ໃນຕອນບ່າຍຂອງວັນທີ 8ກຸມພາ 2023, ທີ່ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງຢ້ຽມຂໍ່ານັບທ່ານ ທ່ານ ປາເວວ ຕາຣາການົບ (Pavel Tarakanov) ປະທານຄະນະມິດຕະພາບລັດຖະສະພາ ຣັດເຊຍ-ລາວ ສະມາຊິກກໍາມາທິການງົບປະມານ ແລະ ການເງິນຕະຫຼາດ, ປະທານຄະນະມິດຕະພາບ ລັດຖະສະພາຣັດເຊຍ-ລາວ ຂອງສະພາສູງ ແຫ່ງ ສະຫະພັນ ຣັດເຊຍ ພ້ອມດ້ວຍຄະນໃນໂອກາດເດີນທາງມາຢ້ຽມຢາມເຮັດວຽກຢູ່ ສປປ ລາວ.
ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນທາງມາຢ້ຽມຢາມເຮັດວຽກຢູ່ ສປປ ລາວ ຂອງຄະນະຜູ້ແທນລັດເຊຍ ໃນຄັ້ງນີ້, ເຊິ່ງໄດ້ປະກອບສ່ວນສຳຄັນເຂົ້າໃນການຮັດແໜ້ນການພົວພັນຮ່ວມມື ລະຫວ່າງ ລາວ-ຣັດເຊຍ ທີ່ມີມູນເຊື້ອມາແຕ່ດົນນານ ເປັນຕົ້ນ ການພົວພັນຮ່ວມມືດ້ານການເມືອງ, ຄວາມຫມັ້ນຄົງ ແລະ ເສດຖະກິດ-ການຄ້າ ກໍຄືການເສີມຂະຫຍາຍຄວາມເຂົ້າໃຈ ລະຫວ່າງ ປະຊາຊົນສອງຊາດ ໃຫ້ນັບມື້ກ້າວຂຶ້ນສູ່ລະດັບໃຫມ່. ພ້ອມນີ້, ທ່ານຮອງນາຍົກ ຍັງໄດ້ສະແດງຄວາມຊົມເຊີຍຕໍ່ຜົນສໍາເລັດຂອງການພົບປະເຮັດວຽກ ລະຫວ່າງ ສອງຄະນະມິດຕະພາບລັດຖະສະພາ ລາວ-ຣັດເຊຍ ແລະ ຣັດເຊຍ-ລາວ ໃນວັນທີ 7 ກຸມພາ ທີ່ຜ່ານມາ, ເຊິ່ງສ່ອງແສງໃຫ້ເຫັນເຖິງການພົວພັນຮ່ວມມື ລະຫວ່າງ ສະພາແຫ່ງຊາດ ແຫ່ງ ສປປ ລາວ ແລະ ລັດຖະສະພາ ແຫ່ງ ສະຫະພັນຣັດເຊຍ ໄດ້ຮັບການສືບຕໍ່ເສີມຂະຫຍາຍຢ່າງຕໍ່ເນື່ອງ.ໃນໄລຍະຜ່ານມາ, ສອງອົງການນິຕິບັນຍັດດັ່ງກ່າວ ໄດ້ມີການການພົບປະແລກປ່ຽນຄະນະຜູ້ແທນຢ່າງເປັນປົກກະຕິ, ໃຫ້ການສະໜັບສະໜູນແລະ ຊ່ວຍເຫຼືອ ເຊິ່ງກັນແລະກັນຢູ່ໃນເວທີລັດຖະສະພາພາກພື້ນແລະສາກົນເພື່ອປະກອບ ສ່ວນໃນການສົ່ງເສີມສັນຕິພາບ, ສະຖຽນລະພາບແລະການຮ່ວມມືເພື່ອການພັດທະນາ. ພ້ອມດຽວກັນນັ້ນ, ທ່ານຮອງນາຍົກລັດຖະມົນຕີ ໄດ້ສະເໜີໃຫ້ຄະນະມິດຕະພາບລັດຖະສະພາ ຣັດເຊຍ-ລາວ ຊ່ວຍສືບຕໍ່ຊຸກຍູ້ພາກສ່ວນກ່ຽວຂ້ອງຂອງຣັດເຊຍ ໃນການສົ່ງເສີມການຮ່ວມມືທາງດ້ານເສດຖະກິດ-ການຄ້າ, ການລົງທຶນ ແລະ ການທ່ອງທ່ຽວ ໂດຍສະເພາະ ການໂຄສະນາດຶງດູດບັນດານັກລົງທຶນ ແລະ ນັກທ່ອງທ່ຽວ ຣັດເຊຍ ໃຫ້ເຂົ້າມາ ສປປ ລາວ ຫຼາຍຂຶ້ນຕື່ມໃນອະນາຄົດ.
ໃນຂະນະດຽວກັນ, ທ່ານ ປາເວວ ຕາຣາການົບ, ສະມາຊິກສະພາສູງ, ປະທານຄະນະມິດຕະພາບລັດຖະສະພາ ຣັດເຊຍ-ລາວ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງຝ່າຍລາວ ໃນຄັ້ງນີ້ ແລະ ສະແດງຄວາມຍິນດີຈະສືບຕໍ່ໃຫ້ການຮ່ວມມື ແລະ ສະໜັບສະໜູນ ສປປ ລາວ ໃນຕໍ່ໜ້າ, ອວຍພອນໃຫ້ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງຊາດ ຣັດເຊຍ-ລາວ ລາວ-ຣັດເຊຍ ຈົ່ງສືບຕໍ່ມີຜົນສຳເລັດອັນໃຫມ່ໃຫຍ່ກວ່າເກົ່າໃນອະນາຄົດ.
ໃນມື້ດຽວກັນ ທ່ານ ປາເວວ ຕາຣາການົບ ແລະຄະນະຍັງໄດ້ເຂົ້າຢ້ຽມຄໍານັບ ທ່ານນາງສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວວັດທະນະທໍາ ແລະທ່ອງທ່ຽວ, ພົບປະ ແລະ ເຮັດວຽກນໍາປະທານສະພາການຄ້າ ແລະອຸດສາຫະກໍາແຫ່ງ ສປປລາວ, ຢ້ຽມຂໍ່ານັບທ່ານ ພຸດ ສິມມາລາວົງ, ລັດຖະມົນຕີກະຊວງສຶກສາທິການ ແລະກິລາ ແລະ ຢ້ຽມຢາມສະຖານທີວັດທະນະທຳ ແລະ ທ່ອງທ່ຽວ ຈໍານວນໜຶ່ງ ຢູ່ນະຄອນຫຼວງວຽງຈັນ.
ສໍາລັບວັນທີ 9 ກຸມພາ 2023 ທ່ານ ປາເວວ ຕາຣາການົບ, ສະມາຊິກສະພາສູງ, ປະທານຄະນະມິດຕະພາບລັດຖະສະພາ ຣັດເຊຍ-ລາວ ແລະຄະນະ ໄດ້ສືບຕໍ່ເດີນທາງໄປເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ແຂວງຫຼວງພະບາງ ເພື່ອສຳຜັດກັບວັດທະນະທຳ, ຮີດຄອງປະເພນີ, ທໍາມະຊາດ ຂອງເມືອງມໍລະດົກໂລກ ຕື່ມອີກ.
