮັດ​ໃຫ້​ປະຊາຊົນ​ ມີ​ຄວາມ​ພໍ​ໃຈ ທີ່​ໄດ້​ຮັບ​ການ​ບໍລິການ ​ສຸຂະພາບ​ ​ແລະ​ ນໍ້າສະອາດ ​ແລະ ສຸຂາພິບານ ​ທີ່​ມີ​ຄຸນ​ນະພາ​ບ.

 

ພ້ອມ​ດຽວ​ກັນ​ນັ້ນ, ທ່ານ ນາງ ຫົງ​ເວ ກາວ ກໍ​ໄດ້​ສະ​ແດງ​ຄວາມ​ຊົ​ມ​ເຊີຍ ຕໍ່​ການຈັດ​ຕັ້ງ​ປະຕິບັດ​ກິດຈະກຳ​ຕ່າງໆ ກ່ຽວກັບ​ວຽກ​ງານ​ສົ່ງ​ເສີມ ​ສຸຂະພາບ​ແມ່, ​ເດັກ​ເກີດ​ໃໝ່ ​ແລະ ​ເດັກນ້ອຍ ​ເຫັນ​ວ່າ​ໄດ້​ຮັບ​ການ​ປັບປຸງ ​ຢ່າງ​ແຂງ​ແຮງ ​ແລະ ມີ​ໝາກຜົນ​ເປັນ​ກ້າວໆ​ ໃນ​ປີ​ທີ່​ຜ່ານ​ມາ ​ໂດຍ​ຜ່ານ​ການ​ຊ່ວຍ​ເຫລືອ ແລະ ຮ່ວມ​ມື​ ຂອງ​ອົງການ​ຢູນີ​ເຊບ ​ໂດຍ​ການ​ປະສານ​ສົມທົບ ​ກັບ​ຄູ່​ຮ່ວມ​ງານ​ອື່ນໆ ທີ່​ກ່ຽວຂ້ອງ ​ເພື່ອ​ເປັນ​ການ​ປະກອບສ່ວນ​ ເຂົ້າ​ໃນ​ການ​ບັນລຸ​​ເປົ້າ​ໝາຍ ​ການ​ພັດທະນາ​ແບບ​ຍຶນຍົງ​ ຂອງ​ລັດຖະບານ​​ ໃນ​ປີ 2030.

ຂ່າວ:ຂປລ