ວັນທີ 16 ພະຈິກ 2022, ທີ່ໂຮງຮຽນປະຖົມນາໄຮ່ດຽວ, ເມືອງຈັນທະບູລີ, ນະຄອນຫລວງ ວຽງຈັນ ໄດ້ຈັດພິທີເປີດແຜນງານບີຄວາ ໄລຍະທີ 2 ໂດຍມີ ທ່ານ ນາງ ສີສຸກ ວົງວິຈິດ ຮອງລັດ ຖະມົນຕີກະຊວງສຶກສາທິການ ແລະ ກິລາ, ທ່ານ ໂພລ ແຄລີ, ເອກອັກຄະລັດຖະທູດອົດສະຕາລີ ປະຈຳ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ແຜນງານບີຄວາແຜນງານການປັບປຸງຄຸນນະພາບ ແລະ ຂະຫຍາຍໂອກາດເຂົ້າຮຽນ ສຳລັບການສຶກສາຂັ້ນພື້ນຖານ ໃນ ສປປ ລາວ ເຊີ່ງລັດຖະບານອົດສຕາລີ ໃຫ້ທຶນສະໜັບສະໜູນ ມູນຄ່າ 28.000.000 ກວ່າໂດລາອົດສະຕາລີ, ໃນໄລຍະ 4 ປີ, ແຕ່ປີ 2022 ຫາ 2026.
ທ່ານ ໂພລ ແຄລີ ໄດ້ກ່າວວ່າ: ລັດຖະບານ ອົດສຕາລີ ມີຄວາມມຸ່ງຫວັງໃຫ້ການສະໜັບ ສະໜູນລັດຖະບານລາວເພື່ອສົ່ງເສີມໂອກາດໃນການຮຽນຮູ້ ຕະຫຼອດຊີວິດສຳລັບທຸກຄົນ, ໂດຍສະເພາະແມ່ນເດັກຍິງ ແລະ ເດັກນ້ອບທີ່ມີຄວາມພິການ. ການໃຫ້ບຸລິມະສິດແກ່ການພັດ ທະນາເພື່ອການຮູ້ໜັງສື ໃນກຸ່ມເດັກທີ່ຍັງນ້ອຍແມ່ນມີຄວາມສຳຄັນສຳລັບ ການຮຽນຮູ້ໃນອະນາ ຄົດ ແລະ ການມີວຽກເຮັດງານທຳຂອງພວກເຂົາ, ທັງເປັນພື້ນຖານຂອງຜົນສຳເລັດຂອງ ການລົງທຶນໃນການສຶກສາໃນທຸກຊັ້ນຮຽນ.
ທ່ານກ່າວຕື່ມວ່າ: ໄລຍະທີ 1 ຂອງແຜນງານນີ້ ໄດ້ສະໜັບສະໜູນກະຊວງສຶກສາທິການ ແລະ ກິລາຂອງລາວໃນການການປັບປຸງຫຼັກສູດຊັ້ນປະຖົມສຶກສາ ເຊິ່ງແມ່ນຫຼັກສູດແຫ່ງຊາດ ແລະ ຖືເອົານັກຮຽນເປັນໃຈກາງຂອງການສອນ, ການພັດທະນາສື່ການຮຽນ-ການສອນ ທີ່ຕິດພັນກັບ ຫຼັກສູດໃໝ່ ແລະ ການຝຶກອົບຮົມຄູທົ່ວປະເທດໃນການນຳໃຊ້ຫຼັກສູດສະບັບປັບປຸງໃໝ່ ໂດຍ ເນັ້ນໃຫ້ນັກຮຽນມີສ່ວນຮ່ວມຜ່ານການເຮັດກິດຈະກຳ, ທົດລອງຕົວຈິງ ແລະ ນຳໃຊ້ຄວາມຮູ້ເຂົ້າ ໃນຊີວິດຈິງ,
ສໍາລັບການສະໜັບສະໜູນແຜນງານໄລຍະທີ 2 ຂອງລັດຖະບານອົດສຕາລີ ຈະສຸມໃສ່ສະ ໜັບສະໜູນການຝຶກອົບຮົມ, ການພັດທະນາວິຊາຊີບຄູທີ່ມີຄຸນນະພາບສູງ ແລະ ອື່ນໆ ເພື່ອແນໃສ່ ປັບປຸງການຮຽນ-ການສອນ ກໍຄື ປັບປຸງຄຸນນະພາບການສຶກສາຂອງລາວໃຫ້ນັບມື້ດີຂຶ້ນຢ່າງຕໍ່ ເນື່ອງ.
