ວັນທີ 13 ສິງຫາ 2024 ນີ້ ທ່ານ ຄໍາລາວັນ ຈັນທະລາວັນ ປະທານອົງການກາແດງແຫ່ງຊາດລາວ ພ້ອມດ້ວຍຄະນະ ໄດ້ນໍາເອົາເຄື່ອງກອງນໍ້າໃຊ້ໃນຄົວເຮືອນ ຈໍານວນ 100 ຊຸດ ມອບໃຫ້ປະຊາຊົນ 2 ບ້ານ ຂອງເມືອງປາກທາ ແຂວງບໍ່ແກ້ວຄື: ບ້ານຫ້ວຍລໍາແພນ 91 ຊຸດ, ບ້ານຫ້ວຍໜໍ່ຂົມ 9 ຊຸດ ແລະໄຟໂຊລາເຊວ 5 ຊຸດ ມອບໃຫ້ທະຫານກອງຮ້ອຍຊາຍແດນ 125 ລວມມູນຄ່າທັງໝົດ 92 ລ້ານກວ່າກີບ (92.778.000 ກີບ) ພິທີໄດ້ຈັດຂຶ້ນທີ່ເດີ່ນໂຮງຮຽນປະຖົມບ້ານຫ້ວຍລໍາແພນ ໂດຍການເຂົ້າຮ່ວມຂອງທ່ານ ນາງ ຈັນສຸກ ວັນນະວົງ ຄະນະປະຈໍາພັກເມືອງ ຮອງເຈົ້າເມືອງປາກທາ, ທ່ານ ພັຕ ຄໍາເຮືອງ ມະນີລາ ຮອງຫົວໜ້າການທະຫານ ກອງຮ້ອຍຊາຍແດນ 125, ນາຍບ້າານທັງສອງບ້ານ ພ້ອມດ້ວຍພໍ່ແມ່ປະຊາຊົນ ແລະ ທີມງານອົງການກາແດງແຂວງບໍ່ແກ້ວເຂົ້າຮ່ວມ.
ທ່ານ ຄໍາລາວັນ ຈັນທະດາວັນ ໄດ້ມີຄໍາເຫັນ ໂອ້ລົມພໍ່ແມ່ປະຊາຊົນ ຊຶ່ງໄດ້ຖາມຂ່າວຊີວິດການເປັນຢູ່ດ້ວຍຄວາມເປັນຫ່ວງເປັນໃຍຂອງພັກ-ລັດຖະບານ ໂດຍສະເພາະ ກໍຄືອົງການກາແດງແຫ່ງຊາດລາວ ແລະ ດີໃຈທີ່ໄດ້ມາຢ້ຽມຢາມພໍ່ແມ່ປະຊາຊົນ ບ້ານຫ້ວຍລໍາແພນ ໃນຄັ້ງນີ້ ພ້ອມທັງຮຽກຮ້ອງມາຍັງພໍ່ແມ່ປະຊາຊົນ ຈົ່ງເອົາໃຈໃສ່ ຮັກສາສຸຂະພາບຂອງຕົນເອງໃຫ້ແຂງແຮງ, ກິນດື່ມໃຫ້ສະອາດແລະນໍາເອົາເຄື່ອງກອງນໍ້າທີ່ມອບໃຫ້ໃນຄັ້ງນີ້ ໄປນໍາໃຊ້ໃນຄົວເຮືອນໃຫ້ຖືກວິທີ ແລະ ໃຊ້ໄດ້ຍາວນານທີ່ສຸດ.
ຈາກນັ້ນ ກໍໄດ້ມອບ ໄຟໂຊລາເຊວໃຫ້ກອງຮ້ອຍຊາຍແດນ 125 ຕາງໜ້າຮັບໂດຍ ທ່ານ ພັຕ ຄໍາເຮືອງ ມານີລາ ພ້ອມທັງມອບເຄື່ອງກອງນໍ້າ ໃຫ້ປະຊາຊົນທັງ 2 ບ້ານ.
ຂ່າວ: ບຸນເພັງ ທຸມມະວົງ
