ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຮອງນາຍົກລັດຖະມົນຕີ ຕ້ອນຮັບຄະນະຊຽວຊານການແພດຫວຽດນາມ

ໃນຕອນເຊົ້າຂອງວັນທີ 9 ເມສາ 2020 ທີ່ ສຳນັກງານນາຍົກລັດຖະມົນຕີ, ນະຄອນຫຼວງວຽງຈັນ, ທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີ ກະຊວງການເງິນ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດໂຄວິດ-19 ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ຂອງຄະນະຊ່ຽວຊານການແພດ ຈາກກະຊວງປ້ອງກັນປະເທດ ແຫ່ງ ສສ ຫວຽດນາມ ຊຶ່ງນຳໂດຍທ່ານ ພົນຈັດຕະວາ ຫງວຽນ ຮຸງ ຖັງ, ຮອງຫົວໜ້າກົມໃຫຍ່ພະລາທິການກອງທັບປະຊາຊົນຫວຽດນາມ ໃນໂອກາດມາເຄື່ອນໄຫວເຮັດວຽກ ຊ່ວຍ ເກັບກຳຂໍ້ມູນ ແລະ ວາງແຜນ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດໂຄວິດ-19 ຢູ່ ສປປ ລາວ ຕາມຄຳສະເໜີ ຂອງລັດຖະບານ ກໍ່ຄືກະຊວງປ້ອງກັນປະເທດ ແຫ່ງ ສປປ ລາວ.

ໃນໂອກາດດັ່ງກ່າວ, ທ່ານ ສົມດີ ດວງດີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ຄະນະຊ່ຽວຊານດັ່ງກ່າວ ທີ່ໄດ້ເດີນທາງມາເຄື່ອນໄຫວເຮັດວຽກ ຊ່ວຍເຫຼືອສປປ ລາວ ໃນການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດໂຄວິດ-19 ໃນຄັ້ງນີ້, ພ້ອມທັງ ຕີລາຄາສູງຕໍ່ບົດຮຽນ, ປະສົບການ ແລະ ຄວາມພ້ອມທາງດ້ານການແພດຂອງ ສສ ຫວຽດນາມ ໃນການຮັບມືກັບການແຜ່ລະບາດ ຂອງເຊື້ອພະຍາດໂຄວິດ-19 ກໍ່ຄື ຄະນະຊ່ຽວຊານທີ່ເດີນທາງມາເຄື່ອນໄຫວເຮັດວຽກຢູ່ ສປປ ລາວ ໃນຄັ້ງນີ້, ຊຶ່ງເຊື່ອໝັ້ນວ່າ ຄະນະຊ່ຽວຊານ ຈະເກັບກຳຂໍ້ມູນ, ຖ່າຍທອດບົດຮຽນ ແລະ ປະສົບການ ໃຫ້ແກ່ພາກສ່ວນທີ່ກ່ຽວຂ້ອງ ຂອງ ສປປ ລາວ ເພື່ອນຳໄປໝູນໃຊ້ເຂົ້າໃນການຈັດຕັ້ງປະຕິບັດວຽກງານຕົວຈິງ ໃຫ້ມີ ປະສິດທິພາບ ແລະ ປະສິດທິຜົນ ສາມາດຮັບມືກັບການແຜ່ລະບາດ ຂອງເຊື້ອພະຍາດໂຄວິດ-19 ຢູ່ ສປປ ລາວ. ນອກຈາກນັ້ນ, ທ່ານ ຮອງນາຍົກລັດຖະມົນຕີ ຍັງໄດ້ແຈ້ງສະພາບການແຜ່ລະບາດ ຂອງເຊື້ອພະຍາດໂຄວິດ-19 ຢູ່ ສປປ ລາວ ໃນປະຈຸບັນ ໃຫ້ຄະນະຊ່ຽວຊານ ໄດ້ຮັບຊາບ, ລວມທັງ ການວາງ ແລະ ປະຕິບັດມາດຕະການຕ່າງໆ ຂອງລັດຖະບານ, ສະພາບຄວາມສ່ຽງ, ຄວາມພ້ອມ ແລະ ຂໍ້ຈຳກັດ ທາງດ້ານຕ່າງໆ ໃນການຮັບມືກັບການແຜ່ລະບາດຂອງເຊື້ອພະຍາດ ທີ່ອາດເພີ່ມຂຶ້ນໃນຕໍ່ໜ້າ ໂດຍສະເພາະ ຢູ່ຂັ້ນທ້ອງຖິ່ນ. ໃນໂອກາດດຽວກັນ, ທ່ານ ຮອງນາຍົກລັດຖະມົນຕີ ຍັງໄດ້ສະເໜີ ໃຫ້ຄະນະຊ່ຽວຊານຫວຽດນາມ ພິຈາລະນາໃຫ້ການຊ່ວຍເຫຼືອ ແລະ ນຳເອົາຂໍ້ມູນໄປຄົ້ນຄວ້າຕື່ມ ເປັນຕົ້ນ ລົງເກັບກຳຂໍ້ມູນ ຢູ່ບາງທ້ອງຖິ່ນ ທີ່ມີຄວາມສ່ຽງ ເກີດການແຜ່ລະບາດຂອງເຊື້ອພະຍາດໂຄວິດ-19 ເພື່ອນໍາໄປຄົ້ນຄວ້າ ແລະ ວາງແຜນ ໃນການຮັບມືກັບສະພາບຄວາມບໍ່ແນ່ນອນ ທີ່ອາດເກີດຂຶ້ນໃນຕໍ່ໜ້າ; ຝຶກອົບຮົມ ຖ່າຍທອດບົດຮຽນ ແລະ ປະສົບການ ໃຫ້ແກ່ພະນັກງານ ແລະ ເຈົ້າໜ້າທີ່ລາວທີ່ກ່ຽວຂ້ອງ ໃນການປະຕິບັດວຽກງານສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດໂຄວິດ-19 ທັງຢູ່ຂັ້ນສູນກາງ ແລະ ທ້ອງຖິ່ນ ໂດຍມອບໃຫ້ພາກສ່ວນທີ່ກ່ຽວຂ້ອງ ຂອງກະຊວງປ້ອງກັນປະເທດ ແຫ່ງ ສປປ ລາວ ເປັນໃຈກາງປຶກສາຫາລື, ວາງແຜນ ແລະ ເຄື່ອນໄຫວ ຮ່ວມກັບຄະນະຊ່ຽວຊານສສ ຫວຽດນາມດັ່ງກ່າວ.

ໃນຕອນທ້າຍ, ທ່ານ ພົນຈັດຕະວາ ຫງວຽນ ຮຸງ ຖັງ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ສະໜິດສະໜົມ ຂອງທ່ານ ຮອງນາຍົກລັດຖະມົນຕີ ແຫ່ງ ສປປ ລາວ, ພ້ອມທັງ ແຈ້ງໃຫ້ທ່ານ ຮອງນາຍົກລັດຖະມົນຕີ ໄດ້ຮັບຊາບ ກ່ຽວກັບບາງບົດຮຽນ ແລະ ປະສົບການ ຂອງ ສສ ຫວຽດນາມ ໃນການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງເຊື້ອພະຍາດໂຄວິດ-19 ກໍ່ຄື ມາດຕະການຕ່າງໆ ທີ່ເຫັນວ່າ ມີປະສິດທິພາບ ແລະ ປະສິດທິຜົນ.

ພາບ ແລະ ຂ່າວ: ກົມປະຊາສຳພັນ ຫສນຍ