ໃນລະຫວ່າງວັນທີ 12-13 ສິງຫາ 2024, ທ່ານ ສະເຫຼີມໄຊ ກົມມະສິດ, ກຳມະການກົມການເມືອງສູນກາງພັກ, ຮອງນາຍົກ ລັດຖະມົນຕີ, ລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະຈາກສູນກາງ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຫົວພັນ ເພື່ອຕິດຕາມຊຸກຍູ້ ແລະ ໃຫ້ທິດຊີ້ນໍາວຽກງານພັດທະນາເສດຖະກິດ-ສັງຄົມຂອງແຂວງຫົວພັນ, ໃນນາມເປັນຜູ້ຊີ້ນຳວຽກງານຮອບດ້ານຂອງເເຂວງດັ່ງກ່າວ.
ໃນໂອກາດຢ້ຽມຢາມເຮັດວຽກຄັ້ງນີ້, ທ່ານ ຮອງນາຍົກລັດຖະ ມົນຕີ ສະເຫຼີມໄຊ ກົມມະສິດ ໄດ້ໂອ້ລົມ ແລະ ພົບປະກັບຄະນະ ພັກ-ຄະນະນໍາແຂວງ ແລະ ພະນັກງານຫຼັກແຫຼ່ງອ້ອມຂ້າງແຂວງຫົວພັນ ທີ່ ຫ້ອງວ່າການແຂວງຫົວພັນ. ໃນໂອກາດດັ່ງກ່າວ, ທ່ານ ປອ ຄຳແພງ ໄຊສົມແພງ, ເລຂາພັກແຂວງ, ເຈົ້າແຂວງແຂວງຫົວພັນ ໄດ້ລາຍງານໂດຍຫຍໍ້ ກ່ຽວກັບ ສະພາບລວມຂອງການນໍາພາ-ຊີ້ນໍາ, ການຈັດຕັ້ງປະຕິບັດວຽກງານ ເລະ ຫມາກຜົນທີ່ເເຂວງຍາດມາໄດ້ໃນຂົງເຂດຕ່າງໆ ເຊັ່ນ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ວຽກງານປ້ອງກັນຊາດ- ປ້ອງກັນຄວາມສະຫງົບ, ວຽກງານດ້ານເສດຖະກິດ, ວຽກງານວັດທະນາທໍາ-ສັງຄົມ, ວຽກງານກໍ່ສ້າງຮາກຖານການເມືອງ ແລະ ວຽກງານ 3 ສ້າງ, ວຽກງານພັດທະນາຊົນນະບົດ ແລະ ລືບລ້າງຄວາມທຸກຍາກ, ວຽກງານການຕ່າງປະເທດ, ການນໍາພາ-ຊີ້ນໍາວຽກງານການເມືອງ-ແນວຄິດ, ພ້ອມທັງຍົກໃຫ້ເຫັນເຖິງບັນດາຂໍ້ສະດວກ, ຂໍ້ຫຍຸ້ງຍາກ, ສິ່ງທ້າທາຍ, ທິດທາງແຜນຈຸດສຸມຂອງແຂວງ ໃນທ້າຍປີ 2024 ແລະ ບາງຂໍ້ສະເໜີເພື່ອຊຸກຍູ້ການພັດ ທະນາຢູ່ແຂວງຫົວພັນ.
ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະ ແດງຄວາມຊົມເຊີຍຕໍ່ຄະນະພັກ-ຄະນະນຳແຂວງ ກໍຄື ບັນດາພະ ນັກງານຫຼັກແຫຼ່ງ ທີ່ໄດ້ເອົາໃຈໃສ່ຈັດຕັ້ງປະຕິບັດວຽກງານດ້ວຍຄວາມຮັບຜິດຊອບສູງ ເຮັດໃຫ້ແຂວງຫົວພັນ ສືບຕໍ່ໄດ້ຮັບການພັດທະນາເປັນກ້າວໆມາ. ໃນໂອກາດນີ້, ທ່ານ ຮອງນາຍົກລັດຖະ ມົນຕີ ໄດ້ຍົກໃຫ້ເຫັນ ແລະ ຕີລາຄາສະພາບການພົ້ນເດັ່ນຂອງພາກພື້ນ ແລະ ສາກົນ ທີ່ສືບຕໍ່ຜັນເເປໄປໃນທິດທາງທີ່ສັບສົນ, ວຸ້ນວາຍ ແລະ ຍາກໃນການຄາດຄະເນ ໂດຍສະເພາະແມ່ນການພົວພັນ ລະຫວ່າງ ປະເທດມະຫາອໍານາດ ທີ່ມີທັງການແຂ່ງຂັນ, ຂັດແຍ້ງ ເເລະ ສະກັດກັ້ນເຊິ່ງກັນ ເເລະ ກັນຢ່າງຂ້ຽວຂາດ ເເລະ ນັບມື້ນັບເລິກເຊິ່ງທັງໃນດ້ານການເມືອງ ກໍຄືດ້ານເສດຖະກິດ, ເຊິ່ງເປັນຜົນກະທົບຕໍ່ບັນດາປະເທດກໍາລັງພັດທະນາໃນດ້ານຕ່າງໆໃນທົ່ວໂລກ ໂດຍສະເພາະຕໍ່່ການພັດທະນາເສດຖະກິດຂອງ ສປປ ລາວເຮົາ.
ພ້ອມກັນນັ້ນ, ທ່ານ ຮອງນາຍົກລັດຖະມົນຕີ ກໍໄດ້ແຈ້ງຜົນການເປັນເຈົ້າພາບ ແລະ ປະທານກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມລັດຖະມົນຕີຕ່າງປະເທດອື່ນໆທີ່ກ່ຽວຂ້ອງ ໃນວັນທີ 24-27 ກໍລະກົດ 2024 ຜ່ານມາ, ທີ່ ນະຄອນຫຼວງວຽງຈັນ, ເຊີ່ງໂດຍລວມແມ່ນປະສົບຜົນສໍາເລັດຕາມຄາດໝາຍ ເເລະ ຈະເປັນພື້ນຖານອັນດີໃຫ້ແກ່ການກະກຽມໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ໃນເດືອນຕຸລາ 2024 ທີ່ຈະມາເຖິງນີ້.
ນອກຈາກນັ້ນ, ທ່ານ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຍັງໄດ້ຊີ້ນໍາໃຫ້ເເຂວງສຸມໃສ່ການສ້າງເເຜນຍຸດທະສາດການພັດທະນາບົນພື້ນຖານທີ່ເເຂວງມີທ່າເເຮງ ເພື່ອຮັບປະກັນການສ້າງລາຍຮັບໃຫ້ເເຂວງເເບບຍືນຍົງ ເເລະ ເປັນມິດຕໍ່ສີ່ງເເວດລ້ອມ.
ໃນໂອກາດຢ້ຽມຢາມເຮັດວຽກຢູ່ແຂວງຫົວພັນຄັ້ງນີ້, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ສະ ເຫລີມໄຊ ກົມມະສິດ ພ້ອມດ້ວຍຄະນະ ຍັງໄດ້ເດີນທາງໄປຢ້ຽມຢາມ ແລະ ຊຸກຍູ້ຫົວຫນ່ວຍການຜະລິດຕ່າງໆຢູ່ເມືອງວຽງໄຊ ຄື: ໂຄງການກໍ່ສ້າງໂຮງງານຕັດຫຍິບ ຢູ່ ບ້ານຫາງລ້ອງ; ໂຄງການປູກໃບໄມ້ຊາກ ແລະ ໂຊມ ພືດໄຊໂກະ ທີ່ໂຮງຮຽນເຕັກນິກ-ວິຊາຊີບ ແຂວງຫົວພັນ ແລະ ຢ້ຽມຢາມໂຮງງານຊີມັງຫົວພັນ ລາວ-ຈີນ ບ້ານເມືອງກ້າງ ອີກດ້ວຍ.
