ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຕ້ອນຮັບການເຂົ້າຢ້ຽມອໍາລາຂອງອຸປະທູດກູເວດ ປະຈໍາ ສປປ ລາວ

ໃນຕອນເຊົ້າຂອງວັນທີ 30 ສິງຫາ 2024, ທີ່ ກະຊວງ ການຕ່າງປະເທດ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະ ມົນຕີ, ລັດຖະມົນຕີກະຊວງການຕ່າງປະເທດ ໄດ້ຕ້ອນ ຮັບການເຂົ້າຢ້ຽມອໍາລາຂອງ ທ່ານ ອັບດຸນຣາສຊາ ອາລຄູລີຟາ (Abdulrazzaq Alkhuleefah), ອຸປະທູດ ແຫ່ງ ລັດກູເວດ ປະຈຳ ສປປ ລາວ, ໃນໂອກາດສໍາເລັດໜ້າທີ່ການທູດຂອງຕົນ ຢູ່ ສປປ ລາວ.

ໃນໂອກາດນີ້, ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈ ແລະ ຊົມເຊີຍຕໍ່ຜົນສໍາເລັດການເຄື່ອນໄຫວວຽກງານການທູດ ຂອງ ທ່ານອຸປະທູດກູເວດ ປະຈໍາ ສປປ ລາວ ນັບແຕ່ປີ 2021 ເຖິງປັດຈຸບັນ ທີ່ໄດ້ປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະ ພາບ ແລະ ການຮ່ວມມືທີ່ດີ ລະຫວ່າງສອງປະເທດ ລາວ-ກູເວດ; ພ້ອມທັງໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນ ກູເວດ ທີ່ໄດ້ໃຫ້ ການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນຕະຫຼອດໄລຍະຜ່ານມາ, ເຊິ່ງໄດ້ປະກອບສ່ວນເຂົ້າໃນການພັດທະນາພື້ນ ຖານໂຄງລ່າງ ແລະ ເສດຖະກິດ-ສັງຄົມ ຢູ່ ສປປ ລາວ; ແລະ ສະ ແດງຄວາມຫວັງວ່າ ລັດຖະບານ ກູເວດ ຈະສືບຕໍ່ໃຫ້ການສະໜັບ ສະໜູນ ສປປ ລາວ ໃນຕໍ່ຫນ້າ.

ນອກຈາກນັ້ນ, ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຍັງໄດ້ແຈ້ງໃຫ້ຊາບ ກ່ຽວກັບ ຄວາມພ້ອມໃນການກະກຽມເປັນເຈົ້າພາບ ແລະ ປະທານກອງປະຊຸມ ສຸດຍອດອາຊຽນ ຄັ້ງທີ 44 ແລະ 45 ທີ່ຈະມີຂຶ້ນໃນເດືອນຕຸລາ 2024 ນີ້. ໃນຕອນທ້າຍ, ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ຝາກຄວາມຢື້ຢາມຖາມຂ່າວ ເຖິງ ທ່ານລັດຖະ ມົນຕີກະຊວງການຕ່າງປະເທດ ແຫ່ງ ລັດກູເວດ ແລະ ໄດ້ອວຍ ພອນໃຫ້ ທ່ານ ອັບດຸນຣາສຊາ ອາລຄູລີຟາ ຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ປະສົບຜົນສໍາເລັດໃນໜ້າທີ່ອັນໃໝ່ຍິ່ງໃຫຍ່ກວ່າເກົ່າ ພ້ອມທັງສືບຕໍ່ປະກອບສ່ວນຮັດແໜ້ນສາຍພົວພັນຮ່ວມມື ລາວ-ກູເວດ ໃນອະນາຄົດ.

ໃນຂະນະດຽວກັນ, ທ່ານ ອຸປະທູດ ອັບດຸນຣາສຊາ ອາລຄູລີຟາ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ຄໍາອວຍພອນອັນປະເສີດ ພ້ອມທັງໄດ້ໃຫ້ຄໍາໝັ້ນສັນຍາວ່າ ຈະສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງສອງປະເທດ ໃຫ້ມີຜົນສໍາເລັດອັນໃໝ່ ໃນອະນາຄົດ ເພື່ອນໍາເອົາຜົນປະໂຫຍດມາສູ່ປະຊາຊົນສອງຊາດ ລາວ-ກູເວດ. ພ້ອມນັ້ນ, ກໍໄດ້ສະແດງຄວາມຊົມເຊີຍຕໍ່ການເປັນເຈົ້າພາບ ແລະ ປະທານກອງປະຊຸມອາຊຽນຂອງ ສປປ ລາວ ພ້ອມທັງໄດ້ອວຍພອນໃຫ້ ສປປ ລາວ ປະສົບຜົນສໍາເລັດໃນການເປັນປະທານອາຊຽນ ໃນປີ 2024 ນີ້.

ສປປ ລາວ ແລະ ລັດກູເວດ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 14 ກໍລະກົດ 2008, ເຊິ່ງໃນຕະຫຼອດ 16 ປີຜ່ານມາ, ການພົວພັນຮ່ວມມື ລະຫວ່າງສອງປະເທດລາວ-ກູເວດ ໄດ້ຮັບການພັດທະນາຢ່າງຕໍ່ເນື່ອງ ໂດຍເຫັນໄດ້ຈາກການພົວພັນດ້ານການທູດ ແລະ ການແລກປ່ຽນການຢ້ຽມຢາມຂອງການນໍາຂັ້ນສູງຂອງສອງປະ ເທດ ໃນໄລຍະຜ່ານມາຢ່າງເປັນປົກກະຕິ.

ທີ່ມາ: ກົມການຂ່າວ, ກະຊວງການຕ່າງປະເທດ