ຄະນະຜູ້ແທນສະມາຄົມມິດຕະພາບ ຫວຽດນາມ-ລາວ ຂັ້ນສູນກາງ ນໍາໂດຍ ສະຫາຍຫງວຽນ ດັກວິງ ກຳມະການສູນກາງພັກຄະນະປະຈຳສະພາແຫ່ງຊາດ ປະທານກຳມາທິການວັດທະນະທຳ- ກິລາ ຂອງສະພາແຫ່ງຊາດປະທານສະມາຄົມມິດຕະພາບ ຫວຽດນາມ-ລາວ ຂັ້ນສູນກາງພ້ອມຄະນະໄດ້ເຂົ້າຢ້ຽມຂໍ່ານັບ ສະຫາຍ ກິແກ້ວ ໄຂຄໍາພິທູນ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ໃນວັນທີ 18 ກໍລະກົດນີ້ ທີ່ຫ້ອງວ່າການສຳນັກງານນາຍົກລັດຖະມົນຕີ ໃນໂອກາດທີ່ຄະນະຜູ້ແທນເດີນທາງມາຢ້ຽມຢາມແລະເຂົ້າຮ່ວມກອງປະຊຸມທົ່ວປະເທດຄັ້ງທີ III ຂອງສະມາຄົມມິດຕະພາບ ລາວ -ຫວຽດນາມ ແຕ່ວັນທີ 18-20 ກໍລະກົດ 2024 ທີ່ນະຄອນຫຼວງວຽງຈັນ
ສະຫາຍ ກິແກ້ວ ໄຂຄຳພິທູນໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການຢ້ຽມຢາມ ຂອງຄະນະຜູ້ແທນ ຖືເປັນການປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນລາວ-ຫວຽດນາມ. ພ້ອມນັ້ນຍັງໄດ້ສະແດງຄວາມຊົມເຊີຍຕໍ່ການເຄື່ອນໄຫວ ຂອງສະມາຄົມມິດຕະພາບ ຫວຽດນາມ-ລາວ ທີ່ໄດ້ສົມທົບກັບຄູ່ຮ່ວມມື ຂອງລາວ ເຄື່ອນໄຫວໂຄສະນາສຶກສາອົບຮົມ ປະຊາຊົນສອງປະເທດ ໂດຍສະເພາະຄົນຮຸ່ນໃໝ່ ໃຫ້ເຂົ້າໃຈຈະແຈ້ງ, ເລິກເຊິ່ງຕໍ່ສາຍພົວພັນ ລາວ- ຫວຽດນາມ. ສະຫາຍປະທານສະມາຄົມມິດຕະພາບ ຫວຽດນາມ-ລາວ ສະແດງຄວາມຂອບໃຈຕໍ່ ການຕ້ອນຮັບອັນອົບອຸ່ນ, ທັງໄດ້ໄດ້ແຈ້ງຈຸດປະສົງ, ລາຍງານສະພາບການພົ້ນເດັ່ນການພັດທະນາ ຂອງ ສສ ຫວຽດນາມ ແລະ ການເຄື່ອນໄຫວຂອງສະມາຄົມມິດຕະພາບ ຫວຽດນາມ-ລາວ ໃຫ້ຊາບ. ສອງຝ່າຍ ຕີລາຄາສູງ ແລະ ປິຕິຍິນດີ ທີ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຫວຽດນາມ ຍັງສືບຕໍ່ໄດ້ຮັບການເສີມຂະຫຍາຍ ແລະ ເພີ່ມພູນຄູນສ້າງ ໃຫ້ຂຽວສົດງົດງາມ, ເກີດດອກອອກຜົນ ນໍາເອົາຜົນປະໂຫຍດມາສູ່ປະຊາຊົນສອງປະເທດ.
ໃນຕອນເຊົ້າຂອງວັນດຽວກັນ ໄດ້ມີກອງປະຊຸມພົບປະລະຫວ່າງ ສະມາຄົມມີດຕະພາບ ລາວ-ຫວຽດນາມ ແລະ ຫວຽດນາມ -ລາວ ຂັ້ນສູນກາງ. ຝ່າຍ ລາວ ນໍາໂດຍ ສະຫາຍ ບໍ່ວຽງຄໍາ ວົງດາລາ ກໍາມະການສູນກາງພັກ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ປະທານສະມາຄົມມິດຕະພາບ ລາວ-ຫວຽດນາມ ຂັ້ນສູນກາງ; ຝ່າຍ ຫວຽດນາມ ນໍາໂດຍ ສະຫາຍ ຫງວຽນ ດັກວິງ ກຳມະການສູນກາງພັກຄະນະປະຈຳສະພາແຫ່ງຊາດ ປະທານກຳມາທິການ ວັດທະນະທຳ-ກິລາ ສະພາແຫ່ງຊາດ ປະທານສະມາຄົມມິດຕະພາບຫວຽດນາມ-ລາວ ຂັ້ນສູນກາງ.
ໃນກອງປະຊຸມ ສອງຝ່າຍ ໄດ້ທົບທວນຕີລາຄາຄືນການພົວ ພັນຮ່ວມມື ແລະ ຈັດກິດຈະກໍາຮ່ວມກັນໃນໄລຍະຜ່ານມາ ແລະ ປຶກສາຫາລືທິດທາງແຜນການພົວພັນຮ່ວມມືໃນຕໍ່ໜ້າ ໂດຍສະເພາະກິດຈະກໍາຕິດພັນກັບວັນສໍາຄັນຂອງສອງປະເທດ. ພ້ອມນັ້ນສອງຝ່າຍຍັງໄດ້ແຈ້ງສະພາບການພົ້ນເດັ່ນຂອງແຕ່ລະປະເທດໃຫ້ກັນຊາບ. ສອງຝ່າຍເຫັນດີຈະສືບກົນໄກປະສານງານ, ແລກປ່ຽນ ແລະ ສ້າງກິດຈະກໍາຮ່ວມກັນ ເພື່ອປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ – ຫວຽດນາມ ໃຫ້ນັບມື້ເຂົ້າສູ່ລວງເລິກ, ຂຽວສົດງົດງາມ ແລະ ເກີດດອກອອກຜົນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ ແລະ ຫວຽດນາມ.
ຂ່າວ-ພາບ:ສຳນານ
