ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຊົນເຜົ່າກຶມມຸບ້ານລາດຄວາຍ ເມືອງໄຊທານີ ນະຄອນຫຼວງວຽງຈັນ ຮ່ວມກັນສະເຫລີມສະ ຫລອງບຸນປີໃໝ່ ຫລື ບຸນເກິຣ ປີ 2024 ດ້ວຍບັນຍາກາດມ່ວນຊື່ນໃນວັນທີ 20 ມັງກອນ 2024ນີ້ ທີ່ບ້ານລາດຄວາຍ, ມີທ່ານ ຖະໜອມ ທໍາທອງ ປະທານແນວລາວສ້າງຊາດນະຄອນຫຼວງວຽງຈັນ, ທ່ານ ນາງສີດາ ບຸນມາ ຫົວໜ້າຄະນະຈັດຕັ້ງ ເມືອງໄຊທານີ, ພ້ອມດ້ວຍພາກສ່ວນກ່ຽວຂ້ອງ ອົງການປົກຄອງບ້ານ ລາດຄວາຍ, ບັນດາບ້ານອ້ອມຂ້າງ, ຕະຫລອດຮອດພໍ່ແມ່ປະຊາຊົນພາຍໃນບ້ານລາດຄວາຍເຂົ້າຮ່ວມ
ທ່ານ ທອງຄໍາ ເຮືອງປະເສີດ ຫົວໜ້າກຸ່ມ 5 ຜູ້ຊີ້ນໍາວຽກງານບັນດາເຜົ່າ ມີຄໍາເຫັນກ່ຽວກັບຄວາມເປັນມາຂອງການສະເຫລີມສະຫລອງບຸນປີໃໝ່ ຫລື ບຸນເກິຣຂອງຊົນເຜົ່າກຶມມຸວ່າ:ເພື່ອເປັນການເຕົ້າໂຮມຄວາມສາມັກຄີ ໃຫ້ຍາດພີ້ນ້ອງໄດ້ພົບປະໂອ້ລົມ ແລະ ແລກປ່ຽນບົດຮຽນຮ່ວມກັນ ພ້ອມທັງເປັນການສະຫລຸບຕີລາຄາການເຄື່ອນໄຫວວຽກງານໃນໜຶ່ງປີຜ່ານມາ ແລະ ວາງແຜນໃນຕໍ່ໜ້າ. ເຊິ່ງເຜົ່າກຶມມຸແມ່ນຊົນເຜົ່າໜຶ່ງທີ່ນອນຢູ່ໃນວົງຄະນະຍາດແຫ່ງຊາດລາວ, ເຊື່ອຖືບັນພະບູລຸດ ດໍາລົງຊີວິດດ້ວຍການເຮັດໄຮ່ ປູກເຂົ້າ ເຜືອກມັນ ປູກຜັກຕ່າງໆ ລ້ຽງສັດໃຫຍ່-ນ້ອຍໄວ້ບໍລິໂພກ ແລະ ເຮັດພິທີທາງສາດສະໜາ, ເມື່ອເກັບກ່ຽວຜົນຜະລິດແລ້ວ ມີການສະເຫລີມສະຫລອງຜົນສໍາເລັດ ເພື່ອສະຫລຸບເອີ້ນວ່າ: ບຸນເກິຣ ຫລື ເຕັດນຶມ ເພື່ອປົດປີເກົ່າ ແລ້ວ ຕັ້ງປີໃໝ່ ພາຍໃນງານມີການບາສີສູ່ຂວັນ ອວຍພອນເຊິ່ງກັນ ແລະ ກັນຕາມຮີດ 12 ຄອງ 14 ຮີດຍີ່ຄອງເຈືອງ ດ້ວຍພາເຂົ້າສາມັກຄີ, ກິນເຜືອກ ກິນມັນ ດື່ມເຫຼົ້າໄຫ ຊົມການສະແດງສິນລະປະຂອງເຜົ່າ ເປັນຕົ້ນ: ການຮ້ອງເພງ ເປົ່າປີ່ ຂັບລໍາ ຟ້ອນຕາບ ແລະ ຟ້ອນລາຍຕ່າງໆ
ໂອກາດນີ້ ທ່ານ ຂັນໄຊ ແກ້ວພັນຄໍາ ເລຂາພັກບ້ານ ນາຍບ້ານລາດຄວາຍມີຄໍາເຫັນວ່າ: ຕະຫລອດໄລຍະຜ່ານມາ ອົງການປົກຄອງບ້ານລາດຄວາຍໄດ້ເອົາໃຈໃສ່ນໍາພາ-ຊີ້ນໍາປະຊາຊົນພາຍໃນບ້ານເອົາໃຈໃສ່ຢ່າງຕັ້ງໜ້າໃນການພັດທະນາເສດຖະກິດສັງຄົມ ສາມາດຍາດໄດ້ຜົນສໍາເລັດຫລາຍດ້ານ ເຊິ່ງສະແດງອອກການເກັບລາຍຮັບເຂົ້າງົບປະມານ ໃນປີ 2023 ສາມາດຈັດຕັ້ງປະຕິບັດໄດ້ລື່ນແຜນການທີ່ຂັ້ນເທິງວາງອອກ ໃນແຜນການ 60.374.000 ກີບ, ປະຕິບັດໄດ້ 77.879.000 ກວ່າກີບ, ເທົ່າກັບ 129 ສ່ວນຮ້ອຍ, ນອກນີ້ ຍັງມີກຸ່ມການຜະລິດເຂົ້າແນວພັນລຸ່ນ 3 ແລະ ຜະລິດເຂົ້າເປັນສະມາຊິກ 27 ຄອບຄົວ ແລະ ພົ້ນເດັ່ນແມ່ນໄດ້ຊຸກຍູ້ສົ່ງເສີມໃຫ້ປະຊາຊົນບັນດາເຜົ່າແຕ່ລະຄອບຄົວປູກພືດກະສິກໍາເປັນສິນຄ້າສະໜອງໃຫ້ຕະຫລາດພາຍໃນນະຄອນນຫຼວງ.
ບ້ານລາດຄວາຍແບ່ງອອກເປັນ 7 ກຸ່ມ, ມີ 1.000 ກວ່າຄອບຄົວ, ຜົນລະເມືອງທັງໝົດ 4.476 ຄົນ, ຍິງ 2.000 ກວ່າຄົນ. ໃນນີ້ ເຜົ່າມົ້ງ 79 ຫລັງຄາເຮືອນ ມີ 88 ຄອບຄົວ, ມີ 483 ຄົນເຜົ່າກຶມມຸ ມີ 124 ຫັລງຄາເຮືອນ, ມີ131 ຄອບຄົວ, ມີ 627 ຄົນ ຍິງ 332 ຄົນ. ຜ່ານມາ 3 ຂົນເຜົ່າແມ່ນມີຄວາມສາມັກຄີກັນຢ່າງແໜ້ນໜາ. ການປະກອບອາຊີບຂອງປະຊາຊົນພາຍໃນບ້ານແມ່ນມີຫລາກຫລາຍອາຊີບຄື: ອາຊີບເຮັດການກະສິກໍາປູກຝັງ-ລ້ຽງສັດກວມເອົາ 60 ສ່ວນຮ້ອຍ, ກໍາມະກອນ 12 ສ່ວນຮ້ອຍ, ຄ້າຂາຍ-ບໍລິການ 7 ສ່ວນຮ້ອຍ, ພະນັກງານ 4 ສ່ວນຮ້ອຍ ນັກຮຽນ-ນັກສຶກສາ ແລະ ອື່ນໆ 17 ສ່ວນຮ້ອຍ.%
ຂ່າວວິທະຍຸກະຈາຍສຽງແຫ່ງຊາດລາວ ( ວສລ )
May be an image of 8 people
May be an image of 8 people
May be an image of 15 people and text