ວັນທີ 3 ຫາ 7 ກັນຍານີ້, ທ່ານໄຊສົມພອນ ພົມວິຫານ ປະທານສະພາແຫ່ງ ຊາດລາວພ້ອມດ້ວຍຄະນະໄດ້ເດີນທາງໄປຢ້ຽມຢາມ ສປ ຈີນຢ່າງເປັນທາງການ. ໃນໂອກາດນີ້, ທ່ານໄຊສົມພອນ ພົມວິ ຫານໄດ້ໃຫ້ສຳພາດຕໍ່ນັກຂ່າວວິທະຍຸໂທລະພາບສູນກາງຈີນ ຫຼື CMG ວ່າ: ການພົວພັນຮ່ວມມືລະຫວ່າງສອງອົງການນິຕິບັນຍັດລາວ-ຈີນ ເປັນການສະໜັບສະໜູນສອງພັກ, ສອງລັດ ໃນການພົວພັນຮ່ວມມືທາງດ້ານການເມືອງ, ເສດຖະກິດ-ການຄ້າ, ການລົງທຶນ, ການຄົມມະນາຄົມ, ການທ່ອງທ່ຽວ ແລະ ອື່ນໆ, ເປັນການປະກອບສ່ວນທີ່ສຳຄັນໃຫ້ແກ່ການພັດທະນາເສດຖະກິດ-ສັງຄົມຂອງທັງສອງປະເທດ.
ການຢ້ຽມຢາມ ສປ ຈີນຂອງທ່ານໄຊສົມພອນ ພົມວິຫານຄັ້ງນີ້ແມ່ນຄັ້ງທຳອິດ ທີ່ທ່ານໄດ້ຮັບການເລືອກຕັ້ງເປັນປະທານສະພາແຫ່ງຊາດລາວ. ໃນໄລຍະການຢ້ຽມຢາມ, ສະພາແຫ່ງຊາດລາວ ກັບ ສະພາຜູ້ແທນປະຊາຊົນແຫ່ງຊາດຈີນ ໄດ້ຮ່ວມກັນລົງນາມໃນຂໍ້ຕົກລົງການຮ່ວມມືລະຫວ່າງສອງສະພາ. ທ່ານໄຊສົມພອນເຫັນວ່າ: ນີ້ແມ່ນຂີດໝາຍປະຫວັດສາດແຫ່ງການພົວພັນຮ່ວມມືລະຫວ່າງສອງອົງການນິຕິບັນຍັດ ທັງເປັນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ, ຄູ່ຮ່ວມຍຸດທະສາດຮອບດ້ານ ແລະ ການເປັນຄູ່ຮ່ວມຊາຕາກຳລາວ-ຈີນ, ຈີນ-ລາວ ໃຫ້ຂະຫຍາຍຕົວ ແລະ ມີຜົນສຳເລັດຢ່າງບໍ່ຢຸດຢັ້ງ.
ກອງປະຊຸມເວທີເປິກສາຫາລືຂັ້ນສູງກ່ຽວກັບການຮ່ວມມືສາກົນ “ໜຶ່ງແລວໜຶ່ງເສັ້ນທາງ” ຄັ້ງທີ 3 ຈະຈັດຂຶ້ນຢູ່ນະຄອນຫຼວງປັກກິ່ງ ສປ ຈີນ. ຕໍ່ກັບເລື່ອງນີ້, ທ່ານໄຊສົມພອນ ພົມວິຫານ ມີຄຳເຫັນວ່າ: ພາຍໃຕ້ສະພາບການໃນປັດຈຸບັນທີ່ທົ່ວໂລກກຳລັງປະເຊີນກັບຄວາມຫຍຸ້ງຍາກທາງດ້ານເສດຖະ ກິດ-ການເງິນ ແລະ ສິ່ງທ້າທາຍຕ່າງໆ, ກອງປະຊຸມດັ່ງກ່າວ ຈະເປັນເວທີຊ່ອງທາງ ແລະ ກາລະໂອກາດສົ່ງເສີມການຮ່ວມມື ເພື່ອຟື້ນຟູເສດຖະກິດຂອງແຕ່ລະປະເທດ ກໍຄືຟື້ນຟູເສດຖະກິດໂລກ ພາຍຫຼັງການແພ່ລະບາດຂອງພະຍາດໂຄວິດ 19 ໄດ້ຜ່ອນຄາຍລົງ.
ໃນຕະຫຼອດໄລຍະ 10 ປີນັບຕັ້ງແຕ່ຈີນໄດ້ສະເໜີຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ອອກມານີ້, ການຮ່ວມມືລາວ-ຈີນໄດ້ຮັບຜົນສຳເລັດຢ່າງຈົບງາມ. ນັບມາຮອດກາງເດືອນສິງຫາປີ 2023 ນີ້, ທາງລົດໄຟລາວ-ຈີນ ທີ່ເປັນໂຄງການສັນຍາລັກ “ໜຶ່ງແລວໜຶ່ງເສັ້ນທາງ” ໄດ້ຂົນສົ່ງຜູ້ໂດຍສານຫຼາຍກວ່າ 20 ລ້ານເທື່ອຄົນ, ນັບແຕ່ເດືອນມັງກອນຫາກາງເດືອນສິງຫາ 2023, ເສັ້ນທາງລົດໄຟລາວ-ຈີນໄດ້ເປີດແລ່ນລົດໄຟຫຼາຍກວ່າ 13.000 ຂະບວນ, ເພີ່ມຂຶ້ນ 22% ເມື່ອທຽບໃສ່ໄລຍະດຽວກັນຂອງປີ 2022. ທ່ານໄຊສົມພອນພົມວິຫານຕີລາຄາວ່າ: ເສັ້ນທາງລົດໄຟລາວ-ຈີນ ເປັນເສັ້ນທາງແຫ່ງມິດຕະພາບ ແລະ ເປັນເສັ້ນທາງທີ່ນຳເອົາຄວາມຜາສຸກມາສູ່ປະຊາຊົນສອງຊາດລາວ-ຈີນ. ທ່ານຫວັງຢ່າງຍິ່ງວ່າ: ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ແລະ ແຜນແມ່ບົດວ່າດ້ວຍການສ້າງຄູ່ຮ່ວມຊາຕະກຳລາວ-ຈີນ ຈະປະກອບສ່ວນຮັດແໜ້ນທາງດ້ານການເມືອງ, ຄວາມໄວ້ເນື້ອເຊື່ອໃຈ ແລະ ສະໜັບສະໜູນເຊິ່ງກັນແລະກັນໃນລະດັບສູງລະຫວ່າງສອງພັກ, ສອງລັດ, ຊຸກຍູ້ການຮ່ວມມືທາງດ້ານເສດຖະກິດ-ການຄ້າ-ການລົງທຶນສອງຝ່າຍລາວ-ຈີນໃຫ້ມີຜົນສຳເລັດໃໝ່, ຊຸກຍູ້ໃຫ້ ສປປ ລາວເຂົ້າເຖິງແຫຼ່ງທຶນ, ດຶງດູດການລົງທຶນ ແລະ ການທ່ອງທ່ຽວຢູ່ ສປປລາວ, ພັດທະນາພື້ນຖານໂຄງລ່າງ, ການຮ່ວມມືດ້ານການຜະລິດ, ການຮ່ວມມືດ້ານພະລັງງານ ແລະອື່ນໆ ເພື່ອຊຸກຍູ້ໃຫ້ ສປປ ລາວ ພັດທະນາເສດຖະກິດ-ສັງຄົມຂອງຕົນ.
ຕໍ່ກັບສະພາບເສດຖະກິດສາກົນ ແລະ ສະພາບການພັດທະນາຂອງໂລກທີ່ສັບສົນປ່ຽນແປງໃນປັດຈຸບັນນີ້, ທ່ານໄຊສົມພອນ ພົມວິຫານກ່າວວ່າ: ທ່ານສີຈິ້ນຜິງ ປະທານປະເທດແຫ່ງ ສປ ຈີນໄດ້ສະເໜີຂໍ້ລິເລີ່ມການພັດທະນາທົ່ວໂລກ, ຂໍ້ລິເລີ່ມຄວາມໝັ້ນຄົງທົ່ວໂລກ ແລະ ຂໍ້ລິເລີ່ມຄວາມສີວິໄລທົ່ວໂລກ ເຊິ່ງ 3 ຂໍ້ລິເລີ່ມດັ່ງກ່າວໄດ້ສະທ້ອນໃຫ້ເຫັນຜົນງານການຄົ້ນຄວ້າວິໄຈ ຄວາມຄິດທີ່ເປັນລະບົບຈາກທິດສະດີ ແລະ ພຶດຕິກຳ, ສອດຄ່ອງກັບສະພາບຄວາມເປັນຈິງ, ເປັນເຂັມຊີ້ທິດເຍືອງທາງໃຫ້ແກ່ບັນດາປະເທດໃນທົ່ວໂລກ.