ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຮອງນາຍົກລັດຖະມົນຕີເນັ້ນການນໍາໃຊ້ໄອຊີທີໃຫ້ເກີດປະໂຫຍດສູງສຸດເພື່ອພັດທະນາປະເທດຊາດ

ໃນຕອນບ່າຍຂອງວັນທີ 13 ກຸມພາ 2020 ນີ້, ທີ່ສູນການຮ່ວມມືລາວ-ຢີ່ປຸນ (ຫຼັກ 5), ນະຄອນຫຼວງວຽງຈັນ, ກອງປະຊຸມວຽກງານໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ປະຈໍາປີ 2019 ໄດ້ປິດລົງດ້ວຍຜົນສໍາເລັດອັນຈົບງາມ ໂດຍການເປັນປະທານ ແລະ ໃຫ້ກຽດໂອ້ລົມຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງີນ, ແລະ ໂດຍມີບັນດາທ່ານລັດຖະມົນຕີ, ຮອງລັດຖະມົນຕີ, ບັນດາຂະແໜງການທີ່ກ່ຽວຂ້ອງ ພ້ອມດ້ວຍ ແຂກທີ່ຖືກເຊີນເຂົ້າຮ່ວມ.

ໃນກອງປະຊຸມ, ທ່ານທັນສະໄໝ ກົມມະສິດ, ລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະ ການສື່ສານ ໄດ້ລາຍງານໃຫ້ຊາບກ່ຽວກັບຜົນຂອງກອງປະຊຸມວຽກງານ ໄປສະນີ, ໂທລະຄົມມະນາຄົມ ແລະ ການສື່ສານ ໃນປີ 2019 ແລະ ທິດທາງແຜນການ ປະຈໍາປີ 2020 ຊຶ່ງຈະໄດ້ສືບຕໍ່ຈັດຕັ້ງຜັນຂະຫຍາຍແນວທາງຂອງພັກ ແລະ ແຜນພັດທະນາເສດຖະກິດ-ສັງຄົມ ເພື່ອເຮັດໃຫ້ວຽກງານດັ່ງກ່າວ ກາຍເປັນກຳລັງຂັບເຄື່ອນທີ່ແຂງແຮງ ເຂົ້າໃນການພັດທະນາເສດຖະກິດ, ສັງຄົມ, ວັດທະນະທຳ, ສິ່ງແວດລ້ອມ, ວຽກງານປ້ອງກັນຊາດ, ປ້ອງກັນຄວາມສະຫງົບ ແລະ ການເຊື່ອມໂຍງກັບພາກພື້ນ ແລະ ສາກົນ.
ໃນໂອກາດນີ້, ທ່ານ ສົມດີ ດວງດີ ໄດ້ໃຫ້ກຽດໂອ້ລົມ ແລະ ຊີ້ນໍາຕໍ່ກອງປະຊຸມ, ໂດຍກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດທີ່ຍາດມາໄດ້ ຊຶ່ງສ່ອງແສງເຖິງຄວາມຮັບຜິດຊອບ ຂອງທຸກຂະແໜງການຕໍ່ວຽກງານໄອຊີທີ ເປັນຕົ້ນແມ່ນ ການເປັນເຈົ້າພາບຈັດກອງປະຊຸມລັດຖະມົນຕີອາຊຽນດ້ານໄອຊີທີ ທີ່ປະສົບຜົນສໍາເລັດຢ່າງຈົບງາມ. ພ້ອມນີ້, ທ່ານຍັງຍົກໃຫ້ເຫັນເຖິງຄວາມສໍາຄັນຂອງອິນເຕີເນັດ ແລະ ເຕັກໂນໂລຊີດິຈິຕອນ ຊຶ່ງນັບມື້ນັບມີຜົນກະທົບຕໍ່ການດໍາລົງຊີວິດຂອງຄົນເຮົາ ກໍ່ຄື ການພັດທະນາປະເທດ. ເພາະສະນັ້ນ, ແຕ່ລະຂະແໜງການ ກໍ່ຄື ບັນດາອົງການຈັດຕັ້ງລັດຕ່າງໆ ຕ້ອງຖືເອົາການນໍາໃຊ້ເຕັກໂນໂລຊີດິຈິຕອນ ເປັນໃຈກາງຂອງການຍົກສູງປະສິດຕິພາບ ແລະ ປະສິດຕິຜົນ ຂອງການປະຕິບັດງານ ແລະ ເພື່ອໃຫ້ບັນລຸວັດຖຸປະສົງ ບັນດາຂະແໜງການຄວນມີ ແຜນຍຸດທະສາດ ຫຼື ແຜນງານການນໍາໃຊ້ ໄອຊີທີ ໃນຂະແໜງການຂອງຕົນ ພ້ອມທັງ ມີການປະສານງານ ກັບ ກະຊວງ ປທສ ໃນການຈັດຕັ້ງປະຕິບັດ ເພື່ອຮັບປະກັນໃຫ້ມີການເຊື່ອມໂຍງລະຫວ່າງຂໍ້ມູນ ແລະ ຖານຂໍ້ມູນຂອງບັນດາອົງການຈັດຕັ້ງລັດ ໃຫ້ເປັນມາດຕະຖານດຽວກັນ, ຫຼີກລ້ຽງການລົງທຶນທີ່ຊໍ້າຊ້ອນ. ບັນດາຫ້ອງການຕ່າງໆກໍ່ຕ້ອງຕັ້ງໜ້າຫັນໄປສູ່ການບໍລິການແບບອອນລາຍ ເທື່ອລະກ້າວ; ໃນຂະນະທີ່ ບັນດາລັດວິສາຫະກິດກໍ່ຕ້ອງມີການປັບປຸງການດໍາເນີນທຸລະກິດ ໃຫ້ທັນກັບສະພາບການ, ສ້າງໃຫ້ມີນະວັດຕະກໍາໃໝ່ໃນການດໍາເນີນທຸລະກິດ, ເນັ້ນຫາຕົ້ນທຶນຄ່າໃຊ້ຈ່າຍທີ່ບໍ່ຈໍາເປັນ, ຫຼີກລ່ຽງການລົງທຶນທີ່ບໍ່ເກີດປະໂຫຍດ, ແຕ່ຕ້ອງຮູ້ຊ່ວຍເປີດໂອກາດໃຫ້ປະຊາຊົນ ຊອກຮູ້ຮໍ່າຮຽນສິ່ງໃໝ່ໆ ແລະ ຮັບເອົາກາລະໂອກາດຂອງການນໍາໃຊ້ໄອຊີທີ ໃຫ້ເກີດປະໂຫຍດສູງສຸດ ຢ່າງມີສະຕິ ແລະ ມີຈັນຍາບັນ, ຫຼີກເວັ້ນການຕົກເປັນເຫຍື່ອຂອງກຸ່ມຄົນບໍ່ດີ ທີ່ອາດຈະມີການເຜີຍແຜ່ຂໍ້ມູນຂ່າວສານທີ່ບໍ່ຖືກຕ້ອງ ຫຼື ຊັກຊວນໃຫ້ກະທໍາສິ່ງທີ່ຜິດຕໍ່ລະບຽບກົດໝາຍ.

ພ້ອມດຽວກັນນີ້, ທ່ານຮອງນາຍົກລັດຖະມົນຕີ ຍັງໄດ້ເນັ້ນໜັກໃຫ້ ຂະແໜງການ ປທສ ສືບຕໍ່ສ້າງ ແລະ ປັບປຸງນະໂຍບາຍ ແລະ ຍຸດທະສາດທີ່ຖືກຕ້ອງ ສອດຄ່ອງກັບແນວທາງນະໂຍບາຍ ລະບຽບກົດໝາຍຂອງພັກ-ລັດຖະບານ ກໍ່ຄື ສະພາບການປ່ຽນແປງຂອງດິຈິຕອນ ໃນແຕ່ລະໄລຍະ ອີກດ້ວຍ.

ຂ່າວ,​ພາບ: ກົມປະຊາສຳພັນ ສນຍ