ລະຫວ່າງວັນທີ 3-4 ພະຈິກ 2022 ນີ້ ອົງການກາແດງແຫ່ງຊາດລາວ ແລະ ສະພາກາຊາດໄທ ຈັດກອງປະຊຸມ ຖອດຖອນບົດຮຽນ ແລະ ຕີລາຄາຄືນຜົນການຮ່ວມມືດ້ານວຽກງານມະນຸດສະທຳ ຄັ້ງທີ 3 ເຊິ່ງຄັ້ງທີ່1ຈັດຂຶ້ນທີ່ ໜອງຄາຍ ປະເທດໄທ ປີ 2016 , ຄັ້ງທີ2 ທີ່ນະຄອນຫຼວງວຽງຈັນ ໃນປີ 2018 ແລະ ປີນີ້ຈັດຂຶ້ນທີ່ນະຄອນພະນົມ ປະເທດໄທ ພາຍໃຕ້ການເປັນປະທານຮ່ວມຂອງທ່ານ ສຈ. ດຣ. ພູທອນ ເມືອງປາກ ປະທານອົງການກາແດງແຫ່ງຊາດລາວ, ທ່ານ ເຕດ ບຸນນາກ ເລຂາທິການ ສະພາກາຊາດໄທ, ທ່ານ ຊານໄຊ ຄົງທັນ ຮອງເຈົ້າແຂວງນະຄອນພະນົມ, ພ້ອມດ້ວຍຜູ້ແທນເຂົ້າຮ່ວມ ຈາກອົງການກາແດງແຫ່ງຊາດລາວ, ສະພາກາຊາດໄທ, ອົງການກາແດງແຂວງຂອງລາວ ແລະ ໄທ ທີ່ມີຊາຍແດນຕິດຈອດກັນຂອງສອງປະເທດ, ມີຜູ້ຕາງໜ້າຈາກຄະນະກຳມະການສາກົນ, ສະຫະພັນກາແດງ ແລະ ຊີກວົງເດືອນແດງສາກົນເຂົ້າຮ່ວມ.
ກອງປະຊຸມອົງການກາແດງແຫ່ງຊາດ ແລະສະພາກາຊາດໄທ ໄຂຂື້ນທຸກສອງປີ ໂດຍຜັດປຽ່ນກັນເປັນເຈົ້າພາບ ໂດຍກອງປະຊຸມຄັ້ງນີ້ ໄດ້ພ້ອມກັນຕີລາຄືນຜົນຂອງການຈັດຕັ້ງປະຕິບັດ ດ້ານໃນການຮ່ວມມືໃນໄລຍະຜ່ານມາ ໂດຍໄດ້ທົບທວນຄືນເນື້ອໃນຂອງບົດບັນທຶກຄວາມເຂົ້າໃຈ ສະບັບປີ 2018-2022 ທີ່ໄດ້ເຮັດໃຫ້ການຮ່ວມມືຂອງສອງຝ່າຍທີມີທັງຂໍ້ສະດວກແລະຂໍຫຍຸ້ງຍາກຍາກ ສິ່ງທ້າທາຍ, ໃນໄລຍະຜ່ານມາສະພາກາຊາດໄທໄດ້ໃຫ້ການສະໜັບສະໜູນອົງການກາແດງແຫ່ງຊາດລາວ ຫລາຍ ໂຄງການ ເປັນຕົ້ນແມ່ນ: ການຝຶກອົບຮົມບຸກຄະລາກອນ, ການສະໜັບສະໜູນແຫລ່ງທຶນ, ການຕອບໂຕ້ ໄພພິບັດ, ການຊ່ວຍເຫຼືອບັນເທົາ, ການແພດ, ສາທາລະນະສຸກ ແລະອື່ນໆໂດຍສະເພາະໃນປີ 2021 ຜ່ານມາໄດ້ໃຫ້ການຊ່ວຍເຫລືອສ້າງສາງເກັບເຄື່ອງ, ສະຖານທີ່ຈອດລົດບັນທຸກ, ເຮືອກູ້ໄພສຸກເສີນ, ຖົງໃສ່ເລືອດ ໃຫ້ແກ່ອົງການກາແດງແຫ່ງຊາດລາວ, ລວມມູນຄ່າທັງໝົດຫຼາຍກວ່າ 30 ລ້ານບາດ.
ກອງປະຊຸມຍັງໄດ້ປຶກສາຫາລືການຮ່ວມມື ເພື່ອເປັນກອບໃນຮ່າງສັນຍາທີ່ຈະສືບຕໍ່ຮ່ວມມືກັນໃນປີ 2023-2027,ທີ່ຈະຈັດຕັ້ງແຜນປະຕິບັດໃຫ້ປະກົດຜົນເປັນຈິງເປັນຕົ້ນແມ່ນວຽກງານຕອບໂຕ້ໄພພິບັດ ແລະ ການສົ່ງເສີມສຸຂະພາບ; ວຽກງານບໍລິຈາກເລືອດ, ວຽກງານຊອກຫາແຫຼ່ງທຶນ ແລະ ການສື່ສານ, ວຽກງານຊາວໜຸ່ມອາສາສະໝັກກາແດງ ເພື່ອສືບຕໍ່ເພີ່ມທະວີການຮ່ວມມືລະຫວ່າງສອງອົງການກາແດງ ແລະ ແຂວງທີ່ມີຊາຍແດນຕິດຈອດກັນ ໃນການຊ່ວຍເຊິ່ງແລະກັນໃຫ້ເກີດປະໂຫຍດແກ່ປະຊາຊົນ ຜູ້ດ້ອຍໂອກາດ ແລະ ປະສົບໄພພິບັດຕ່າງໆ.
