ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ອຸດົມໄຊ ກຳນົດມາດຕະການຄຸ້ມຄອງເສດຖະກິດ ຮັບມືໄລຍະປ້ອງກັນ ແລະ ສະກັດກັ້ນ ພະຍາດໂຄວິດ-19

ໃນໄລຍະທີ່ເຊື້ອພະຍາດ ໂຄວິດ-19 ກຳລັງແຜ່ລະບາດຢູ່ໃນປະຈຸບັນນີ້, ຊຶ່ງໄດ້ສົ່ງຜົນກະທົບໃນຫຼາຍດ້ານ ໂດຍສະເພາະແມ່ນການຂະຫຍາຍຕົວທາງດ້ານເສດຖະກິດຂອງສປປລາວ ເວົ້າລວມ, ເວົ້າສະເພາະ ຕໍ່ເສດຖະກິດຂອງແຂວງອຸດົມໄຊ ດັ່ງນັ້ນ ແຂວງອຸດົມໄຊ ຈຶ່ງໄດ້ກໍານົດມາດຕະການໃນການເຄື່ອນໄຫວປ້ອງກັນ ແລະ ສະກັດກັ້ນ ພະຍາດຮ້າຍແຮງດັ່ງກ່າວ ຢ່າງເອົາຈິງເອົາຈັງ ແລະ ເຂັ້ມງວດ ໂດຍໄດ້ແຕ່ງຕັ້ງຄະນະສະເພາະກິດຂັ້ນແຂວງ ແລະ ຂັ້ນເມືອງຂຶ້ນ, ໃນນັ້ນ ຄະນະຮັບຜິດຊອບວຽກງານດ້ານເສດຖະກິດ ກໍ່ໄດ້ກຳນົດບາງມາດຕະການຂຶ້ນ ໂດຍມອບຫມາຍໃຫ້ຂະແໜງການກ່ຽວຂ້ອງ ຈັດຕັ້ງປະຕິບັດ ໂດຍສະເພາະແມ່ນ ພະແນກການເງິນ, ພະແນກອຸດສາຫະກຳ ແລະ ການຄ້າ, ພະແນກພະລັງງານ – ບໍ່ແຮ່, ພະແນກໂຍທາທິການ ແລະ ຂົນສົ່ງ, ພະແນກການຕ່າງປະເທດ ແລະ ພະແນກແຮງງານ ແລະ ສະຫວັດດີການສັງຄົມ, ທັງນີ້ ບົນພື້ນຖານການຈັດຕັ້ງປະຕິບັດຕາມຂໍ້ຕົກລົງຂອງທ່ານນາຍົກລັດຖະມົນຕີ ສະບັບເລກທີ 31/ນຍ ວ່າດ້ວຍການກຳນົດນະໂຍບາຍ ແລະ ມາດຕະການ ເພື່ອຫຼຸດຜ່ອນຜົນກະທົ ຕໍ່ເສດຖະກິດຂອງ ສປປລາວ.

ທ່ານ ອ່ອນແກ້ວ ອຸ່ນອາລົມ, ກໍາມະການອົງຄະນະພັກແຂວງ, ຫົວໜ້າພະແນກ ແຜນການ ແລະ ການລົງທຶນແຂວງອຸດົມໄຊ ທັງເປັນກຳມະການໃນຄະນະສະເພາະກິດທີ່ຮັບຜິດຊອບວຽກງານດ້ານເສດຖະກິດ ໄດ້ລາຍງານຢູ່ຫ້ອງການສະເພາະກິດເພື່ອການຕ້ານພະຍາດ ໂຄວິດ-19, ພະແນກສາທາລະນະສຸກ ແຂວງອຸດົມໄຊ ໃນວັນທີ 15 ເມສາ ຜ່ານມານີ້ວ່າ: ພາຍຫຼັງທີ່ໄດ້ຮັບແຕ່ງຕັ້ງເຂົ້າໃນຄະນະສະເພາະກິດຂອງແຂວງ ກ່ຽວກັບການຕ້ານພະຍາດໂຄວິດ-19, ທາງອານຸກຳມະການເສດຖະກິດ ກໍ່ໄດ້ປຶກສາຫາລື ແລະ ຈັດແບ່ງຄວາມຮັບຜິດຊອບໃຫ້ແຕ່ລະພາກສ່ວນ ລົງໄປຈັດຕັ້ງປະຕິບັດ ພ້ອມທັງຕິ ຕາມ, ກວດກາ ແລະ ຊຸກຍູ້ ຢ່າງເປັນປົກກະຕິ, ໂດຍສະເພາະ ກໍ່ແມ່ນ ການກະກຽມດ້ານງົບປະມານ, ການຄຸ້ມຄອງລາຄາສິນຄ້າ, ການຂົນສົ່ງສິນຄ້າ ແລະ ສະບຽງອາຫານ, ການຕິດຕາມຊ່ວຍເຫຼືອ ແລະ ອຳນວຍຄວາມສະດວກໃຫ້ ແຮງງານຕ່າງປະເທດ ທີ່ຍັງຄ້າງຢູ່ພາຍໃນແຂວງອຸດົມໄຊ, ລວມທັງການຮັບບໍລິຈາກເຄື່ອງອຸປະໂພກ-ບໍລິໂພກ, ແລະ ວັດຖຸປັດໃຈຕ່າງໆ ທັງຈາກພາຍໃນ ແລະ ຕ່າງປະເທດ. ທ່ານ ອ່ອນແກ້ວ ອຸ່ນອາລົມ ຫົວໜ້າພະແນກ ແຜນການ ແລະ ການລົງທຶນ ແຂວງອຸດົມໄຊ ຍັງໄດ້ຮຽກຮ້ອງມາຍັງທຸກພາກສ່ວນ ໃຫ້ເປັນເຈົ້າການນຳກັນ ໃນການຈັດຕັ້ງປະຕິບັດມາດຕະການ ປ້ອງກັນ ແລະ ສະກັດກັ້ນເຊື້ອພະຍາດ ໂຄວິດ- 19 ຂອງນາຍົກລັດຖະມົນຕີ, ລວມທັງ ຄໍາສັ່ງຂອງທ່ານເຈົ້າແຂວງອຸດົມໄຊ ແລະ ນິຕິກຳອື່ນໆ ຢ່າງເຂັ້ມງວດ ເພື່ອເຮັດແນວໃດໃຫ້ແຂວງອຸດົມໄຊ ປອດໄພຈາກເຊື້ອພະຍາດດັ່ງກ່າວຢ່າງແທ້ຈິງ.

 

ຂ່າວ: ຄານມະນີ ຮຽນດໍຈັນ