ສະຫະພັນແມ່ຍິງແຂວງອຸດົມໄຊ ຮ່ວມກັບ ພະແນກ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງ ແລະ ອົງການກາແດງ ແຂວງອຸດົມໄຊ ຈັດກິດຈະກຳ ສະເຫລີມ ສະຫລອງ ວັນສ້າງຕັ້ງ ສະຫະພັນແມ່ຍິງລາວ ຄົບຮອບ 69 ປີ ( 20 ກໍລະກົດ 1955-20 ກໍລະກົດ 224) ໃນວັນທີ 17 ກໍລະກົດ 2024 ທີ່ສະຫນາມກິລາຂອງແຂວງ ໂດຍການເຂົ້າຮ່ວມຂອງ ທ່ານ ນາງ ວັນທອງ ນິດສະດີ ປະທານສະຫະພັນແມ່ຍິງແຂວງ, ທ່ານ ເພັງ ສຸດາວອນ ຮອງຫົວຫນ້າພະແນກ ຖວທ ແຂວງ, ທ່ານ ທອງຈັນ ສຸກສັກດາ ຮອງຫົວຫນ້າອົງການກາແດງແຂວງ ພ້ອມດ້ວຍຄອບຄົວການນຳແຂວງ ແລະ ຕາງໜ້າຂະແໜງການອ້ອມຂ້າງແຂວງເຂົ້າຮ່ວມ.
ທ່ານ ນາງ ວັນທອງ ນິດສະດີ ກ່າວວ່າ: ການຈັດກິດຈະກໍາໃນຄັ້ງນີ້ ກໍເພື່ອເຮັດໃຫ້ການສະເຫລີມສະຫລອງ ວັນສ້າງຕັ້ງ ສະຫະພັນແມ່ຍິງລາວ ມີຄວາໝາຍ, ຄວາມສຳຄັນ ແລະ ເຕັມໄປດ້ວຍບັນຍາກາດ ອັນຟົດຟື້ນ ໂດຍກຳນົດຫລາຍກິດຈະກຳ ເປັນຕົ້ນ ການສ້າງຂະບວນການອອກແຮງງານລວມ, ການປາຖະກະຖາເລົ່າຄືນມູນເຊື້ອຂອງວັນແມ່ຍິງລາວ, ການບໍລິຈາກເລືອດ ຊ່ວຍເຫລືອສັງຄົມ ແລະ ການຟ້ອນລຳວົງລາວ 3 ຈັງຫວະ ຄື: ຈັງຫວະເຊີນຊວນ, ຈັງຫວະ ລໍາຕັ່ງຫວາຍ ແລະ ຈັງຫວະ ສາລະວັນ ເຊິ່ງໄດ້ກຳນົດເອົາຄູ່ຟ້ອນລຳວົງລາວ ໃນຄັ້ງນີ້ ຫລາຍກວ່າ 600 ຄູ່ ຫລື 1 ພັນກວ່າຄົນ.
ທ່ານ ເພັງ ສຸດາວອນ ໄດ້ກ່າວວ່າ: ການຈັດລຳວົງລາວ ໃນກິດຈະກຳ ສະເຫລີມ ສະຫລອງ ວັນສ້າງຕັ້ງ ສະຫະພັນແມ່ຍິງລາວ ຄົບຮອບ 69 ປີໃນຄັ້ງນີ້ ກໍເພື່ອເປັນການອະນຸລັກຮັກສາປະເພນີ ແລະ ວັດທະນະທຳອັນດີງາມຂອງຊາດລາວ ໂດຍສະເພາະ ທາງດ້ານສິລະປະວັນນະຄະດີ ໃຫ້ຍືນຍົງຄົງຕົວໄປຄ່ຽງຄູ່ກັບປະຊາຊົນຄົນລາວ ທຸກຮຸ່ນຄົນ ທັງນີ້ກໍເພື່ອເປັນການກະກຽມ ສະເໜີຕໍ່ອົງການ ອຸຍແນັສໂກ ເພື່ອພິຈາລະນາ ແລະ ຮັບຮອງເອົາ ລຳວົງລາວ ເປັນມໍລະດົກໂລກ ໃນຕໍ່ໜ້ານີ້.
ຂ່າວ: ຄານມະນີ ຮຽນດໍຈັນ
