ໃນທ້າຍອາທິດຜ່ານມາ, ແຂວງອຸດົມໄຊ ຈັດກອງປະຊຸມ ປຶກສາຫາລື ຜົນການລົງກວດກາ ແລະ ເກັບກຳຂໍ້ມູນທີ່ດິນປ່າໄມ້ 2 ໂຄງການພັດທະນາ ພະລັງງານແສງຕາເວັນ ຂອງບໍລິສັດ ຊີຈີເອັນ ເອເນີຈີເຕັກໂນໂລຊີ (ລາວ) ຈຳກັດ ແລະ ບໍລິສັດ ຈະເລີນຊັບ ໂປເຟສຊັນແນວເນັດເວີກ ຢູ່ແຂວງອຸດົມໄຊ ໂດຍການເປັນປະທານ ຂອງ ທ່ານ ບຸນຄົງ ຫລ້າຈຽມພອນ ເຈົ້າແຂວງໆອຸດົມ ໄຊ ພ້ອມດ້ວຍພະແນກການຂັ້ນແຂວງ ແລະ ຜູ້ພັດທະນາໂຄງການທີ່ກ່ຽວຂ້ອງເຂົ້າຮ່ວມ.
ທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງໆອຸດົມໄຊ ໄດ້ລາຍງານວ່າ: ຜົນການລົງກວດກາ ແລະ ເກັບກຳຂໍ້ມູນທີ່ດິນປ່າໄມ້ ນອນໃນເຂດພັດທະນາ ໂຄງການພະລັງງານແສງຕາເວັນ ຂອງບໍລິສັດ ຊີຈີເອັນ ເອເນີຈີເຕັກໂນໂລຊີ (ລາວ) ຈຳກັດ ພື້ນທີ່ລົງສຶກສາ ແລະ ສຳຫລວດຄວາມເປັນໄປໄດ້ ໃນການພັດທະນາ ໂຄງການເບື້ອງຕົ້ນ ມີທັງໝົດ 3.637,54 ເຮັກຕາ, ຊຶ່ງຜ່ານການສຳຫລວດ, ເກັບກຳຂໍ້ມູນຜົນກະທົບ ແລະ ການອອກແບບໂຄງການ ແມ່ນມີເປົ້າໝາຍພັດທະນາຕົວຈິງ ຈຳນວນ 2.132,78 ເຮັກຕາ ກວມເອົາ 7 ບ້ານຂອງເມືອງໄຊ ແລະ ເມືອງນາໝໍ້, ສາມາດແຍກແຕ່ລະປະເພດທີ່ດິນ ຄື: ທີ່ດິນກະສິກຳ ລວມມີເນື້ອທີ່ທັງໝົດ 1.680,81 ເຮັກຕາ ເທົ່າກັບ 78,80% ຂອງເນື້ອທີ່ໂຄງການ, ທີ່ດິນປ່າໄມ້ (ປ່າສະຫງວນບ້ານ, ປ່າປ້ອງກັນບ້ານ ແລະ ປ່າຊົມໃຊ້ບ້ານ) ລວມມີເນື້ອທີ່ 451,97 ເຮັກຕາ ເທົ່າກັບ 21,2% ຂອງເນື້ອທີ່ໂຄງການທັງໝົດ ໃນນີ້, ທີ່ດິນປ່າໄມ້ (ຍັງບໍ່ມີການບຸກລຸກ) ມີເນື້ອທີ່ 43,35 ເຮັກຕາ, ປະຊາຊົນເຂົ້າໄປທຳການຜະລິດ ມີເນື້ອທີ 408,62 ເຮັກຕາ ໃນນີ້, ດິນສວນ 404,71 ເຮັກຕາ; ດິນນາ 3,91 ເຮັກຕາ, ມີເອກະສານຢັ້ງຢືນສິດນໍາໃຊ້ທີ່ດິນ (ໃບແຈ້ງ 01) 139 ຕອນ, ມີເອກະສານຢັ້ງຢືນສິດກ່ອນການຈັດສັນ 125 ຕອນ, ຫລັງການຈັດສັນ 14 ຕອນ ແລະ ບໍ່ມີເອກະສານຢັ້ງຢືນສິດນໍາໃຊ້ທີ່ດິນ 118 ຕອນ, ປະຊາຊົນເຂົ້າໄປທຳການຜະລິດກ່ອນການຈັດສັນທີ່ດິນ 164 ຕອນ ແລະ ຫລັງການຈັດສັນ 93 ຕອນ.
ສຳລັບໂຄງການພະລັງງານແສງຕາເວັນຂອງ ບໍລິສັດ ຈະເລີນຊັບ ໂປເຟສຊັນແນວ ເນັດເວີກ ກວມເອົາ 2 ບ້ານ ຂອງ ເມືອງນາໝໍ້ ຄື: ບ້ານວັງອ່າງ ແລະ ບ້ານນໍ້າຕອງ, ມີເນື້ອທີ່ເປົ້າໝາຍການພັດທະນາຂອງໂຄງການ ທັງໝົດ 1.483,12 ເຮັກຕາ, ຊຶ່ງສາມາດແຍກແຕ່ລະປະເພດທີ່ດິນ ຄື: ທີ່ດິນກະສິກຳ 980,21 ເຮັກຕາ ເທົ່າກັບ 66% ຂອງເນື້ອທີ່ໂຄງການ, ທີ່ດິນປ່າໄມ້ (ປ່າສະຫງວນຂອງບ້ານ) 502,91 ເຮັກຕາ ເທົ່າກັບ 34% ຂອງເນື້ອທີ່ໂຄງການທັງໝົດ ໃນນີ້, ທີ່ດິນປ່າໄມ້ (ຍັງບໍ່ມີການບຸກລຸກ) 159,08 ເຮັກຕາ, ທີ່ດິນປ່າໄມ້ ທີ່ປະຊາຊົນເຂົ້າໄປທຳການຜະລິດ 343,83 ເຮັກຕາ ໃນນີ້, ມີດິນສວນ 343,76 ເຮັກຕາ, ດິນນາ 0,07 ເຮັກຕາ, ມີເອກະສານຢັ້ງຢືນສິດໃຊ້ທີ່ດິນ (ໃບແຈ້ງ 01) 14 ຕອນ ທີ່ເປັນເອກະສານຢັ້ງຢືນສິດກ່ອນການຈັດສັນ ແລະ ຫລັງການຈັດສັນ (ບໍ່ມີ), ບໍ່ມີເອກະສານຢັ້ງຢືນສິດໃຊ້ທີ່ດິນ 193 ຕອນ, ປະຊາຊົນເຂົ້າໄປທຳການຜະລິດ ກ່ອນການຈັດສັນທີ່ດິນ 149 ຕອນ ແລະ ຫລັງການຈັດສັນ 58 ຕອນ.
ຜ່ານການລົງກວດກາທີ່ດິນປ່າໄມ້ຕົວຈິງຂອງ 2 ໂຄງການດັ່ງກ່າວ ເຫັນວ່າ ການນໍາໃຊ້ຖານຂໍ້ມູນ ໂດຍອີງຕາມແຜນຈັດສັນທີ່ດິນຈຸລະພາກຂັ້ນບ້ານ ແລະ ການແບ່ງດິນ-ແບ່ງປ່າ ແມ່ນຖືກຕ້ອງ ແລະ ໃກ້ຄ່ຽງທີ່ສຸດກັບການຄຸ້ມຄອງ ແລະ ນຳໃຊ້ທີ່ດິນຕົວຈິງຂອງປະຊາຊົນ ເພາະເປັນຖານຂໍ້ມູນທີ່ໄດ້ຈາກການລົງສຳຫລວດ, ເກັບກຳຕົວຈິງ ແລະ ມີການຢັ້ງຢືນຮັບຮູ້ຂອງອົງການປົກຄອງຂັ້ນບ້ານ.
ຂ່າວ: ຄໍາພັນ ແກ້ວມະນີ
