ວັນທີ່ 2 ມິຖຸນາ 2022 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີພ້ອມດ້ວຍຄະນະ ໄດ້ເດີນທາງມາຊຸກຍູ້ການຜະລິດ ແລະການດຳເນີນທຸລະກິດຢູ່ແຂວງຫຼວງພະບາງ ໃນນັ້ນ ໄດ້ຢ້ຽມຢາມການດຳເນີນວຽກງານຂອງບໍລິສັດອຸດສາຫະກຳທັດໂທບັກໂກ ການຄ້າຂາອອກ-ຂາເຂົ້າຈຳກັດ ເຊີ່ງເປັນບໍລິສັດຜະລິດຢາສູບເພື່ອສົ່ງອອກຕ່າງປະເທດ 70% ແລະຈຳໜ່າຍພາຍໃນ 30%, ໂດຍມີໂຮງງານຕັ້ງຢູ່ບ້ານຊ່າງໄຫເມືອງປາກອູ. ບໍລິສັດໄດ້ຖືສຳຄັນການມີສ່ວນຮ່ວມຂອງປະຊາຊົນທ້ອງຖີ່ນ ດ້ວຍການສົ່ງເສີມປະຊາຊົນ ດ້ວຍຮູບແບບ ສອງບວກສາມ ຄືປະຊາຊົນມີແຮງງານ ແລະດີນ, ສ່ວນບໍລິສັດໄດ້ສະໜອງທືນ, ເຕັກນິກ ແລະການບໍລິການ, ຜ່ານມາໄດ້ສະໜອງເບ້ຍຢາສູບໃຫ້ກັບປະຊາຊົນ ທີ່ມີຈຸດປະສົງປູກເປັນສີນຄ້າປ້ອນໃຫ້ໂຮງງານ, ສ່ວນປະຊາຊົນທີ່ມີເງື່ອນໄຂກ້າເບ້ເອງ ບໍລິສັດໄດ້ສະໜອງແນວພັນໃຫ້ ແລ້ວເກັບຊື້ຜົນຜະລິດຄືນ, ເຊີ່ງປີໜື່ງບໍລິສັດມີຄວາມຕ້ອງການເນື້ອທີ່ປູກຕົ້ນຢາສູບປະມານ 3.000 ເຮັກຕ່າ, ປັດຈຸບັນການເກັບຊື້ຜົນຜະລິດຢາສູບຢູ່ແຂວງຫຼວງພະບາງ ເຂົ້າໂຮງງານມີພຽງ 700 ໂດ່ນຕໍ່ປີ ເຊີ່ງຍັງບໍ່ມີຄວາມພຽງພໍກັບຄວາມຕ້ອງການຜະລິດຕົວຈີງ.
ສຳລັບການຜະລິດຢາສູບຂອງບໍລິສັດໃນປັດຈຸບັນປະກອບມີ ການແຍກເກດໃບຢາ ມີກຳລັງຜະລິດ 60-80 ໂຕ່ນຕໍ່ວັນ, ການແຍກກ້ານ-ໃບ ມີກຳລັງຜະລິດ 4.500 ກິໂລຕໍ່ຊົ່ວໂມງ, ການຊອຍໃບຢາ-ກ້ານຢາ ມີກຳລັງຜະລິດ 2.500 ກິໂລຕໍ່ຊົ່ວໂມງ, ການຜະລິດກອກຢາສຳເລັດຮູບ ກຳລັງການຜະລິດ 50.000 ກອກຕໍ່ຊົ່ວໂມງ, ພ້ອມນີ້ ບໍລິສັດໄດ້ນຳເຂົ້າເຄື່ອງຈັກໃໝ່ ທີ່ມີຄວາມທັນສະໄໝ ແລະເຮັດວຽກໄດ້ດີຂື້ນກວ່າເກົ່າ ປະກອບມີ ເຄື່ອງຊອຍໃບຢາ-ກ້ານຢາ ມີກຳລັງຜະລິດ 4.000 ກິໂລຕໍ່ຊົ່ວໂມງ ແລະເຄື່ອງຈັກຜະລິດເຫຼົ້າ, ຢາແຜ່ນບາງ ແລະສະກັດນ້ຳໝັກ ໃບຢາສູບ. ນັບແຕ່ສ້າງຕັ້ງຂື້ນໃນປີ 2008 ບໍລິສັດໄດ້ນຳໃຊ້ເງີນລົງທືນ 9.660.000 ໂດລາສະຫະລັດ, ມາຮອດປີ 2022 ນີ້ ໄດ້ເພີ່ມການລົງທືນເປັນ 60.000.000 ໂດລາສະຫະລັດ ເຊີ່ງໃນແຕ່ລະປີໄດ້ມອບພັນທະໃຫ້ພາກລັດເປັນປົກກະຕິ ສະ ເພາະປີ 2021 ຜ່ານມາໄດ້ມອບພັນທະຫຼາຍກວ່າ 300 ລ້ານກີບ, ທັງປະຕິບັດນະໂຍບາຍເງີນເດືອນໃຫ້ພະນັກງານຢ່າງເໝາະສົມ. ໂອກາດນີ້ ທ່ານ ສອນໄຊ ສີພັນດອນ ໄດ້ມີຄຳເຫັນເນັ້ນໃຫ້ຄະນະນຳບໍລິສັດ ສືບຕໍ່ການຊຸກຍູ້ສົ່ງເສີມໃຫ້ປະຊາຊົນໃນແຂວງພາກເໜືອ ສຸມໃສ່ການປູກໃບຢາສູບເພື່ອປ້ອນເຂົ້າໂຮງງານ ທົດແທນການນຳສີນຄ້າເຂົ້າຈາກຕ່າງປະເທດ ແນໃສ່ສ້າງລາຍຮັບ ແລະວຽກເຮັດງານທຳໃຫ້ປະຊາຊົນລາວຫຼາຍຂື້ນ, ທັງສືບຕໍ່ປະກອບສ່ວນການພັດທະນາທ້ອງຖີ່ນແຂວງຫຼວງພະບາງ ໃຫ້ນັບມື້ດີຂື້ນ.
ນອກຈາກ ຢ້ຽມຢາມການດຳເນີນວຽກງານຂອງບໍລິສັດອຸດສາຫະກຳທັດໂທບັກໂກ ການຄ້າຂາອອກ-ຂາເຂົ້າຈຳກັດ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີພ້ອມດ້ວຍຄະນະ ໄດ້ຢ້ຽມຢາມຄອບຄົວຕົວແບບການລ້ຽງໝູ ຢູ່ບ້ານຊ່າງໄຫເມືອງປາກອູ ແລະຢ້ຽມຢາມຫ້ອງການບໍລິສັດໄອເອັດຈ໌ຊີມາໂບຈຳກັດຜູ້ດຽວ ເຊີ່ງເປັນບໍລິສັດລົງທືນຂຸດຄົ້ນຫີນອ່ອນມາໂບ ຢູ່ນະຄອນ-ຫຼວງພະບາງ ຕື່ມອີກ.
ຂ່າວ;ພາບ: ອາພຸດເດດ ບຸບຜາ
