ກົມແຂ່ງຂັນທາງທຸລະກິດ ແລະ ກວດກາການຄ້າ ກະຊວງອຸດສາຫະກຳ ແລະ ການຄ້າ ຮ່ວມກັບພະແນກອຸດສາຫະກຳ ແລະ ການຄ້າ ແຂວງອຸດົມໄຊ ທຳລາຍສິນຄ້າທີ່ລອກຮຽນແບບ-ປອມແປງ ແລະ ລະເມີດເຄື່ອງໝາຍການຄ້າ ໃນວັນທີ 01 ສິງຫາ 2024 ທີ່ເດີນກິລາແຂວງອຸດົມໄຊ ໂດຍການເຂົ້າຮ່ວມຂອງ ທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງໆອຸດົມໄຊ, ທ່ານ ພູວຽງ ພົງສາ ຫົວໜ້າກົມແຂ່ງຂັນທາງທຸລະກິດ ແລະ ກວດກາການຄ້າ ທັງເປັນຫົວໜ້າກອງເລຂາຄະນະກຳມະການຄວບຄຸມການແຂ່ງຂັນທາງທຸລະກິດ, ກະຊວງອຸດສາຫະກຳ ແລະ ການຄ້າ, ທ່ານ ນາງ ໄມພອນ ສີລິວົງ ຫົວໜ້າພະແນກອຸດສາຫະກຳ ແລະ ການຄ້າ ແຂວງອຸດົມໄຊ ພ້ອມດ້ວຍເຈົ້າໜ້າທີ່ ແລະ ພະນັກງານທີ່ກ່ຽວຂ້ອງເຂົ້າຮ່ວມ.
ພາຍຫລັງເຈົ້າໜ້າທີ່ການຄ້າ ກົມແຂ່ງຂັນທາງທຸລະກິດ ແລະ ກວດກາການຄ້າ ໄດ້ສົມທົບກັບເຈົ້າໜ້າທີ່ຕຳຫລວດ, ກົມຕຳຫລວດເສດຖະກິດ ກະຊວງປ້ອງກັນຄວາມສະຫງົບ, ພະແນກອຸດສາຫະກຳ ແລະ ການຄ້າ ແຂວງອຸດົມໄຊ ໄດ້ລົງກວດກາເປົ້າໝາຍຕາມແຫລ່ງຂ່າວ ແລະ ການສະເໜີຂອງຫົວໜ່ວຍທຸລະກິດ ທີ່ຖືກລະເມີດເຄື່ອງໝາຍການຄ້າ ແລະ ສິນຄ້າທີ່ບໍ່ໄດ້ຮັບອະນຸຍາດ ຈາກເຈົ້າຂອງເຄື່ອງໝາຍການຄ້າໃນໄລຍະຜ່ານມາ ສາມາດກວດກາເປົ້າໝາຍບໍລິສັດທີ່ໄດ້ລະເມີດ ພົບເຫັນສິນຄ້າລອກຮຽນແບບເຄື່ອງໝາຍການຄ້າ ມີ: ລົດຈັກຍີ່ຫໍ້ Loncin ທີ່ນໍາໃຊ້ສິ່ງຫຸ້ມຫໍ່ ແລະ ຊິ້ນສ່ວນລະເມີດເຄື່ອງໝາຍການຄ້າຂອງຍີ່ຫໍ້ ຮອນດ້າ Wave100s, Wave i, zoomer-x, MSX ໂດຍໃສ່ຊື່ອື່ນທີ່ບໍ່ກົງກັບສະບັບຕົ້ນຈຳນວນ 662 ຄັນ ແລະ ສະຕິກເກີ Wave 100s ຈຳນວນໜຶ່ງ ລວມມູນຄ່າທັງໝົດ 1,4 ຕື້ກວ່າກີບ.
ການທໍາລາຍສິນຄ້າໃນຄັ້ງນີ້ ແມ່ນທໍາລາຍສິ່ງຫຸ້ມຫໍ່ ແລະ ຊິ້ນສ່ວນທີ່ມີການລະເມີດເຄື່ອງໝາຍການຄ້າເທົ່ານັ້ນ ທັງນີ້ກໍເພື່ອເປັນການສົ່ງເສີມການແຂ່ງຂັນທາງທຸລະກິດ ໃຫ້ມີຄວາມເປັນທຳ, ຖືກຕ້ອງ, ໂປ່ງໃສ ແລະ ມີການແຂ່ງຂັນໄປຕາມກົນໄກຂອງເສດຖະກິດຕະຫລາດ, ສ້າງສະພາບແວດລ້ອມການດໍາເນີນທຸລະກິດ, ດຶງດູດການລົງທຶນທັງພາຍໃນ ແລະ ຕ່າງປະເທດ, ດ້ານພຶດຕິກໍາການແຂ່ງຂັນທາງທຸລະກິດທີ່ບໍ່ເປັນທຳ, ການຈໍາກັດການແຂ່ງຂັນທຸກຮູບການ ແລະ ເຮັດໃຫ້ສັງຄົມໄດ້ຮັບຊາບຜົນເສຍຫາຍຈາກສິນຄ້າ ທີ່ລະເມີດເຄື່ອງໝາຍການຄ້າ.
ຂ່າວ: ຄໍາພັນ ແກ້ວມະນີ
