ອົງການປົກຄອງແຂວງໄຊຍະບູລີ ເລັ່ງຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກນ້ຳຖ້ວມຢູ່ 2 ເມືອງຄື ເມືອງໄຊຍະບູລີ ແລະ ເມືອງເງິນ ໂດຍສະເພາະການຍົກຍ້າຍປະຊາຊົນ ແລະ ຂົນເຄື່ອງຂອງຕ່າງໆອອກຈາກເຮືອນ, ພາຫະນະ, ເຄື່ອງໃຊ້ໄຟຟ້າ, ສັດ ແລະ ອື່ນໆໄປໄວ້ຢູ່ທີ່ສູງ.

 

ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ ໃຫ້ສຳພາດວ່າ ປະຈຸບັນອົງການປົກຄອງແຂວງໄດ້ລະດົມກຳລັງຫຼາຍກວ່າ 500 ຄົນ ເພື່ອເຂົ້າຊ່ວຍເຫຼືອປະຊາຊົນຂົນເຄື່ອງຕ່າງໆໄປໄວ້ເຂດທີ່ປອດໄພ ແຕ່ການຊ່ວຍເຫຼືອຕົວຈິງຍັງພົບອຸປະສັກຫຼາຍຢ່າງ ເປັນຕົ້ນຢູ່ບາງເຂດ ລົດບໍ່ສາມາດເຂົ້າເຖິງໄດ້ ຍ້ອນເສັ້ນທາງຖືກນ້ຳຖ້ວມ, ສະນັ້ນ ຈຶ່ງສະເໜີຂໍການຊ່ວຍເຫຼືອຈາກສັງຄົມໂດຍສະເພາະເຮືອ ເພື່ອນຳເຂົ້າໃນການຍົກຍ້າຍປະຊາຊົນ ແລະ ຂົນວັດຖຸສິ່ງຂອງທີ່ຈຳເປັນ ຖ້າຫາກຝົນຍັງສືບຕໍ່ຕົກຍິ່ງມີຄວາມສ່ຽງສູງທີ່ລະດັບນ້ຳອາດຈະສູງຂຶ້ນຕື່ມອີກ.

ອີງຕາມຂໍ້ມູນທີ່ເກັບກຳເບື້ອງຕົ້ນຂອງພາກສ່ວນທີ່ກ່ຽວຂ້ອງໃຫ້ຮູ້ວ່າຢູ່ເມືອງໄຊຍະບູລີ ແຂວງໄຊຍະບູລີ ມີປະຊາຊົນຫຼາຍກວ່າ 3,000 ຄົນ ໃນຈຳນວນ 9 ບ້ານຢູ່ເທດສະບານເມືອງຄື ບ້ານນາຍາວ, ນາຕໍໃຫຍ່, ໜອງແຊງ, ບ້ານໃຫຍ່, ບ້ານບຸງ, ບ້ານຖິ່ນ, ບ້ານປົ່ງ, ບ້ານສີເມືອງ ແລະ ບ້ານສີມຸງຄຸນ ໄດ້ຮັບຜົນກະທົບຈາກນ້ຳຖ້ວມ ເສັ້ນທາງຫຼາຍສາຍຖືກຕັດຂາດ, ກະແສໄຟຟ້າບໍ່ສາມາດໃຊ້ການໄດ້ໃນປະຈຸບັນ. ສ່ວນຢູ່ເມືອງເງິນ ສາຍນ້ຳຍາງເຊິ່ງເປັນສາຍນ້ຳຫຼັກຂອງເມືອງ ບວກກັບນ້ຳປ່າໄຫຼເຂົ້າຖ້ວມທົ່ງນາ, ຮົ້ວສວນຂອງປະຊາຊົນຫຼາຍບ້ານພາຍໃນເມືອງ ແລະ ໜັກກວ່າໝູ່ແມ່ນບ້ານແກ້ວດອກຄູນ. ໃນມື້ວານນີ້ ທ່ານ ທະວີສັກ ໄຊຍະວົງ ເຈົ້າເມືອງເມືອງເງິນ ພ້ອມດ້ວຍຄະນະກຳມະການຕ້ານ ແລະ ສະກັດກັ້ນໄພພິບັດຂັ້ນເມືອງໄດ້ສົມທົບພາກສ່ວນທີ່ກ່ຽວຂ້ອງ, ເຈົ້າໜ້າທີ່ກຳລັງປ້ອງກັນຊາດ, ປ້ອງກັນຄວາມສະຫງົບ ໃຫ້ຄວາມຊ່ວຍເຫຼືອປະຊາຊົນຢ່າງທັນການ ໃນການຍ້າຍເຄື່ອງຂອງຕ່າງໆ ແລະ ສັດລ້ຽງຂອງປະຊາຊົນຢູ່ຕາມແຄມສາຍນ້ຳຍາງອອກຈາກເຂດດັ່ງກ່າວໄປໄວ້ເຂດທີ່ປອດໄພແລ້ວ, ປັດຈຸບັນພາກສ່ວນກ່ຽວຂ້ອງກຳລັງລົງເກັບກຳຂໍ້ມູນຜົນເສຍຫາຍເບື້ອງຕົ້ນ ແລະ ຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກເຫດການນ້ຳຖ້ວມຄັ້ງນີ້.

Loading...