ໃນວັນທີ 1 ສິງຫາ 2024 ທີ່ ນະຄອນຫຼວງວຽງຈັນ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມອຳລາ ຂອງ ທ່ານ ນາງ ອີນາ ມາຈູລີອໍນິແຕ (Ina MARCIULIONYTE), ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສະຫະພາບເອີຣົບ (ອີຢູ) ປະຈຳ ສປປ ລາວ ເນື່ອງໃນໂອກາດສຳເລັດການປະຕິບັດໜ້າທີ່ການທູດ ຢູ່ ສປປ ລາວ.
ໃນໂອກາດດັ່ງກ່າວ, ທ່ານ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການພົວພັນຮ່ວມມືສອງຝ່າຍ ລະຫວ່າງ ລາວ-ອີຢູຕະຫຼອດໄລຍະຜ່ານມາ ຈົນເຖິງ ປະຈຸບັນ, ຊຶ່ງໃນປີ 2024 ນີ້ ກໍຄົບຮອບ 49 ປີ ວັນສ້າງຕັ້ງ ສາຍພົວພັນການທູດ ລາວ-ອີຢູ. ພ້ອມກັນນັ້ນ, ກໍ່ສະແດງຄວາມຂອບໃຈຢ່າງຈິງໃຈ ຕໍ່ການເອົາໃຈໃສ່ຢ່າງຫ້າວຫັນ ຂອງ ທ່ານທູດ ໃນການປະກອບສ່ວນຊຸກຍູ້ ແລະ ສົ່ງເສີມສາຍພົວພັນມິດຕະພາບ ແລະ ການຮ່ວມມື ລາວ-ອີຢູ ໃຫ້ມີການຂະຫຍາຍຕົວ ແລະ ແຕກດອກອອກຜົນຍິ່ງຂຶ້ນ ຕະຫຼອດໄລຍະເວລາທີ່ ທ່ານທູດ ປະຕິບັດໜ້າທີ່ ຢູ່ສປປ ລາວ, ໂດຍສະ ເພາະ ເຫັນໄດ້ວ່າ ການຮ່ວມມື ລາວ-ອີຢູ ໄດ້ມີການສືບຕໍ່ເສີມຂະຫຍາຍຂຶ້ນເລື້ອຍໆ, ຊຶ່ງມີມູນຄ່າການຊ່ວຍເຫຼືອ ເພີ່ມຂຶ້ນຈາກ 312 ລ້ານ ເອີໂຣ ໃນແຜນການປີ 1994-2020 ມາເປັນ 550 ລ້ານ ເອີໂຣ ໃນແຜນງານ Team Europe ປີ 2021-2025 ໂດຍສຸມໃສ່ 3 ຂົງເຂດຕົ້ນຕໍ ຄື: 1) ການພັດທະນາເສດຖະກິດສີຂຽວ ແລະ ລວມໝູ່, 2) ການພັດທະນາຊັບພະຍາກອນມະ ນຸດ, ແລະ 3) ການປົກຄອງທີ່ດີ ໂດຍກວມເອົາຫຼາຍຂະແໜງເຊັ່ນ: ການສຶກສາ, ສາທາລະນະສຸກ, ກະສິກໍາ-ປ່າໄມ້, ອຸດສາຫະ ກຳ-ການຄ້າ, ຍຸຕິທໍາ, ສະພາແຫ່ງຊາດ, ກະຊວງພາຍໃນ, ຊັບພະ ຍາກອນທຳມະຊາດ ແລະ ສິ່ງແວດລ້ອມ, ກະຊວງການເງິນ ແລະ ອື່ນໆ. ຄຽງຄູ່ກັນນັ້ນ, ກໍ່ໄດ້ສະແດງຄວາມຂອບໃຈ ອີຢູ ທີ່ໃຫ້ ການຊ່ວຍເຫຼືອ ໃນຂອບຫຼາຍຝ່າຍ ໂດຍຜ່ານອົງການຈັດຕັ້ງສາກົນຕ່າງໆ, ຊຶ່ງໄດ້ປະກອບສ່ວນອັນສຳຄັນເຂົ້າໃນການສ້າງສາ ແລະ ພັດທະນາເສດຖະກິດ-ສັງຄົມ ຂອງ ສປປ ລາວ ຕະຫລອດໄລຍະຜ່ານມາ ໂດຍສອດຄ່ອງກັບ ແຜນພັດທະນາເສດຖະກິດ- ສັງຄົມແຫ່ງຊາດ ກໍ່ຄື ການພັດທະນາຊົນນະບົດ ແລະ ການຫຼຸດຜ່ອນຄວາມທຸກຍາກຂອງປະຊາຊົນ ແນ່ໃສ່ເຮັດໃຫ້ ສປປ ລາວ ຫຼຸດພົ້ນອອກຈາກ ສະຖານະພາບປະເທດດ້ອຍພັດທະນາ ໃນປີ 2026 ແລະ ຊ່ວຍໃຫ້ ສປປ ລາວ ສາມາດບັນລຸເປົ້າໝາຍແຜນການພັດທະນາແບບຍືນຍົງ ຂອງ ອົງການ ສປຊ ໃນປີ 2030.
ໃນຕອນທ່ຽງຂອງວັນດຽວກັນ, ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ກໍ່ໄດ້ໃຫ້ກຽດເປັນເຈົ້າພາບຈັດງານລ້ຽງອຳລາ ຕາມປະເພນີທີ່ເຄີຍປະຕິບັດ ເພື່ອເປັນກຽດໃຫ້ແກ່ ທ່ານທູດ ກ່ອນຈະເດີນທາງກັບຄືນປະເທດ ເພື່ອຮັບໜ້າທີ່ໃໝ່.
ໃນໂອກາດດຽວກັນນີ້, ທ່ານທູດ ອີນາ ມາຈູລີອໍນິແຕ ກໍ່ໄດ້ສະແດງຄວາມຂອບໃຈຕໍ່ ທ່ານຮອງນາຍົກລັດຖະ ມົນຕີ, ລັດຖະມົນຕີກະຊວງການຕ່າງປະເທດ ທີ່ໄດ້ສະຫຼະເວລາໃຫ້ການຕ້ອນຮັບຢ່າງອົບອຸ່ນ, ທັງເປັນເຈົ້າພາບຈັດງານລ້ຽງອຳລາໃນຄັ້ງນີ້, ພ້ອມ ທັງໄດ້ສະແດງຄວາມຂອບໃຈຢ່າງສູງຕໍ່ລັດຖະບານ ສປປ ລາວ ທີ່ໄດ້ໃຫ້ການຮ່ວມມື ແລະ ສະໜັບສະໜູນຊ່ວຍເຫຼືອ ກໍ່ຄື ການອໍານວຍຄວາມສະດວກທຸກປະການ ເຮັດໃຫ້ການປະຕິບັດໜ້າທີ່ການທູດຂອງຕົນຢູ່ ສປປ ລາວ ປະສົບຜົນສຳເລັດເປັນຢ່າງດີ ແລະ ມີຄວາມຍິນດີທີ່ຈະສືບຕໍ່ປະກອບສ່ວນຊ່ວຍຊຸກຍູ້ ສາຍພົວພັນ ແລະ ການຮ່ວມມື ມິດຕະພາບ ລາວ-ອີຢູ ໃຫ້ເຂັ້ມແຂງ ແລະ ຂະຫຍາຍຕົວຍິ່ງໆຂຶ້ນໃນຕໍ່ໜ້າ.
