2 ກິດຈະກຳຫລັກເຊັ່ນການກໍ່ສ້າງລະ ບົບນໍ້າລິນ ແລະການສ້າງຕັ້ງທະນາຄານເຂົ້າໃນຊຸມຊົນທີ່ອົງການອາຫານໂລກ ຫລືWFP ປະຈໍາລາວ ໃຫ້ການສະໜັບ ສະໜູນ ແລະຊ່ວຍເຫລືອສາມາດຍົກລະດັບຊີ ວິດການເປັນຢູ່ຂອງປະຊາຊົນບ້ານຂຸນໜຸ່ມຫລວງໃຫ້ດີຂື້ນ.
ທ່ານ ບຸນເທດ ໄຊຍະວົງ ຜູ້ປະສານງານອົງການອາຫານໂລກປະຈໍາເມືອງ ແລະ ແຂວງຜົ້ງສາລີ ໃຫ້ສໍາພາດວ່າ: ຂຸນໜຸ່ມຫລວງເປັນບ້ານໜື່ງທີ່ນອນໃນຈໍານວນ 6 ບ້ານທີ່ໄດ້ຮັບການຊ່ວຍເຫລືອດ້ານການຄໍ້າປະກັນສະບຽງອາຫານໃນເຂດທີ່ມີຄວາມສ່ຽງໄພພິບັດທາງທໍາມະຊາດ ແລະການສ້າງຊັບສິນໃນຊຸມຊົນ ໂດຍເນັ້ນໜັກໃສ່ 2 ກິດຈະກຳຕົ້ນຕໍເຊັ່ນ: ການກໍ່ສ້າງລະບົບນໍ້າລິນ, ສ້າງທະນາຄານເຂົ້າໃນຊຸມຊົນ ເພື່ອໃຫ້ປະຊາຊົນເປັນເຈົ້າການ ແລະປະກອບສ່ວນໃນການຈັດຕັ້ງປະຕິບັດກິດຈະກຳ ເປັນຕົ້ນແຮງງານ, ວັດຖຸອຸປະກອນທີ່ຫາໄດ້ໃນຊຸມຊົນ ຊື່ງເລີ່ມຈັດຕັ້ງປະຕິບັດໃນປີ 2022 ເປັນຕົ້ນມາ.
ທ່ານ ພອນ ສະຫວັນ, ນາຍບ້ານໆຂຸນໜຸ່ມຫລວງ ໃຫ້ຮູ້ວ່າ: ພາຍຫລັງໄດ້ຮັບການຊ່ວຍເຫລືອຈາກອົງການອາຫານໂລກແລ້ວ ຊິວິດການເປັນຢູ່ຂອງປະຊາ ຊົນພາຍໃນບ້ານໄດ້ຮັບການປັບປຸງດີຂື້ນຫລາຍ ໂດຍສະເພາະການສ້າງຕັ້ງທະນາ ຄານເຂົ້າຊ່ວຍແກ້ໄຂບັນຫາການຂາດເຂີນເຂົ້າກິນສາມາດໄປຢືມເຂົ້າໃນທະນາຄານເຂົ້າມາກິນກ່ອນ ເມື່ອເຖິງລະດູການເກັບ ກ່ຽວຈຶ່ງນໍາເອົາຜົນຜະລິດໄປສົ່ງຄືນ.
ນອກຈາກຊ່ວຍເຫລືອໃນການສ້າງນໍ້າລິນ ແລະທະນາຄານເຂົ້າແລ້ວ ອົງການອາຫານໂລກ ຍັງໄດ້ສ້າງຄວາມເຂັ້ມແຂງໃຫ້ຊຸມຊົນໃນການຫຼຸດຜ່ອນຄວາມສ່ຽງດ້ານໄພພິບັດທາງທຳມະຊາດ ຜ່ານການຝຶກອົບຮົມ ຊຶ່ງເປັນກິດຈະກໍາໜື່ງທີ່ນອນໃນໂຄງການສ້າງຊັບສິນຊຸມຊົນ ເພື່ອໃຫ້ຄວາມຮູ້ພື້ນຖານກ່ຽວກັບໄພພິບັດແກ່ປະຊາຊົນ ແລະມີຄວາມພ້ອມໃນການຮັບມືກັບໄພພິບັດທີ່ອາດຈະເກີດຂຶ້ນ ເນື່ອງຈາກໃນໄລຍະຜ່ານມາບ້ານຂຸນໜຸ່ມຫລວງ ປະເຊີນກັບບັນຫາການລະບາດຂອງຝູງຕັກກະແຕນ, ອະຫິວາສັດປີກ, ອະຫິວາໝູ ແລະ ໄພແລ້ງ.
