ອົງການປົກຄອງເມືອງປາກແຊງ ສະເຫຼີມສະຫຼອງວັນປູກຕົ້ນໄມ້ແຫ່ງຊາດ ແລະວັນສີ່ງແວດລ້ອມໂລກ ປະຈໍາປີ 2024
ວັນທີ 3 ມີຖຸນາ 2024 ນີ້ ຫ້ອງການກະສີກໍາ ແລະ ປ່າໄມ້ ເມືອງປາກແຊງ ແຂວງຫລວງພະບາງ ຈັດພິທີປູກຕົ້ນໄມ້ ໂອກາດວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ຄຽງຄູ່ກັບການສະເຫຼີມສະຫຼອງ ວັນສີ່ງແວດລ້ອມໂລກ ວັນທີ່ 5 ມິຖຸນາ 2024 ຢູ່ໂຮງຮຽນມັດທະຍົມສົມບຸນສົບແຈກ ມີ ທ່ານ ສຸກດາວັນ ພັນຈັກຂັນ ເຈົ້າເມືອງປາກແຊງ, ທ່ານ ສີວອນ ວົງຄຳຈັນ ຫົວໜ້າພະແນກກະສິກໍາ ແລະ ປ່າໄມ້ແຂວງ, ພ້ອມດ້ວຍຫົວໜ້າ, ຮອງຫົວໜ້າ, ການນຳຂອງເມືອງ, ພະນັກງານ, ທະຫານ, ຕໍາຫຼວດ, ນັກທຸລະກິດ, ຊາວຄ້າຂາຍ ຕະຫຼອດນັກຮຽນ ນັກສຶກສາ ແລະປະຊາຊົນບັນດາເຜົ່າພາຍໃນບ້ານ ສົບແຈກ ເຂົ້າຮ່ວມ.
ໂອກາດນີ້ ທ່ານ ສີສະໝຸດ ພົງສະຫວັດ ຫົວໝ້າຫ້ອງກະສິກຳ ແລະ ປ່າໄມ້ເມືອງປາກແຊງ ໄດ້ມີຄຳເຫັນວ່າ: ໃນເດືອນມີຖຸນາທຸກປີ ຫ້ອງການກະສີກໍາ ແລະ ປ່າໄມ້ ສົມທົບກັບ ອົງການປົກຄອງ ເມືອງປາກແຊງ ໄດ້ຈັດພິທີປູກຕົ້ນໄມ້ ເພື່ອສະເຫຼີມສະຫຼອງວັນປູກຕົ້ນໄມ້ແຫ່ງຊາດ ວັນທີ 1 ມີຖຸນາ, ເພື່ອໃຫ້ສະພາບແວດລ້ອມມີອາກາດສົດຊື່ນ ແລະມີສີຂຽວ ຮົ່ມເຢັນ ທັງປຸກລະດົມໃຫ້ທຸກຄົນ ຮູ້ຜົົນປະໂຫຍດຂອງປ່າໄມ້ ທີ່ມີຄຸນຄ່າອັນໃຫຍ່ຫຼວງໃນການປົົກປັກຮັກສາດິນ, ນໍ້າ ແລະດັດສົມພູມມີອາກາດ ຕອບສະໜອງວັດຖຸດິບໃຫ້ໂຮງຈັກ ໂຮງງານ, ເປັນແຫ່ລງອາຫານ ແລະຢາ ຕອບສະໜອງການດໍາລົງຊີວິດ ປະຈໍາວັນຂອງປະຊາຊົນບັນດາເຜົ່າ, ສໍາລັບການປູກຕົ້ນໄມ້ປີນີ້ ຈັດຂຶ້ນທີໂຮງຮຽນ ມສ ສົບແຈກ ເບ້ຍໄມ້ນໍາມາປູກທັງໝົດມີ 800 ເບ້ຍ ໃນນັ້ນ ມີເບ້ຍໝາກລີ່ນຈີ່, ລໍາໄຍ, ໝາກເງາະ, ໝາກພຸກ ແລະເບ້ຍໝາກສົ້ມຂຽວ, ພ້ອມນີ້ ຍັງໄດ້ສົ່ງເສີມ ປະຊາຊົນປູກໄມ້ໃຫ້ໝາກ ຈຳນວນ 5 ບ້ານ ມີເນື້ອທີ່ 2 ເຮັກຕາ ໂດຍໄດ້ໃຫ້ທືນສະໜັບສະໜູມ ຈາກໂຄງການ ຄຸ້ມຄອງອ່າງໂຕ່ງຂະໜາດນ້ອຍ ພາກເໜືອຂອງລາວ (SWAN LAO) ຈຳນວນ 2,550 ເບ້ຍ,
ໂອກາດນີ້ ທ່ານ ສຸກດາວັນ ພັນຈັກຂັນ ໄດ້ມີຄຳເຫັນຮຽກຮ້ອງໃຫ້ທຸກພາກສ່ວນ, ຈົ່ງມີສ່ວນຮ່ວມ ໃນການບົວລະບັດຮັກສາ ຕົ້ນໄມ້ທີ່ປູກແລ້ວ, ທັງສ້າງນິຕິກໍາ ໃນການປົກປັກຮັກສາຕົ້ນໄມ້ ເພື່ອໃຫ້ມີລະບຽບການຄຸ້ມຄອງສະເພາະ, ຊຸກຍູ້ໃຫ້ການຈັດຕັ້ງບ້ານ ລົງກວດກາໃນຂອບເຂດຮັບຜິດຊອບ ເພື່ອບໍ່ໃຫ້ມີຜູ້ບຸກລູກໃນຕໍ່ໜ້າ. ໂອກາດດຽວກັນນີ້ ຍັງໄດ້ປ່ອຍປາລົງສູ່ວັງອານຸລັກຂອງບ້ານ ສົບແຈກ ຈຳນວນ 15,000 ໂຕ ໃນນີ້ມີ ປານີນ, ປາໄນ, ປາອີນເດຍ ແລະປາປາກ.
ພາບ-ຂ່າວ: ແກ່ນຄຳ ສົມໃຈປອງ.
