ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກະຊວງອຸດສາຫະກຳ ແລະ ການຄ້າ ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ໃນຂະແໜງອຸດສາຫະກໍາ ແລະ ການຄ້າ ໃນວັນທີ 4 ເມສາ 2024 ທີ່ນະຄອນຫລວງວຽງຈັນ ພາຍໃຕ້ການເປັນປະທານຂອງ ທ່ານ ມະໄລທອງ ກົມມະສິດ, ກໍາມະການສໍາຮອງສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງອຸດສາຫະກໍາ ແລະ ການຄ້າ ໂດຍມີ ຄະນະປະຈຳພັກ, ຄະນະບໍລິຫານງານພັກກະຊວງ, ຜູ້ຕາງໜ້າຈາກຂະແໜງການ, ພະແນກອຸດສາຫະກຳ ແລະ ການຄ້າແຂວງ- ນະຄອນຫລວງ, ຜູ້ຕາງໜ້າຈາກສະພາແຫ່ງຊາດ, ສະຖາບັນການສຶກສາ, ສະຖາບັນຄົ້ນຄວ້າ, ສະພາການຄ້າ ແລະ ອຸດສາຫະກຳແຫ່ງຊາດ ເຂົ້າຮ່ວມ.
ອີງຕາມບົດລາຍງານຕໍ່ກອງປະຊຸມຄັ້ງນີ້ ໄດ້ຍົກໃຫ້ເຫັນວ່າ: ຜ່ານການຈັດຕັ້ງປະຕິບັດຕາມ 5 ແຜນງານ, 39 ຄາດໝາຍ ແລະ 38 ຕົວຊີ້ວັດຂອງແຜນພັດທະນາອຸດສາຫະກຳປຸງແຕ່ງ ແລະ ການຄ້າ 5 ປີ 2021-2025 ໄດ້ປະກອບສ່ວນທີ່ສຳຄັນເຂົ້າໃນຜົນສຳເລັດລວມຂອງການປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ແຜນພັດທະນາເສດຖະກິດສັງຄົມແຫ່ງຊາດ ຄັ້ງທີ IX ເປັນຕົ້ນ ໄດ້ເຮັດໃຫ້ອັດຕາສ່ວນຂອງມູນຄ່າສົ່ງອອກສິນຄ້າອຸດສາຫະກຳປຸງແຕ່ງ ຈາກ 32,76% ໃນປີ 2021, 36,30% ໃນປີ 2022 ແລະ ເພີ່ມຂຶ້ນເປັນ 37,88% ໃນປີ 2023 ເຮັດໃຫ້ຂະແໜງອຸດສາຫະກຳປຸງແຕ່ງ ແລະ ການຄ້າ ປະກອບສ່ວນເຮັດໃຫ້ໂຄງສ້າງ GDP ເພີ່ມຂຶ້ນຈາກ 19,83% ໃນປີ 2021, 20,58% ໃນປີ 2022 ແລະ ເພີ່ມຂຶ້ນ 21,62% ໃນປີ 2023.
ມູນຄ່າການຜະລິດອຸດສາຫະກຳປຸງແຕ່ງ ບັນລຸ 32,067,23 ຕື້ກີບ ເທົ່າກັບ 38,6% ຂອງແຜນການ ຖ້າທຽບໃສ່ໄລຍະດຽວກັນແມ່ນເພີ່ມຂຶ້ນ 19,29% ໃນນັ້ນ, ອັດຕາສ່ວນຂອງໂຄງປະກອບລວມຍອດມູນຄ່າການຜະລິດອຸດສາຫະກຳປຸງແຕ່ງທີ່ສຳຄັນປະກອບມີ: ການຜະລິດສະບຽງອາຫານ ກວມເອົາ 24,01%, ການຜະລິດເຄື່ອງດື່ມ 16,75%, ການຜະລິດເຄື່ອງນຸ່ງຫົ່ມ 12,21%, ການຜະລິດເຈັ້ຍ ແລະ ຜະລິດຕະພັນເຈັ້ຍ 9,43%, ການຜະລິດເຄື່ອງໃຊ້ໄຟຟ້າ ແລະ ເຄື່ອງເອເລັກໂຕຼນິກ 6,24%, ການຜະລິດແຮ່ທາດອື່ນໆທີ່ບໍ່ແມ່ນໂລຫະ 5,76%, ການຜະລິດຢາງ ແລະ ຜະລິດຕະພັນຢາງພລາສຕິກ 4,21%.
ອຸດສາຫະກຳປຸງແຕ່ງທີ່ເກີດຂຶ້ນໃໝ່ ແລະ ຂະຫຍາຍຕົວປະກອບມີ : ອຸດສາຫະກຳເຄມີ ( ປຸບກາລີ, ໂບຼມມິນ, ໂສດາໄຟ ), ກັ່ນນໍ້າມັນ, ແປ້ງມັນຕົ້ນ, ຫົວອາຫານສັດ, ຊີລີຄອນ, ທໍ່ຢາງ ແລະ ອື່ນໆ ເຊິ່ງຕະຫຼາດສົ່ງອອກສິນຄ້າອຸດສາຫະກຳປຸງແຕ່ງກວມຫຼາຍກ່ວາ 70% ປະກອບມີ ຫວຽດນາມ, ໄທ, ຈີນ, ອົດສະຕາລີ, ກຳປູເຈຍ, ຍີ່ປຸ່ນ ແລະ ສ. ເກົາຫຼີ ເຊິ່ງປະຈຸບັນທົ່ວປະເທດມີໂຮງງານອຸດສາຫະກຳປຸງແຕ່ງທັງໝົດ 25,708 ແຫ່ງ ຂະຫຍາຍຕົວ 4,7% ຕໍ່ປີ ສາມາດຈ້າງງານໄດ້ 159,332 ຄົນ.
ປັດຈຸບັນ ຕະຫຼາດສົ່ງອອກໄດ້ສືບຕໍ່ເປີດກ້ວາງ ແລະ ຂະຫຍາຍຕົວອອກ ໃນນັ້ນ ມີຄູ່ຄ້າຕົ້ນຕໍ 5 ປະເທດ ດ້ານການສົ່ງອອກ ໄດ້ແກ່ : ປະເທດໄທ, ສປ ຈີນ, ສສ ຫວຽດນາມ,ອົດສະຕາລີ ແລະ ກຳປູເຈຍ ເຊິ່ງລວມຍອດມູນຄ່າການສົ່ງອອກໄປ 5 ປະເທດໃນປີ 2023 ບັນລຸ 7,362,667,006 ໂດລາສະຫະລັດ ກວມເອົາ 88% ຂອງຍອດມູນຄ່າການສົ່ງອອກທັງໝົດ; ໃນນີ້ ມູນຄ່າການສົ່ງອອກໄປປະເທດໄທ ກວມ 34,46%, ສປ ຈີນ 29,91%, ສສ ຫວຽດນາມ 16,62%. ເຊິ່ງສະແດງໃຫ້ເຫັນວ່າ ສປປ ລາວ ມີການເປີດກ້ວາງທາງດ້ານການຄ້າ ຕິດຕໍ່ຊື້ຂາຍກັບຕ່າງປະເທດນັບມື້ຫຼາຍຂຶ້ນ ແລະ ເຫັນໄດ້ວ່າ ຂະແໜງອຸດສາຫະກຳປຸງແຕ່ງ ແລະ ການຄ້າ ກໍ່ນັບມີື້ຂະຫຍາຍຕົວຢ່າງກ້ວາງຂວາງ.