ພິທີລົງນາມບົດບັນທຶກຊ່ວຍຈໍາ ລະຫວ່າງ ພະແນກກະສິກຳ ແລະ ປ່າໄມ້ ແຂວງອຸດົມໄຊ ສປປ ລາວ ກັບ ພະແນກກະສິກຳ ແລະ ພັດທະນາຊົນນະບົດ ແຂວງດຽນບຽນ ສສ ຫວຽດນາມ ໃນວັນທີ 10 ມິຖຸນາ 2024 ທີ່ຫ້ອງວ່າການ ແຂວງອຸດົມໄຊ. ຕາງ ໜ້າລົງນາມຄັ້ງນີ້ໂດຍ ທ່ານ ບຸນເກີດ ສະໜອງໄຊ ຮັກສາການ ຫົວໜ້າພະແນກະສິກຳ ແລະ ປ່າໄມ້ ແຂວງອຸດົມໄຊ ແລະ ທ່ານ ນາງ ຈຸຖິ້ ແທັງຊວັນ ຮອງຫົວໜ້າພະແນກກະສິກຳ ແລະ ພັດທະ ນາຊົນນະບົດ ແຂວງດຽນບຽນ.
ໃນພິທີສອງຝ່າຍໄດ້ລາຍງານໃຫ້ກັນຮັບຊາບຜົນສໍາເລັດການ ຮ່ວມມືໃນຂົງເຂດກະສິກຳໃນໄລຍະຜ່ານມາ ແລະ ສືບຕໍ່ການຮ່ວມມືຊ່ວຍເຫລືອດ້ານເຕັກນິກວິຊາການ, ແນວພັນ ໝາກແມັກຄາດາເມຍ (macadamia) ປີ 2024 ລວມມີບັນດາເນື້ອໃນໜ້າວຽກລະອຽດ ຄື: ຮ່ວມມືສາທິດ-ທົດລອງປູກຕົ້ນໝາກແມັກຄາດາເມຍ ປີ 2024 ເພື່ອປູກສາທິດທົດລອງຕົ້ນໝາກແມັກຄາດາເມຍ 5 ເຮັກຕາ ໂດຍ ພະແນກກະສິກຳ ແລະ ພັດທະນາຊົນນະ ບົດ ແຂວງດຽນບຽນ ຊ່ວຍເຫລືອແນວພັນ, ຝຸ່ນປຸ໋ຍ, ຢາປ້ອງ ກັນສັດຕູພືດ, ແນະນຳເຕັກນິກການປູກ ແລະ ບົວລະບັດຮັກສາ. ສ່ວນພະແນກກະສິກຳ ແລະ ປ່າໄມ້ ແຂວງອຸດົມໄຊ ມີຄວາມຮັບ ຜິດຊອບກະກຽມຄວາມພ້ອມບັນດາເງື່ອນໄຂທີ່ຈຳເປັນໃນການຈັດຕັ້ງປະຕິບັດການປູກ, ບົວລະບັດຮັກສາຕົ້ນໝາກແມັກຄາດາເມຍ ຕາມການແນະນຳດ້ານວິຊາການຂອງ ຂະແໜງການວິຊາການ ແຂວງດຽນບຽນ (ຄັດເລືອກສະຖານທີ່ປູກ, ຂຸດ, ກະກຽມຂຸມ, ປູກ, ບົວລະບັດຮັກສາ, ຄຸ້ມຄອງສວນປູກ) ການຈັດຕັ້ງປະຕິບັດ ສອງພະແນກ ເພີ່ມທະວີ, ເອົາໃຈໃສ່ ນຳພາ-ຊີ້ນຳບັນດາຂະແໜງ ການທີ່ຂຶ້ນກັບໃນການຈັດຕັ້ງປະຕິບັດບັນດາເນື້ອທີ່ໄດ້ລົງນາມຮ່ວມກັນໃຫ້ມີຜົນສຳເລັດ, ມີປະສິດທິພາບ ຄື: ພະແນກກະສິກຳ ແລະ ພັດທະນາຊົນນະບົດ ແຂວງດຽນບຽນ ເປັນເຈົ້າການ, ເຮັດ ໜ້າທີ່ປະສານງານກັບ ພະແນກກະສິກຳ ແລະ ປ່າໄມ້ ແຂວງອຸດົມ ໄຊ ເພື່ອຕິດຕາມ, ຕີລາຄາຜົນການຮ່ວມມືປູກສາທິດ-ທົດລອງ ຕົ້ນໝາກແມັກຄາດາເມຍ, ສັງລວມ, ລາຍງານ, ມີຄຳເຫັນ, ນຳສະ ເໜີຕໍ່ຂັ້ນເທິງທີ່ມີຄວາມຮັບຜິດຊອບກັບຂະບວນການຈັດຕັ້ງປະຕິບັດວຽກຮ່ວມມື.
ພ້ອມນີ້ ພະແນກກະສິກຳ ແລະ ປ່າໄມ້ ແຂວງອຸດົມໄຊ ເປັນເຈົ້າການ, ເຮັດໜ້າທີ່ປະສານງານກັບ ພະແນກກະສິກຳ ແລະ ພັດ ທະນາຊົນນະບົດ ແຂວງດຽນບຽນ ເພື່ອຕິດຕາມ, ຕີລາຄາຜົນການຮ່ວມມືປູກສາທິດ-ທົດລອງຕົ້ນໝາກແມັກຄາດາເມຍ, ສັງລວມ, ລາຍງານ, ມີຄຳເຫັນ, ນຳສະເໜີຕໍ່ຂັ້ນເທິງ ທີ່ມີຄວາມ ຮັບຜິດຊອບກັບຂະບວນການຈັດຕັ້ງປະຕິບັດວຽກຮ່ວມມື.
ໂອກາດດຽວກັນ, ຄະນະດັ່ງກ່າວ ຍັງໄດ້ລົງຕິດຕາມ ກວດກາ ພື້ນທີ່ປູກຕົ້ນໝາກແມັກຄາດາເມຍ ຢູ່ ສູນສົ່ງເສີມເຕັກນິກ ແລະ ຂະຫຍາຍແນວພັນ ກະສິກຳ-ປ່າໄມ້ ນ້ຳຫີນ ເມືອງໄຊ, ແຂວງອຸດົມໄຊຕື່ມອີກ.
ຂ່າວ: ຄຳພັນ
