ໃນໄລຍະເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ແບບວົງແຄບ ທີ່ ສປປ ລາວ ເປັນເຈົ້າພາບ, ເຊິ່ງຈັດຂຶ້ນ ຢູ່ນະຄອນຫຼວງພະບາງ.ໃນວັນທີ 29 ມັງກອນ 2024, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະ ມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ສືບຕໍ່ພົບປະສອງຝ່າຍກັບ ທ່ານ ໂມຮາມັດ ຮາຊານ (H.E. Mohamad Hasan), ລັດຖະມົນຕີກະຊວງການຕ່າງປະເທດ ແຫ່ງ ມາເລເຊຍ.
ໃນໂອກາດດັ່ງກ່າວ, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ທ່ານ ໂມຮາມັດ ຮາຊານ ທີ່ໄດ້ຮັບການແຕ່ງຕັ້ງໃຫ້ດໍາລົງຕໍາແໜ່ງເປັນລັດຖະມົນຕີກະຊວງການຕ່າງປະເທດ ແຫ່ງ ມາເລເຊຍ ຄົນໃໝ່ ໃນເດືອນທັນວາ 2023 ທີ່ຜ່ານມາ. ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງສອງປະເທດທີ່ໄດ້ຮັບການພັດທະນາ ແລະ ເສີມຂະຫຍາຍຢ່າງຕໍ່ເນື່ອງ ນັບຕັ້ງແຕ່ການສ້າງຕັ້ງສາຍພົວພັນການທູດນໍາກັນ ນັບແຕ່ປີ 1966 ເປັນຕົ້ນມາ, ພ້ອມທັງຕີລາຄາສູງຕໍ່ຜົນສໍາເລັດຂອງການຢ້ຽມຢາມ ສປປ ລາວ ຢ່າງເປັນທາງການ ຂອງ ທ່ານ ດາໂຕະ ເຊຣິ ອັນວາ ບິນ ອິບບຣາຮິມ (H.E. Dato Seri Anwar Bin Ibrahim), ນາຍົກລັດຖະ ມົນຕີ ແຫ່ງ ມາເລເຊຍ ໃນເດືອນມິຖຸນາ 2023 ທີ່ຜ່ານມາ, ເຊິ່ງຈະສືບຕໍ່ເຮັດວຽກຮ່ວມກັນຢ່າງໃກ້ຊິດໃນການຜັນຂະຫຍາຍຜົນການຢ້ຽມຢາມດັ່ງກ່າວໃຫ້ເປັນຮູບປະທໍາເທື່ອລະກ້າວ.
ສອງຝ່າຍ ຍັງໄດ້ໄດ້ຕີຄລາຄາສູງຕໍ່ຜົນສໍາເລັດຂອງກອງປະຊຸມລັດຖະມົນຕີຕ່າງປະເທດອາຊຽນ ແບບວົງແຄບ ທີ່ຫາກໍ່ສໍາເລັດລົງຢ່າງຈົບງາມ, ເຊິ່ງຝ່າຍມາເລເຊຍໄດ້ຢືນຢັນຄືນຄໍາໝາຍໝັ້ນຂອງຕົນໃນການສືບຕໍ່ສະໜັບສະໜູນການເປັນປະທານອາຊຽນ 2024 ຂອງ ສປປ ລາວ. ພ້ອມດຽວກັນນັ້ນ, ສອງລັດຖະມົນຕີຕ່າງປະເທດ ລາວແລະມາເລເຊຍ ຍັງໄດ້ເຫັນດີເປັນເອກະພາບ ໃນການສືບຕໍ່ສົ່ງເສີມການຮ່ວມມືດ້ານການຄ້າ, ການລົງທຶນ, ພະລັງງານ, ດິຈິຕັອນ,ການເງິນແລະການທ່ອງທ່ຽວ, ກໍຄືການສົ່ງເສີມການໄປມາຫາສູ່ຂອງປະຊາຊົນສອງຊາດລາວແລະມາເລເຊຍເພີ່ມຂຶ້ນໃນຕໍ່ຫນ້າ,ລວມທັງການສືບຕໍ່ສະໜັບສະໜູນເຊິ່ງກັນ ແລະ ກັນ ເພື່ອສົ່ງເສີມການຮ່ວມມື ແລະ ການພັດທະນາຂອງຂົງເຂດພາກພື້ນ ແລະ ສາກົນ.
ໃນໂອກາດນີ້, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນ ມາເລເຊຍ ທີ່ໄດ້ສະໜັບສະໜູນ ແລະ ຊ່ວຍເຫຼືອ ສປປ ລາວ ຕະຫຼອດໄລຍະຜ່ານມາ ໂດຍສະເພາະ ການຊ່ວຍເຫຼືອໃນການພັດທະນາຊັບພະຍາກອນມະນຸດ, ລວມທັງການສະຫນັບສະຫນູນການເປັນປະທານອາຊຽນ 2024 ຂອງ ສປປ ລາວ.
