ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຕ້ອນຮັບການເຂົ້າຢ້ຽມຂໍ່ານັບອຳລາຂອງ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ສະຫະພັນ ເຢຍລະມັນ ປະຈຳ ສປປ ລາວ
ໃນເຊົ້າຂອງວັນທີ 02 ສິງຫາ 2024 ທີ່ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຕ້ອນຮັບການເຂົ້າຢ້ຽມຂໍ່ານັບອຳລາຂອງ ທ່ານ ນາງ ອັນເນັດ ຄະນົບລັອກ (Annette KNOBLOCH), ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ສະຫະພັນ ເຢຍລະມັນ ປະຈຳ ສປປ ລາວ ໃນໂອກາດສຳເລັດການປະຕິບັດໜ້າທີ່ການທູດ ຢູ່ ສປປ ລາວ, ພ້ອມທັງ ຕາງໜ້າໃຫ້ ລັດຖະບານ ແຫ່ງ ສປປ ລາວ ປະດັບຫຼຽນກາມິດຕະພາບ ໃຫ້ແກ່ ທ່ານເອກອັກຄະລັດຖະທູດ ເພື່ອເປັນການຍ້ອງຍໍຊົມເຊີຍ ຕໍ່ຜົນງານການປະກອບສ່ວນເຂົ້າໃນການເສີມຂະຫຍາຍການພົວພັນມິດຕະພາບ ແລະ ການຮ່ວມມືອັນດີ ທີ່ມີມາຍາວນານ ລະຫວ່າງ ສອງປະເທດລາວ-ເຢຍລະມັນ.
ໃນໂອກາດດັ່ງກ່າວ, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຍ້ອງຍໍຊົມເຊີຍ ທ່ານ ນາງ ອັນເນັດ ຕໍ່ຜົນສໍາເລັດໃນການປະຕິບັດໜ້າທີ່ການທູດຢ່າງສົມກຽດຂອງ ທ່ານ ຢູ່ ສປປ ລາວ ຕະຫຼອດໄລຍະ 03 ປີ (2021-2024) ແລະຕີລາຄາສູງຕໍ່ການເຄື່ອນໄຫວ ຢ່າງຫ້າວຫັນຂອງ ທ່ານທູດ ອັນເນັດ ຄະນົບລ໊ອກ ທີ່ໄດ້ປະກອບສ່ວນສຳຄັນໃນການຊຸກຍູ້ ແລະ ເສີມ ຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີທີ່ມີມາແຕ່ຍາວນານ ລະຫວ່າງ ສອງປະເທດ ທັງຂອບສອງຝ່າຍ ແລະ ຫຼາຍຝ່າຍ ໃຫ້ນັບມື້ນັບດີຂຶ້ນ ໂດຍຜ່ານຫຼາຍກິດຈະກຳການຮ່ວມມື ເປັນຕົ້ນ: ໄດ້ປະກອບສ່ວນຊຸກຍູ້ຢ່າງຫ້າວຫັນ ແລະ ຕັ້ງໜ້າ ໃຫ້ ລັດຖະບານ ເຢຍລະມັນ ພິຈາລະນາເອົາ ສປປ ລາວ ເຂົ້າໃນບັນຊີປະເທດ ບຸລິມະສິດ ທີ່ໄດ້ຮັບການຊ່ວຍເຫຼືອ ຈາກ ເຢຍລະ ມັນ ໃນຂອບສອງຝ່າຍຄືນໃນປີ 2022 ຊຶ່ງຫຼັງຈາກນັ້ນ, ລັດຖະ ບານ ເຢຍລະມັນ ກໍ່ໄດ້ປະກາດສືບຕໍ່ໃຫ້ການຊ່ວຍເຫຼືອແກ່ ສປປ ລາວ ໃນໂຄງການທີ່ມີຢູ່ແລ້ວ ຈຳນວນ 38 ລ້ານເອີໂຣ; ການສະ ເຫຼີມສະຫຼອງວັນສ້າງຕັ້ງສາຍພົວພັນການທູດ ຄົບຮອບ 65 ປີ ລະຫວ່າງ ສອງປະເທດ ລາວ-ເຢຍລະມັນ ໃນປີ 2023; ປະກອບສ່ວນຊຸກຍູ້ການຢ້ຽມຢາມຂອງການນໍາຂັ້ນສູງສອງຝ່າຍໃນຫຼາຍລະດັບ ພິເສດໃນປີ 2024 ນີ້ ທ່ານ ໂທບີອັສ ລິນເນີ, ຮອງລັດ ຖະມົນຕີກະຊວງການຕ່າງປະເທດ ເຢຍລະມັນ ກໍ່ໄດ້ມາຢ້ຽມຢາມເຮັດວຽກ ຢູ່ ສປປ ລາວ ແລະ ໃນປີ 2022 ທ່ານ ຢໍເຄິນ ຟລາສບາດ, ຮອງລັດຖະມົນຕີກະຊວງຮ່ວມມືເສດຖະກິດ ແລະ ການພັດທະນາ ເຢຍລະມັນ ໄດ້ເດີນທາງມາຢ້ຽມຢາມເຮັດວຽກ ຢູ່ ສປປ ລາວ ແລະ ອື່ນໆ; ໃນໄລຍະທີ່ມີການແຜ່ລະບາດຂອງພະຍາດໂຄວິດ-19, ທ່ານທູດ ອັນເນັດ ຄະນົບລ໊ອກ ຍັງເປັນຂົວຕໍ່ທີ່ສໍາຄັນໃນການຊຸກຍູ້ເອົາການຊ່ວຍເຫຼືອຈາກ ລັດຖະບານ ເຢຍລະມັນ ໃຫ້ແກ່ ລັດຖະບານລາວ ເຊັ່ນ: ສະໜອງວັກຊິນ ແລະ ອຸປະກອນການແພດທີ່ຈຳເປັນເພື່ອສະກັດກັ້ນ ແລະ ປ້ອງກັນເຊື້ອພະຍາດໂຄວິດ-19.
ພ້ອມກັນນັ້ນ, ທ່ານທູດ ອັນເນັດ ຄະນົບລ໊ອກ ຍັງໄດ້ປະ ກອບສ່ວນອັນສໍາຄັນໃນການເຕົ້າໂຮມຄວາມສາມັກຄີ ແລະ ຮັດ ແໜ້ນການພົວພັນຮ່ວມມືລະຫວ່າງ ສະມາຄົມມິດຕະພາບລາວ-ເຢຍລະມັນ ແລະ ສະມາຄົມມິດຕະພາບເຢຍລະມັນ-ລາວ ຢ່າງເປັນປົກກະຕິ ແລະ ໄດ້ລະດົມຂົນຂວາຍທຶນຊ່ວຍເຫຼືອຈາກລັດຖະບານ ເຢຍລະມັນ ເພື່ອປະກອບສ່ວນເຂົ້າໃນການສົ່ງເສີມການພົວພັນຮ່ວມມືສອງຝ່າຍ ໃຫ້ສືບຕໍ່ໄດ້ຮັບການເສີມຂະ ຫຍາຍຢ່າງເປັນປົກກະຕິ ຊຶ່ງເປັນການປະກອບສ່ວນເຂົ້າໃນການພັດທະນາ ເສດຖະກິດ-ສັງຄົມ ຂອງ ສປປ ລາວ.
ນອກຈາກນີ້, ສອງຝ່າຍ ຍັງໄດ້ຕີລາຄາການພົວພັນຮ່ວມມື ລະຫວ່າງ ສອງປະເທດ ລາວ-ເຢຍລະມັນ ໂດຍສະເພາະ ທ່ານຮອງນາຍົກລັດຖະມົນຕີ ໄດ້ຕີລາຄາສູງຕໍ່ການສະໜັບສະໜູນ ແລະ ຊ່ວຍເຫຼືອອັນລ້ຳຄ່າ ຂອງລັດຖະບານ ແລະ ປະຊາຊົນ ເຢຍລະມັນ ໃຫ້ແກ່ ສປປ ລາວ ໃນໄລຍະຜ່ານມາ ເປັນຕົ້ນ ການພັດ ທະນາເສດຖະກິດແບບຍືນຍົງ, ການພັດທະນາຊົນນະບົດ ແລະ ວຽກງານອາຊີວະສຶກສາເປັນຂະແໜງການທີ່ພົ້ນເດັ່ນທີ່ສຸດ. ການຊ່ວຍເຫຼືອດັ່ງກ່າວໄດ້ປະກອບສ່ວນອັນສຳຄັນເຂົ້າໃນການ ສ້າງສາພັດທະນາເສດຖະກິດ-ສັງຄົມຂອງລັດຖະບານລາວ ພ້ອມທັງເປັນການເສີມຂະຫຍາຍສາຍພົວພັນມິດຕະພາບ ລະຫວ່າງສອງປະເທດ ໃຫ້ມີບາດກ້າວຂະຫຍາຍຕົວຢ່າງຕໍ່ເນື່ອງ.
ໃນໂອກາດດຽວກັນນີ້, ທ່ານທູດ ອັນເນັດ ຄະນົບລ໊ອກ ໄດ້ສະແດງຄວາມຂອບໃຈຢ່າງຈິງໃຈ ມາຍັງລັດຖະບານ ກໍຄື ປະຊາຊົນລາວ ລວມທັງ ກະຊວງການຕ່າງປະເທດ ແຫ່ງ ສປປ ລາວ ທີ່ໄດ້ໃຫ້ການຮ່ວມມື, ສະໜັບສະໜູນຊ່ວຍເຫຼືອ ແລະ ອຳນວຍຄວາມ ສະດວກເປັນຢ່າງດີ ຕະຫຼອດໄລຍະການປະຕິບັດໜ້າທີ່ການທູດ ຢູ່ ສປປ ລາວ ໃນຄັ້ງນີ້ຈົນໄດ້ຮັບຜົນສຳເລັດອັນຈົບງາມ, ພ້ອມທັງໄດ້ສະແດງຄວາມປິຕິຍິນດີ ແລະ ຂອບໃຈຢ່າງຈິງໃຈຕໍ່ລັດຖະບານລາວທີ່ໄດ້ຍ້ອງຍໍຊົມເຊີຍຕໍ່ຜົນງານຂອງທ່ານທູດ ຈົນໄດ້ຮັບການປະດັບຫຼຽນກາມິດຕະພາບ ຊຶ່ງເປັນສັນຍາລັກທີມີຄວາມໝາຍສຳຄັນໃນການຊຸກຍູ້ ແລະ ຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີທີ່ມີມາແຕ່ຍາວນານ ລະ ຫວ່າງ ສອງປະເທດ ເຢຍລະມັນ-ລາວ ໃຫ້ ແຕກດອກອອກຜົນຍິ່ງໆຂຶ້ນ ແລະ ຫວັງຢ່າງຍິ່ງວ່າຈະໄດ້ກັບມາຢ້ຽມຢາມ ສປປ ລາວ ອີກຄັ້ງ.
ໃນຕອນທ້າຍ, ທ່ານ ສະເຫຼີມໄຊ ກົມມະສິດ ໄດ້ອວຍພອນໃຫ້ ທ່ານເອກອັກຄະລັດຖະທູດ ຈົ່ງເດີນທາງກັບປະເທດດ້ວຍຄວາມສະຫວັດດີພາບ, ປະສົບຜົນສຳເລັດທຸກປະການໃນການ ປະຕິບັດພາລະໜ້າທີ່ໃໝ່ ແລະ ຍິນດີຕ້ອນຮັບ ການມາຢ້ຽມ ຢາມ ສປປ ລາວ ຂອງ ທ່ານທູດ ໃນໂອກາດໜ້າຕື່ມອີກ.
ໃນຕອນທ່ຽງຂອງວັນດຽວກັນ, ທ່ານຮອງນາຍົກລັດຖະ ມົນຕີ, ລັດຖະມົນຕີກະຊວງການຕ່າງປະເທດ ກໍ່ໄດ້ໃຫ້ກຽດເປັນເຈົ້າພາບຈັດງານລ້ຽງອຳລາ ຕາມປະເພນີທີ່ເຄີຍປະຕິບັດ ເພື່ອເປັນກຽດໃຫ້ແກ່ ທ່ານທູດ ກ່ອນຈະເດີນທາງກັບຄືນປະເທດ ເພື່ອຮັບໜ້າທີ່ໃໝ່.
