ຕອນເຊົ້າຂອງວັນທີ 2 ກັນຍາ 2024 ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແລະ ທ່ານ ສົມສະຫວາດ ເລັ່ງສະຫວັດ ອະດິດຮອງນາຍົກລັດຖະມົນຕີ ພ້ອມດ້ວຍ ການນໍາຂອງແຂວງ, ນະຄອນ ໄດ້ຮ່ວມໃສ່ບາດຢູ່ຕໍ່ໜ້າວັດແສນສຸຂະຣາມ ນະຄອນ ຫຼວງພະບາງ ເນື່ອງໃນໂອກາດງານບຸນຫໍ່ເຂົ້າປະດັບດິນ -ບຸນຊ່ວງເຮືອເດືອນເກົ້າ ປະຈໍາປີ 2024 ເຊິ່ງມີຊາວພຸດສາສະນິກກະຊົນທັງພາຍໃນ ແລະແຂກຕ່າງປະເທດ ທີ່ມີຈິດໃຈເຫຼື້ອມ ໃສສັດທາທາງພຸດທະສາສະໜາ ໄດ້ພ້ອມກັນຫ້າງຫາກະກຽມເຂົ້າໜ້ຽວ, ເຂົ້າຕົ້ມ, ເຂົ້າໜົມ ແລະປັດໃຈ ມາໃສ່ບາດຢູ່ຕາມວັດວາອາຣາມ ແລະເສັ້ນທາງຕ່າງໆ ພາຍໃນຕົວເມືອງ ນະຄອນ ຫຼວງພະບາງ ຕາມວັດທະນະທຳ-ຮິດຄອງປະເພນີຂອງຊາວຫຼວງພະ ບາງ ທີ່ໄດ້ສຶບທອດກັນມາແຕ່ບູຮານນະການ.
ກິດຈະກໍາການໃສ່ບາດ ເປັນໜຶ່ງໃນການອານຸລັກປົກປັກຮັກສາ ແລະເສີມຂະຫຍາຍ ວັດທະນະທຳ-ຮີດຄອງປະເພນີອັນດີງາມ ຂອງຊາດ ເວົ້າສະເພາະກໍ່ຄື: ຂອງຊາວຫຼວງພະບາງ ທີ່ສືບທອດກັນມາແຕ່ກ່ອນໄວ້ໃຫ້ຍືນຍົງຕະຫຼອດໄປ, ທັງເປັນການສົ່ງເສີມ ແລະໜຶ່ງກິດຈະກໍາການທ່ອງທ່ຽວ ທີ່ຕິດພັນກັບການອານຸລັກຮັກສາ ວັດທະນະທໍາ ຮິດຄອງປະເພນີ ອັນດີງາມ ທີ່ເປັນເອກລັກສະເພາະຂອງຊາວຫຼວງພະບາງທີ່ມີມາແຕ່ດົນນານ.
ຂ່າວ: ເພັດສາຄອນ ສິມມະວົງ
