ໃນວັນທີ 30 ພຶດສະພາ ນີ້, ອົງການກວດສອບແຫ່ງລັດ ໄດ້ຈັດກອງປະຊຸມ ສະຫຼຸບ-ຕີລາຄາ ການເຄື່ອນໄຫວວຽກງານກວດກາ ປະຈຳປີ 2023 ແລະ ທິດທາງແຜນການ ປະຈໍາປີ 2024, ພາຍໃຕ້ການເປັນປະທານ ຂອງສະຫາຍ ວຽງທະວີສອນ ເທບພະຈັນ ກຳມະການສໍາຮອງສູນກາງພັກ ເລຂາຄະນະບໍລິຫານງານພັກ ປະທານອົງການກວດສອບແຫ່ງລັດ ຊຶ່ງມີ ສະຫາຍຮອງເລຂາຄະນະບໍລິຫານງານພັກ ຄະນະປະຈຳ, ກຳມະການຄະນະບໍລິຫານງານພັກ, ບັນດາສະຫາຍເລຂາໜ່ວຍພັກ, ຄະນະກວດກາຂອງບັນດາໜ່ວຍພັກ ແລະ 3 ອົງການຈັດຕັ້ງມະຫາຊົນ ພ້ອມດ້ວຍພະນັກງານ-ລັດຖະກອນ ກ່ຽວຂ້ອງຂອງອົງການກວດສອບແຫ່ງລັດ ເຂົ້າຮ່ວມ. ກອງປະຊຸມໄດ້ຮັບຟັງສະຫາຍ ນາງ ສີຕານ ໄຊຍະວົງເພັດ ຮອງປະທານ ຄະນະກວດກາພັກ ກຳມະການຄະນະບໍລິຫານງານພັກ ຫົວໜ້າກົມກວດກາ ຜ່ານບົດສະຫຼຸບການ ເຄື່ອນໄຫວວຽກງານກວດກາ ປະຈຳ ປີ 2023 ແລະ ທິດທາງແຜນການ ປະຈໍາປີ 2024, ຈາກນັ້ນ ບັນດາໜ່ວຍພັກພ້ອມກັນຄົ້ນຄວ້າປະກອບຄໍາຄິດ-ຄໍາເຫັນຕໍ່ກັບການເຄື່ອນໄຫວວຽກງານຕິດຕາມ ກວດກາ ແລະ ພ້ອມນັ້ນ ສະຫາຍ ເຄນ ລໍວັນໄຊ ຮອງເລຂາຄະນະບໍລິຫານງານພັກ ປະທານຄະນະກວດກາພັກໄດ້ເຜີຍແຜ່ເອກະສານສໍາຄັນດັ່ງນີ້:
1. ຄໍາສັ່ງແນະນໍາ ຂອງຄະນະເລຂາທິການສູນກາງພັກ ກ່ຽວກັບເພີ່ມທະວີການນໍາພາ-ຊີ້ນໍາ ຕໍ່ ການເຄື່ອນໄຫວວຽກງານກວດກາ ແລະ ແກ້ໄຂຜົນການກວດກາ ສະບັບເລກທີ 169/ຄລສພ, ລົງວັນທີ 15 ສິງຫາ 2022;
2. ຄໍາແນະນໍາ ການຈັດຕັ້ງປະຕິບັດກົດໝາຍວ່າດ້ວຍກວດກາລັດ ສະບັບ ເລກທີ 331/ອກຫລ, ລົງວັນທີ 3 ຕຸລາ 2023;
3. ຄໍາແນະນໍາ ການກະກຽມ ແລະ ດໍາເນີນຊີວິດການເມືອງທ້າຍສະໄໝ ກອງປະຊຸມໃຫຍ່ 3 ຂັ້ນ ສະບັບເລກທີ 285/ຄລສພ, ລົງວັນທີ 15 ກັນຍາ 2023;
4. ຄໍາແນະນໍາ ກ່ຽວກັບການປັບປຸງການຈັດຕັ້ງຄະນະກວດກາພັກ ແລະ ອົງການກວດກາລັດແຕ່ລະຂັ້ນ ສະບັບເລກທີ 379/ຄລສພ, ລົງວັນທີ 7 ພະຈິກ 2023.
ຕອນທ້າຍ ສະຫາຍ ວຽງທະວີສອນ ເທບພະຈັນ ກໍໄດ້ມີຄຳເຫັນໂອ້ລົມ, ສະແດງຄວາມຍ້ອງຍໍຊົມເຊີຍຕໍ່ບັນດາ ສະຫາຍທີ່ໄດ້ພ້ອມກັນຄົ້ນຄ້ວາປະກອບຄໍາເຫັນຕໍ່ວຽກງານຕິດຕາມ-ກວດກາ ແລະ ເພື່ອເປັນທິດ ສືບຕໍ່ຈັດຕັ້ງປະຕິບັດແຜນນະໂຍບາຍຂອງພັກ-ລັດ ກ່ຽວກັບວຽກງານຕິດຕາມ, ກວດກາ, ສະກັດກັ້ນປະກົດການຫຍໍ້ທໍ້ຕ່າງໆ ຢູ່ໃນອົງການກວດສອບແຫ່ງລັດແຕ່ລະຂັ້ນ ໃຫ້ພ້ອມກັນໃຫ້ເອົາໃຈໃສ່ຕໍ່ວຽກງານກວດກາ, ຖືເອົາວຽກງານກວດກາເປັນໜ້າທີ່ ແລະ ຄວາມຮັບຜິດຊອບ ບໍ່ພຽງແຕ່ຄະນະກວດກາພັກ, ກົມກວດກາເທົ່ານັ້ນ ແຕ່ຍັງແມ່ນຄວາມຮັບຜິດຊອບຂອງອົງການຈັດຕັ້ງ ເບື້ອງພັກ-ລັດ, ອົງການຈັດຕັ້ງມະຫາຊົນແຕ່ລະຂັ້ນ ແລະ ສະມາຊິກພັກ, ພະນັກງານ-ລັດຖະກອນ ທັງໝົດຂອງອົງການກວດສອບແຫ່ງລັດ ພ້ອມກັນສືບຕໍ່ຄົ້ນຄວ້າ, ເຊື່ອມຊຶມກຳແໜ້ນ, ຜັນຂະຫຍາຍ ແລະ ຈັດຕັ້ງປະຕິບັດເນື້ອໃນມະຕິກອງປະຊຸມໃຫຍ່ຄັ້ງທີ XI ພັກ, ມະຕິກອງປະຊຸມ ກວດກາທົ່ວປະເທດແຕ່ລະປີ ແລະ ມະຕິກອງປະຊຸມໃຫ່ຍ ຄັ້ງທີ II ຂອງອົງຄະນະພັກ ອົງການກວດສອບແຫ່ງລັດ, ມະຕິ, ຄໍາສັ່ງ, ກົດລະບຽບຂອງພັກ, ກົດໝາຍ ແລະ ລະບຽບການຕ່າງໆ ເວົ້າລວມ ເວົ້າສະເພາະແມ່ນມະຕິຄໍາສັ່ງ ແລະ ນິຕິກຳກ່ຽວກັບວຽກງານຕິດຕາມ, ກວດກາ, ການສະກັດກັ້ນ ແລະ ຕ້ານການສໍ້ລາດບັງຫຼວງ ຢູ່ພາຍໃຕ້ການຈັດຕັ້ງຂອງຕົນຢ່າງມີຈຸດສຸມ ເພື່ອຈັດຕັ້ງປະຕິບັດວຽກງານໃຫ້ໄດ້ຮັບຜົນດີ, ເອົາໃຈໃສ່ໃນການປະຕິບັດພາລະບົດບາດ ໜ້າທີ່ວຽກງານຄະນະກວດກາພັກ, ກົມກວດກາຕາມທີ່ໄດ້ກຳນົດໄວ້ໃນກົດລະບຽບຂອງພັກ, ຂໍ້ກໍານົດວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກວດກາພັກ, ຂໍ້ຕົກລົງວ່າດ້ວຍການຈັດຕັ້ງການເຄື່ອນໄຫວຂອງກົມກວດກາ ອົງການກວດສອບແຫ່ງລັດ ເພື່ອເປັນເສນາທິການໃຫ້ອົງຄະນະພັກ, ຄະນະນໍາກ່ຽວກັບວຽກງານຕິດຕາມ, ກວດກາ, ການຈັດຕັ້ງພັກ, ການຈັດຕັ້ງ ເບື້ອງລັດ, ສະມາຊິກພັກ ພະນັກງານ-ລັດຖະກອນ ຂອງອົງການກວດສອບແຫ່ງລັດ ໃນການຈັດຕັ້ງແນວທາງແຜນນະໂຍບາຍ ມະຕິ, ຄໍາສັ່ງ, ກົດລະບຽບພັກ, ກົດໝາຍ ແລະ ລະບຽບການ ຂອງລັດ ເຮັດໃຫ້ການຈັດຕັ້ງພັກ-ລັດ ຂອງອົງການກວດສອບແຫ່ງລັດ, ມີຄວາມເຂັ້ມແຂງ, ໂປງໃສ່ ການເຄື່ອນໄຫວວຽກງານມີປະສິດທິພາບ, ປະສິດທິຜົນ ເຮັດໃຫ້ສະມາຊິກພັກ, ພະນັກງານ ລັດຖະກອນ ມີຄຸນທາດການເມືອງ, ມີຄຸນສົມບັດສິນທຳປະຕິວັດ, ເຄົາລົບນັບຖືການຈັດຕັ້ງ ມີລະບຽບວິໄນເຂັ້ມງວດ, ມີຈັນຍາບັນ, ມີຄວາມສັດຊື່ບໍລິສຸດ, ຫ້າວຫັນປະຕິບັດໜ້າທີ່ວຽກງານ ຂອງອົງການກວດສອບແຫ່ງລັດ.
ຂ່າວ-ພາບ: ອົງການກວດສອບແຫ່ງລັດ
