ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດລາວ ຢ້ຽມຂໍ່ານັບການນໍາຂັ້ນສູງຫວຽດນາມ

ໃນຕອນບ່າຍຂອງວັນທີ 22 ພະຈິກ 2023, ສະຫາຍ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ເຂົ້າຢ້ຽມຂໍ່ານັບ ສະຫາຍ ຫວໍ້ ວັນ ເຖື່ອງ, ປະທານປະເທດ ແຫ່ງ ສສ ຫວຽດນາມ ແລະ ສະຫາຍ ຟ້າມ ມິງ ຈິງ, ນາຍົກລັດຖະມົນຕີ ແຫ່ງ ສສ ຫວຽດ ນາມ ໃນໂອກາດນໍາພາຄະນະເດີນທາງຢ້ຽມຢາມເຮັດວຽກ ແລະ ເຂົ້າຮ່ວມກອງປະຊຸມປຶກສາຫາລືດ້ານການເມືອງ ຂັ້ນລັດຖະມົນຕີ ຄັ້ງທີ 10 ລະຫວ່າງສອງກະຊວງນການຕ່າງປະເທດ ລາວ- ຫວຽດນາມ ໃນລະຫວ່າງວັນທີ 21-23 ພະຈິກ 2023.

ໃນໂອກາດນີ້, ສະຫາຍ ການນໍາຂັ້ນສູງຫວຽດນາມ ໄດ້ສະແດງຄວາມຍິນດີຕ້ອນຮັບດ້ວຍໄມຕີຈິດມິດຕະພາບອັນສະ ໜິດສະໜົມ ແລະ ຕີລາຄາສູງຕໍ່ການຢ້ຽມຢາມ ສສ ຫວຽດນາມ ຂອງ ສະຫາຍ ສະເຫຼີມໄຊ ກົມມະສິດ ແລະ ຄະນະ ໃນຄັ້ງນີ້, ເຊິ່ງເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍ ແລະ ຮັດແໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ ແລະ ຫວຽດນາມ. ໃນຂະນະດຽວກັນ, ສະ ຫາຍ ສະເຫຼີມໄຊ ກົມມະສິດ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນໃນຄັ້ງນີ້, ເຊິ່ງສະແດງເຖິງຄວາມເອົາໃຈໃສ່ ແລະ ໃຫ້ຄວາມສຳຄັນຕໍ່ສາຍພົວພັນພິເສດສອງປະເທດ ລາວ -ຫວຽດນາມ, ທັງຍັງເປັນການສະແດງເຖິງຄວາມມີຊີວິດຊີວາຂອງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະ ຫວ່າງ ສອງພັກ, ສອງລັດ ແລະ ປະຊາຊົນຂອງສອງຊາດ ລາວ-ຫວຽດນາມ. ພ້ອມນີ້, ສະຫາຍ ສະເຫຼີມໄຊ ກົມມະສິດ ກໍ່ໄດ້ນໍາເອົາຄໍາຢື້ຢາມຖາມຂ່າວອັນສະໜິດສະ ໜົມ ຈາກ ສະຫາຍ ປະທານປະເທດ ທອງລຸນ ສີສຸລິດ; ສະຫາຍ ປະທານສະພາ ໄຊສົມພອນ ພົມວິຫານ ແລະ ສະຫາຍ ນາຍົກລັດຖະມົນຕີ ສອນໄຊ ສີພັນດອນ ແລະ ການນໍາສະຫາຍອື່ນໆ ເຖິງ ສະຫາຍ ປະທານປະເທດ ຫວໍ້ ວັນ ເຖື່ອງ ແລະ ສະຫາຍ ນາຍົກລັດຖະມົນຕີ ຟ້າມ ມິງ ຈິງ ລວມໄປເຖິງການນໍາພັກ-ລັດຖະບານ ແລະ ປະຊາຊົນຫວຽດ ນາມອ້າຍນ້ອງທຸກຖ້ວນໜ້າ ແລະ ຍັງໄດ້ແຈ້ງໃຫ້ຊາບເຖິງຜົນຂອງການປຶກສາຫາລືກັບ ສະຫາຍ ລັດຖະມົນຕີ ບຸ່ຍ ແທັງ ເຊີນ ກ່ຽວກັບ ການພົວພັນຮ່ວມມືຮອບດ້ານ ລະຫວ່າງ ສອງປະເທດ, ໂດຍສະ ເພາະແມ່ນການພົວພັນຮ່ວມມືລະຫວ່າງສອງກະຊວງການຕ່າງປະເທດ ໃນກອງປະຊຸມປຶກສາຫາລືດ້ານການເມືອງ ຂັ້ນລັດຖະມົນຕີ ຄັ້ງທີ 10 ລະຫວ່າງສອງກະຊວງນການຕ່າງປະເທດ ລາວ-ຫວຽດນາມ.

ໃນໂອກາດດຽວກັນນີ້, ສອງຝ່າຍ ຍັງໄດ້ເປັນເອກະພາບກັນຕີລາຄາສູງຕໍ່ການພົວພັນຮ່ວມມືຂອງສອງປະເທດ, ເຊິ່ງການພົວພັນຮ່ວມມື ແລະ ການສະໜັບ ສະໜູນຊ່ວຍເຫຼືອ ເຊິ່ງກັນ ແລະ ກັນ ຂອງສອງປະເທດ ໄດ້ຮັບການເພີ່ມທະວີ ແລະ ນັບມື້ນັບແໜ້ນແຟ້ນຍິ່ງໆຂຶ້ນໃນທຸກຂົງເຂດ; ການແລກປ່ຽນການຢ້ຽມ ຢາມເຊິ່ງກັນ ແລະ ກັນຂອງຄະນະຜູ້ແທນຂັ້ນຕ່າງໆມີຢ່າງເປັນປົກກະຕິ ແຕ່ສູນກາງຮອດທ້ອງຖິ່ນ; ການຈັດຕັ້ງຜັນຂະຫຍາຍຂໍ້ຕົກລົງລະຫວ່າງສອງກົມການເມືອງ ກໍ່ຄືຜົນຂອງກອງປະຊຸມຄະນະກໍາມະການຮ່ວມມືສອງລັດຖະບານ ຄັ້ງທີ 45 ກໍເຫັນໄດ້ວ່າມີປະສີດພາບ ແລະ ປະສິດທິຜົນ; ໂດຍສະເພາະແມ່ນທ້າຍປີນີ້ຮອດຕົ້ນປີ 2024, ສອງປະເທດພວມກະກຽມໃຫ້ແກ່ການພົບປະລະຫວ່າງສອງກົມການເມືອງ, ກອງປະຊຸມຄະນະກຳມະການຮ່ວມມື ລະຫວ່າງສອງລັດຖະບານ ຄັ້ງທີ 46 ທີ່ ຈະມີຂຶ້ນຢູ່ ສສ ຫວຽດນາມ. ພ້ອມນີ້, ສະຫາຍ ປະທານປະເທດ ແລະ ສະຫາຍ ນາຍົກລັດຖະມົນຕີ ແຫ່ງ ສສ ຫວຽດນາມ ຍັງໄດ້ຢືນຢັນຄືນວ່າ ຈະໃຫ້ການຊ່ວຍເຫຼືອແກ່ ສປປ ລາວ ໃນການເປັນປະທານ ອາຊຽນ ໃນປີ 2024 ນີ້.

ຂ່າວ;ພາບ: ກົມການຂ່າວ ກະຊວງການຕ່າງປະເທດ