ໃນຕອນເຊົ້າຂອງວັນທີ 07 ມິຖຸນາ 2024, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ຊຸນ ເວີ້ຍ ຕົ່ງ, ຮອງລັດຖະມົນຕີ ກະຊວງການຕ່າງປະເທດ ແຫ່ງ ສປ ຈີນ, ທັງເປັນຫົວໜ້າເຈົ້າໜ້າທີ່ອະວຸໂສວຽກງານອາຊຽນຂອງ ສປ ຈີນ, ໃນໂອກາດທີ່ເດີນທາງມາເຂົ້າຮ່ວມ ກອງປະຊຸມເຈົ້າຫນ້າທີ່ອາວຸໂສອາຊຽນ-ສປ ຈີນ ແລະ ກອງປະຊຸມກ່ຽວຂ້ອງຕ່າງໆ, ທີ່ ນະຄອນຫຼວງວຽງຈັນ.
ໃນໂອກາດດັ່ງກ່າວ, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອ ແລະ ການພົວພັນຄູ່ຮ່ວມຍຸດທະສາດ ຮອບດ້ານໝັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊະຕາກໍາ ລາວ-ຈີນ, ຈີນ-ລາວ, ເຊິ່ງໃນໄລຍະຜ່ານມາ ໄດ້ນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ. ພ້ອມນີ້, ສອງຝ່າຍ ກໍ່ໄດ້ເຫັນດີເປັນເອກະພາບຕີລາຄາສູງຕໍ່ການພົວພັນດ້ານການເມືອງ ແມ່ນສືບຕໍ່ໄດ້ຮັບການເສີມຂະຫຍາຍ ໃນລະດັບດີທີ່ສຸດ, ມີຄວາມໜັກແໜ້ນ ແລະ ໄວ້ເນື້ອເຊື້ອໃຈຊຶ່ງກັນ ແລະ ກັນສູງ, ສອງຝ່າຍ ໄດ້ຮ່ວມກັນຈັດຕັ້ງຜັນຂະຫຍາຍຜົນຂອງການຕົກລົງເຫັນດີເປັນເອກະພາບຂອງການນໍາສູງສຸດ ຂອງສອງປະເທດ ລາວ-ຈີນ ໃນໄລຍະຜ່ານມາຢ່າງຕັ້ງໜ້າ ແລະ ເປັນຮູບປະທໍາເທື່ອລະກ້າວ, ການຮ່ວມມືດ້ານເສດຖະກິດ-ການຄ້າ ໄດ້ສືບຕໍ່ມີບາດກ້າວຂະຫຍາຍຕົວຢ່າງເຂັ້ມແຂງ ແລະ ໄດ້ຮັບຜົນຢ່າງຫນ້າເພິ່ງພໍໃຈ, ອັນພົ້ນເດັ່ນ ແມ່ນສິນຄ້າກະສິກໍາຂອງລາວທີ່ສົ່ງອອກໄປຈີນ ແມ່ນມີຈໍານວນເພີ່ມຂຶ້ນ, ເຊິ່ງໄດ້ນໍາເອົາຜົນປະໂຫຍດໂດຍກົງມາສູ່ຊາວກະສິກອນລາວ, ແນໃສ່ສ້າງວຽກເຮັດງານທຳເພີ້ມຂຶ້ນ ແລະ ຊ່ວຍ ສປປ ລາວ ໃນການແກ້ໄຂຄວາມທຸກຍາກຂອງປະຊາຊົນ.
ພ້ອມນີ້, ສອງຝ່າຍ ກໍ່ໄດ້ສະແດງຄວາມຍິນດີຕໍ່ການເປີດນໍາໃຊ້ເສັ້ນທາງລົດໄຟ ລາວ-ຈີນ ທີ່ໄດ້ກາຍເປັນແຮງຂັບເຄື່ອນທີ່ສໍາຄັນໃນການຊຸກຍູ້ການພົວພັນການຄ້າ, ການໄປມາຫາສູ່ລະຫວ່າງປະຊາຊົນດ້ວຍກັນ, ການຮ່ວມມືດ້ານວັດທະນະທໍາ, ການສຶກສາ, ການທ່ອງທ່ຽວ ແລະ ອື່ນໆ ກໍ່ໄດ້ຮັບການພັດທະນາ ແລະ ແຕກດອກອອກຜົນຢ່າງບໍ່ຢຸດຢັ້ງ, ສິ່ງດັ່ງກ່າວ ໄດ້ປະກອບສ່ວນອັນສໍາຄັນເຂົ້າໃນການເຊື່ອມຈອດຢ່າງເປັນຮູບປະທໍາ.
ໃນໂອກາດດຽວກັນ, ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ກໍ່ໄດ້ສະແດງຄວາມຂອບໃຈເປັນຢ່າງສູງຕໍ່ ພັກ-ລັດຖະບານ ແລະ ປະຊາຊົນຈີນ ທີ່ໄດ້ໃຫ້ການຊ່ວຍເຫຼືອແກ່ ສປປ ລາວ ຕະຫຼອດໄລຍະຜ່ານມາ ໂດຍສະເພາະໃນໄລຍະທີ່ເກີດການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ແລະ ການສະໜັບສະໜູນຊ່ວຍເຫຼືອ ສປປ ລາວ ໃນການເປັນປະທານອາຊຽນຂອງ ສປປ ລາວ ໃນປີ 2024 ໃຫ້ສໍາເລັດ. ພ້ອມດຽວກັນນັ້ນ, ກໍ່ໄດ້ສະເຫນີໃຫ້ສອງຝ່າຍ ສືບຕໍ່ຜັນຂະຫຍາຍຂໍ້ຕົກລົງຂອງການນຳຂັ້ນສູງໃຫ້ໄດ້ຮັບການຈັດຕັ້ງປະຕິບັດ ແລະ ມີໝາກຜົນເປັນຢ່າງດີ, ສືບຕໍ່ການປະສານສົມທົບກັນຢ່າງໃກ້ຊິດ ລະຫວ່າງ ສອງກະຊວງການຕ່າງປະເທດ ລາວ ແລະ ຈີນ, ຊຸກຍູ້ແລກປ່ຽນການຢ້ຽມຢາມ ແລະ ພົບປະຂອງຄະນະຜູ້ແທນໃນແຕ່ລະຂັ້ນ ຢ່າງເປັນປົກກະຕິ, ສືບຕໍ່ຊຸກຍູ້ບັນດານັກທຸລະກິດ, ນັກທ່ອງທ່ຽວຈີນ ໃຫ້ເຂົ້າມາ ສປປ ລາວ ຫຼາຍຂຶ້ນ.
ໃນຂະນະດຽວກັນ, ທ່ານຮອງລັດຖະມົນຕີ ຊຸນ ເວີ້ຍ ຕົ່ງ ກໍ່ໄດ້ເຫັນດີເປັນເອກະພາບຈະສືບຕໍ່ຊຸກຍູ້ໃຫ້ພາກສ່ວນກ່ຽວຂ້ອງຂອງຕົນ ເຮັດວຽກຮ່ວມກັບຝ່າຍລາວ ຢ່າງໃກ້ຊິດ ເພື່ອສືບຕໍ່ຈັດຕັ້ງຜັນຂະຫຍາຍບັນດາຂໍ້ຕົກລົງທີ່ສອງຝ່າຍ ໄດ້ລົງນາມຮ່ວມກັນແລ້ວນັ້ນ ໃຫ້ປະກົດຜົນເປັນຈິງ, ເພື່ອນຳເອົາຜົນປະໂຫຍດສູງສຸດມາສູ່ປະຊາຊົນສອງຊາດ ຈີນ-ລາວ ໃນຕໍ່ຫນ້າ, ອວຍພອນໃຫ້ສາຍພົວພັນມິດຕະພາບທີ່ເປັນມູນເຊື້ອ, ການຮ່ວມມືແບບຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກຳ ລາວ-ຈີນ ຈົ່ງໝັ້ນຄົງຂະໜົງແກ່ນຕະຫຼອດໄປ.
