ຮອງນາຍົກລັດຖະມົນຕີ, ລັດຖະມົນ ຕີກະຊວງການຕ່າງປະເທດ ຕ້ອນຮັບການເຂົ້າຢ້ຽມຂໍ່ານັບຂອງ ບັນດາທູດປະເທດເພື່ອນມິດ

ໃນຕອນເຊົ້າຂອງວັນທີ 3 ພະຈິກ 2023, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ບັນດາທູດປະເທດເພື່ອນມິດ ໃນໂອກາດມາຮັບໜ້າທີ່ໃໝ່ ຢູ່ ສປປ ລາວ, ເຊິ່ງມີລາຍລະອຽດດັ່ງນີ້:

1. ທ່ານ ມຽດ ເທັດ ອູ (Myat Thet Oo), ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ສະຫະພັາບ ມຽນມາ ປະຈໍາ ສປປ ລາວ;

2. ທ່ານ ປຣາຊານຕ໌ ອາເກີ່ວາລ (Prashant AGRAWAL), ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສາທາລະນະລັດ ອິນເດຍ;

3. ທ່ານ ນາງ ກຣາຕ້າ ເອັນດາ ເວີດັນນິງຕີຢາດ (Grata Endah Werdaningtyas), ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ອິນໂດເນເຊຍ; ແລະ

4. ທ່ານ ຊູເດສ ມາເນຍ (Sudesh Maniar), ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ສິງກະໂປ ປະຈໍາ ສປປ ລາວ.

ໃນໂອກາດນີ້, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ສະແດງຄວາມຊົມເຊີຍ ຕໍ່ ບັນດາທູດ ທີ່ໄດ້ຖືກແຕ່ງຕັ້ງໃຫ້ມາດໍາລົງຕໍາແໜ່ງເປັນເອກອັກຄະລັດຖະທູດ ວິສາມັນຜູ້ມີອໍານາດເຕັມ ປະຈໍາ ສປປ ລາວ ໃນຄັ້ງນີ້. ພ້ອມນີ້, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ກໍ່ໄດ້ຕີລາຄາສູງຕໍ່ການພົວພັນຮ່ວມມື ຂອງ ສປປ ລາວ ກັບ ສສ ມຽນມາ, ສ. ອິນເດຍ, ສ. ອິນໂດເນເຊຍ ແລະ ສ. ສິງກະໂປ ໃນໄລຍະຜ່ານມາ ທັງໃນຂອບສອງຝ່າຍ ແລະ ຫຼາຍຝ່າຍ ທີ່ໄດ້ຮັບການເສີມຂະຫຍາຍເປັນກ້າວໆ, ແລະ ຍັງໄດ້ສະແດງຄວາມຫວັງວ່າ ບັນດາທູດ ຈະສືບຕໍ່ເຮັດສຸດຄວາມສາມາດຂອງຕົນໃນການເສີມຂະຫຍາຍການພົວພັນຮ່ວມມື ລະຫວ່າງປະເທດຂອງຕົນ ແລະ ສປປ ລາວ ໃຫ້ນັບມື້ນັບດີຂຶ້ນ, ພ້ອມທັງໄດ້ອວຍພອນໃຫ້ ບັນດາ ທູດ ຈົ່ງປະສົບຜົນສໍາເລັດຕາມຄາດໝາຍຕະຫຼອດໄລຍະການປະຕິບັດໜ້າທີ່ການທູດ ຢູ່ ສປປ ລາວ. ນອກນີ້, ຍັງໄດ້ແຈ້ງໃຫ້ ບັນດາທູດ ຊາບກ່ຽວກັບ ຄວາມຄືບໜ້າໃນການກະກຽມຄວາມພ້ອມການເປັນປະທານອາຊຽນ ຂອງ ສປປ ລາວ ໃນປີ 2024, ລວມເຖິງການເປີດປີທ່ອງທ່ຽວລາວໃນປີໜ້າ ທັງຍັງໄດ້ເຊື້ອເຊີນນັກທ່ອງທ່ຽວ ແລະ ນັກລົງທຶນ ຂອງທັງ 4 ປະເທດ ເຂົ້າມາທ່ອງທ່ຽວ ແລະ ລົງທຶນໃນຂະແໜງການທີ່ມີທ່າແຮງ ແລະ ມີຄວາມສົນໃຈ ຢູ່ ສປປ ລາວ.

ໃນຂະນະດຽວກັນ, ບັນດາທູດ ກໍໄດ້ສະແດງຄວາມຂອບໃຈຢ່າງສູງ ຕໍ່ການຕ້ອນຮັບອັນອົບອຸ່ນຂອງ ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ, ສະແດງຄວາມປິຕິຍິນດີທີ່ຖືກແຕ່ງຕັ້ງມາເປັນເອກອັກຄະລັດຖະທູດ ປະຈໍາ ສປປ ລາວ ໃນຄັ້ງນີ້, ທັງຍັງໄດ້ສະແດງຄວາມຍິນດີ ທີ່ຈະສືບຕໍ່ໃຫ້ການຮ່ວມມື ແລະ ການສະໜັບສະໜູນ ສປປ ລາວ, ລວມເຖິງການເປັນປະທານອາຊຽນຂອງ ໃນປີ 2024 ໃຫ້ປະສົບຜົນສໍາເລັດຕາມລະດັບຄາດໝາຍ. ນອກນັ້ນ, ບັນດາທູດ ຍັງໄດ້ສະແດງຄວາມໝາຍໝັ້ນວ່າ ໃນໄລຍະການປະຕິບັດໜ້າທີ່ການທູດຂອງຕົນ ຢູ່ ສປປ ລາວ ຈະເຮັດສຸດຄວາມສາມາດເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການພົວພັນຮ່ວມມືທີ່ດີ ລະຫວ່າງ ປະເທດຕົນ ແລະ ສປປ ລາວ ໃຫ້ນັບມື້ນັບໄດ້ຮັບການພັດທະນາຂຶ້ນເລື້ອຍໆ.

ຂ່າວ;ພາບ: ກົມການຂ່າວ ກະຊວງການຕ່າງປະເທດ