ຜູ້ຕາງໜ້າອົງການຢູນິເຊັບປະຈໍາສປປລາວໄດ້ເຂົ້າຢ້ຽມຂ່ຳນັບທ່ານຮອງນາຍົກລັດຖະມົນຕີ ແຫ່ງ ສປປລາວ ເນື່ອງໃນໂອກາດການອະນຸມັດຂອງລັດຖະບານແຫ່ງສປປລາວຕໍ່ເອກະສານແຜນງານລະດັບປະເທດ (CPD) ສະບັບ ໃໝ່ຂອງອົງການຢູນິເຊັບ 2022-2026, ຊຶ່ງເປັນກອບວຽກການຮ່ວມມືໃໝ່ລະຫວ່າງອົງການຢູນິເຊັບ ແລະ ລັດຖະບານແຫ່ງ ສປປລາວໃນ 5 ປີຕໍ່ໜ້າ,
ວັນທີ 8 ກັນຍາ 2021, ທ່ານ ນາງ ດຣ. ປີອາ ເຣເບລໂລ ບີຣໂຕ, ຜູ້ຕາງໜ້າອົງການຢູນິເຊັບປະຈຳ ລາວໄດ້ເຂົ້າຢ້ຽມຂ່ຳນັບພະນະ ດຣ. ກິແກ້ວ ໄຂຄໍາພິທູນ, ຮອງນາຍົກລັດຖະມົນຕີ ແຫ່ງ ສປປລາວ.
ໃນການເຂົ້າຢ້ຽມຂ່ຳນັບຄັ້ງນີ້, ໄດ້ມີການນໍາສະເໜີເອກະສານແຜນງານລະດັບປະເທດສະບັບໃໝ່ (CPD) ຂອງອົງການຢູນິເຊັບຕໍ່ທ່ານຮອງນາຍົກລັດຖະມົນຕີ. ແຜນງານດັ່ງກ່າວໄດ້ຮັບການສ້າງຂຶ້ນດ້ວຍການປຶກສາຫາລືກັບລັດຖະບານ, ບັນດາຄູ່ຮ່ວມງານ ແລະ ເປັນກອບວຽກຂອງການຮ່ວມມືໃໝ່ລະຫວ່າງອົງການຢູນິເຊັບ ແລະ ລັດຖະບານແຫ່ງສປປລາວແຕ່ປີ 2022-2026. CPD ໄດ້ກໍານົດບັນດາບູລິມະສິດຂອງອົງການຢູນິເຊັບ ໃນ 5 ປີຕໍ່ໜ້າ ຊຶ່ງຍັງສອດຄ່ອງກັບຄວາມພະຍາຍາມຂອງລັດຖະບານ ລາວ ເພື່ອບັນລຸເປົ້າໝາຍ SDGs ສໍາລັບແມ່ຍິງ ແລະ ເດັກນ້ອຍອີກດ້ວຍ.
ທ່ານ ດຣ. ກິແກ້ວ ໄຂຄໍາພິທູນ, ຮອງນາຍົກລັດຖະມົນຕີ ແຫ່ງ ສປປລາວໄດ້ກ່າວວ່າ: “ໃນຂະນະທີ່ພວກເຮົາເລີ່ມຕົ້ນແຜນງານການຮ່ວມມືລະດັບປະເທດໄລຍະ 5 ປີລະຫວ່າງລັດຖະບານແຫ່ງສປປລາວ ແລະ ອົງການຢູນີເຊັບ, ຂ້າພະເຈົ້າຂໍສະແດງຄວາມຂອບ ໃຈຢ່າງຈິງໃຈຕໍ່ອົງການຢູນິເຊັບ ແລະ ການສະໜັບສະໜູນຂອງອົງການຢູນິເຊັບຕໍ່ປະເທດຂອງພວກເຮົາເພື່ອຮັບປະກັນສະຫັວດດີພາບຂອງປະຊາຊົນລາວ. ລັດຖະບານແຫ່ງສປປລາວຫວັງວ່າ ການຮ່ວມມືກັບອົງການຢູນິເຊັບໃນຕໍ່ໜ້າຈະມີໝາກຜົນໃຫ່ຍຫຼວງກວ່າເກົ່າອີກ ເພື່ອຜົນປະໂຫຍດຂອງເດັກທຸກຄົນໃນສປປລາວ.
ໃນການເຂົ້າຢ້ຽມຂ່ຳນັບຄັ້ງນີ້, ທ່ານນາງດຣ. ປີອາ ເຣເບລໂລ ບີຣໂຕ, ຜູ້ຕາງໜ້າອົງການຢູນິເຊັບປະຈຳສປປລາວ ຍັງໄດ້ກ່າວຊົມເຊີຍພະ ນະທ່ານ ດຣ. ກິແກ້ວ ໄຂຄໍາພິທູນທີ່ທ່ານໄດ້ຮັບແຕ່ງຕັ້ງໃນຕໍາແໜ່ງໃໝ່.
ທ່ານນາງດຣ. ປີອາ ເຣເບລໂລ ບີຣໂຕ, ຜູ້ຕາງໜ້າອົງການຢູນິເຊັບປະຈຳສປປລາວໄດ້ກ່າວວ່າ: “ແຜນງານລະດັບປະເທດສະບັບໃໝ່ໄດ້ຮັບການສ້າງຂຶ້ນເພື່ອຕອບສະໜອງຕໍ່ການວິເຄາະສະຖານະການຂອງເດັກນ້ອຍໃນສປປລາວ ແລະ ຜ່ານການປຶກສາຫາລືຢ່າງກວ້າງ ຂວາງກັບບັນດາກະຊວງທີ່ກ່ຽວຂ້ອງ ເພື່ອຮັບປະກັນຄວາມຄົບຖ້ວນສົມບູນຂອງແຜນງານຂອງພວກເຮົາ. ອົງການຢູນິເຊັບຮັບຮູ້ເຖິງການນໍາພາທີ່ເຂັ້ມແຂງຂອງລັດຖະບານແຫ່ງສປປລາວໃນການຈັດຕັ້ງປະຕິບັດບັນດາມາດຕະການຕອບໂຕ້ຕໍ່ພະຍາດໂຄວິດ -19, ໂດຍສະເພາະແມ່ນປະຕິບັດການສັກວັກຊີນກັນພະຍາດໂຄວິດ -19 ຢ່າງວ່ອງໄວ ແລະ ຮັບປະກັນວ່າສາມາດເປີດໂຮງຮຽນຄືນໃໝ່ໄດ້ຢ່າງປອດໄພສໍາລັບສົກຮຽນໃໝ່ນີ້່. ພວກເຮົາຫວັງຢ່າງຍິ່ງວ່າຈະສ້າງການຮ່ວມມື ກັບລັດຖະບານໃຫ້ແໜ້ນແຟ້ນກວ່າເກົ່າໃນຊຸມປີຕໍ່ໜ້າ ເພື່ອໃຫ້ພວກເຮົາສາມາດເລັ່ງລັດຄວາມຄືບໜ້າຂອງຕົນໄປສູ່ SDGs ສໍາລັບເດັກທຸກຄົນ.”
CPD ຍັງເປັນຂີດໝາຍສໍາຄັນໃນການຮ່ວມມືລະຫວ່າງອົງການຢູນິເຊັບ ແລະ ລັດຖະບານແຫ່ງສປປລາວ ຍ້ອນວ່າ CPD ສອດຄ່ອງທີ່ສຸດກັບໝາກຜົນທີ່ 2 ແລະ ທີ 3 ຂອງແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ 9 (NSEDP) ຂອງລັດຖະບານ ຊຶ່ງມີຈຸດປະ ສົງເພື່ອປັບປຸງຄຸນນະພາບຂອງຊັບພະຍາກອນມະນຸດເພື່ອຕອບສະໜອງຕາມຄວາມຕ້ອງການດ້ານການພັດທະນາ, ການຄົ້ນຄວ້າວິໄຈ, ວິທະຍາສາດ ແລະ ເຕັກໂນໂລຍີຂອງປະເທດ ແລະ ປັບປຸງຊີວິດການເປັນຢູ່ຂອງປະຊາຊົນລາວໃຫ້ດີຂຶ້ນພາຍໃນປີ 2026.
ການຮ່ວມມືອັນຍາວນານລະຫ່ວາງອົງການຢູນິເຊັບ ແລະ ລັດຖະບານແຫ່ງສປປລາວແມ່ນມີມາຕັ້ງແຕ່ປີ 1973 ເປັນຕົ້ນມາ . ໃນປີນີ້,ເນື່ອງຈາກອົງການຢູນິເຊັບພວມສະເຫຼີມສະຫຼອງວັນຄົບຮອບ 75 ປີ, ແຜນງານລະດັບປະເທດສະບັບໃໝ່ ປະກອບສ່ວນເປັນເຫດການສໍາຄັນໃນປະຫວັດສາດຂອງອົງການຢູນິເຊັບ ແລະ ການເປັນຄູ່ຮວ່ມງານກັບລັດຖະບານແຫ່ງສປປລາວ.
