ວັນທີ 12 ກໍລະກົດນີ້ ເມືອງອຸທຸມພອນແຂວງ ສະຫວັນນະເຂດ ຈັດກິດຈະກໍາຍ່າງເພື່ອສຸຂະພາບຂຶ້ນຢ່າງຍິ່ງໃຫຍ່ ເພື່ອສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ, ວັນສ້າງຕັ້ງກິລາລາວ, ວັນປ່ອຍປາ ແລະ ອານຸລັກສັດນໍ້າ-ສັດປ່າ, ໂດຍມີ ທ່ານ ທອງໃສ ໄຊຍະວົງຄໍາດີ ເຈົ້າເມືອງອຸທຸມພອນ, ມີບັນດາພະນັກງານ, ທະຫານ, ຕໍາຫຼວດ ແລະ ພາກສ່ວນຕ່າງໆພາຍໃນເຂົ້າຮ່ວມ.
ທ່ານ ນາງ ເພັງສະຫວັດ ແກ້ວຫາວົງ ປະທານສະຫະພັນແມ່ຍິງເມືອງ ກ່າວໃນງານວ່າ: ພາຍຫຼັງທີ່ພັກປະຊາຊົນ ປະຕິວັດລາວ ໄດ້ຮັບການສ້າງຕັ້ງຂຶ້ນ ພັກກໍໄດ້ເອົາໃຈໃສ່ຢ່າງຈົດຈໍ່ຕໍ່ການປຸກລະດົມຂົນຂວາຍ ກໍ່ສ້າງແມ່ຍິງໃຫ້ມີຄວາມຕື່ນຕົວປະກອບສ່ວນໃນພາລະກິດປະຕິວັດ ແລະ ຖືແມ່ຍິງເປັນພາກສ່ວນໜຶ່ງໃນກໍາລັງແຮງທີ່ສໍາຂອງພັກ ແລະ ໄດ້ຮັບຜົນສະທ້ອນຈາກຂະບວນການຕໍ່ສູ້ປະຕິວັດຂອງແມ່ຍິງໃນທົ່ວໂລກ ທີ່ເລັ່ງທວງໃຫ້ປະຕິບັດສິດເສລີພາບ, ຄວາມສະເໝີພາບລະຫວ່າງຍິງ-ຊາຍ ທາງດ້ານການເມືອງ-ເສດຖະກິດ, ວັດທະນະທໍາ-ສັງຄົມ ເທື່ອລະກ້າວ, ມາຮອດວັນທີ 20 ກໍລະກົດ 1955 ພັກໄດ້ຈັດຕັ້ງໜ່ວຍຄົ້ນຄວ້າວຽກງານແມ່ຍິງຂຶ້ນຢ່າງເປັນທາງການ (ຊຶ່ງເປັນຕົ້ນກໍາເນີດຂອງອົງການຈັດຕັ້ງແມ່ຍິງລາວຈົນມາເຖິງປັດຈຸບັນ), ພ້ອມນີ້ຍັງຍົກໃຫ້ເຫັນວັນສ້າງຕັ້ງກິລາລາວ,ວັນປ່ອຍປາ ແລະ ອະນຸລັກສັດນໍ້າ-ສັດປ່າຕື່ມອີກ.
ຈາກນັ້ນ, ບັນດາທ່ານຈາກທຸກພາກສ່ວນພາຍໃນເມືອງທີ່ເຂົ້າຮ່ວມກິດຈະກໍາຄັ້ງນີ້ກໍໄດ້ຍ່າງເພື່ອສຸຂະພາບ, ໂດຍເລີ່ມແຕ່ເສັ້ນທາງເບຕົງເສີມເຫຼັກຂອງບ້ານໄຊສົມບູນ ລະຫວ່າງເສັ້ນທາງເລກທີ 13 ໃຕ້ (ຂ້າງຕະຫຼາດແລງ) ທາງຮ່ອມເຂົ້າໄປຫາໂຮງໝໍນ້ອຍຊຸມຊົນເມືອງອຸທຸມພອນ ແລ້ວກໍລ້ຽວຊ້າຍແວ່ລົງໄປກອງບັນຊາການທະຫານເມືອງ, ຫຼັງຈາກນັ້ນບັນດາທ່ານທີ່ເຂົ້າຮ່ວມຍັງໄດ້ພ້ອມກັນປ່ອຍປາທີ່ໜອງສະລວມຂອງກອງບັນຊາການທະຫານເມືອງຄືນສູ່ທໍາມະຊາດ ຊຶ່ງມີຈໍານວນ 450 ຖົງ ປະກອບມີ ປານິນ, ປາໃນ, ປາປາກ, ປາກິນຫຍ້າ ແລະ ປາເກັດແລບ.
(ຂ່າວ-ພາບ: ບຸນຊູ ພົມມະເທບ)
