ຮອງນາຍົກລັດຖະມົນຕີ ເຂົ້າຮ່ວມສະເຫຼີມສະຫຼອງວັນປູກຕົ້ນໄມ້ແຫ່ງຊາດ, ວັນເດັກນ້ອຍສາກົນ, ວັນສິ່ງແວດລ້ອມໂລກ ແລະ ວັນວິ່ງແວດລ້ອມແຫ່ງຊາດ

ໃນຕອນເຊົ້າ ວັນທີ 01 ມິຖຸນາ 2024 ຢູ່ແຂວງຈໍາປາສັກ ໄດ້ຈັດງານສະເຫຼີມສະຫຼອງ ວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ (ວັນທີ 1 ມິຖຸນາ), ວັນສິ່ງແວດລ້ອມໂລກ ແລະ ວັນສິ່ງແວດລ້ອມແຫ່ງຊາດ (ວັນທີ 5 ມິຖຸນາ) ໂດຍການໃຫ້ກຽດເຂົ້າຮ່ວມຂອງ ທ່ານ ກິແກ້ວ ໄຂຄໍາພິທູນ, ຮອງນາຍົກລັດຖະມົນຕີ; ມີທ່ານ ອາລຸນໄຊ ສູນນະລາດ, ເຈົ້າແຂວງໆຈຳປາສັກ, ທ່ານ ນາງ ອາລີ ວົງໜໍ່ບຸນທໍາ, ປະທານສູນກາງສະຫະພັນແມ່ຍິງລາວ, ທ່ານ ດຣ. ເພຍ ເຣເບລໂລ ບຣິດໂຕ, ຜູ້ຕາງໜ້າອົງການອຸຍນີເຊບ ປະຈຳ ສປປ ລາວ, ບັນດາທ່ານການນໍາແຂວງ, ພະແນກການ-ອົງການຈັດ ຕັ້ງມະຫາຊົນ, ການນໍາບັນດາເມືອງ-ນະຄອນ, ພາກທຸລະກິດ, ພະນັກງານ-ລັດຖະກອນ, ຊາວໜຸ່ມ, ເຍົາວະຊົນ, ອະນຸ ຊົນ ພາຍໃນແຂວງຈຳປາສັກ ເຂົ້າຮ່ວມຢ່າງຫຼວງຫຼາຍ.

ໃນໂອກາດດັ່ງກ່າວ, ທ່ານ ບົວລີ ເພັດສົງຄາມ, ເຈົ້ານະຄອນປາກເຊ ໄດ້ລາຍງານໃຫ້ຊາບ ກ່ຽວກັບການຈັດພິທີໃນຄັ້ງນີ້ວ່າ: ໂດຍໄດ້ຮັບການມອບໝາຍ ຈາກຄະນະ ພັກ-ອົງການປົກຄອງແຂວງຈໍາປາສັກ ມອບໃຫ້ພະແນກກະສິກຳ ແລະ ປ່າໄມ້ແຂວງ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ແລະ ອົງ ການຈັດຕັ້ງມະຫາຊົນຂັ້ນແຂວງ ກໍຄື ພະແນກການ-ອົງການອ້ອມຂ້າງແຂວງ, ນະ ຄອນປາກເຊ ຮັບຜິດຊອບການຫ້າງຫາກະກຽມຄວາມພ້ອມ ຈັດກິດຈະກຳຕ່າງໆຂຶ້ນ ໃນໂອກາດການສະເຫຼີມສະຫຼອງວັນສໍາຄັນດັ່ງກ່າວ ເຊິ່ງລວມມີບັນດາກິດຈະກຳ ຄື: ການສ້າງຂະບວນການຮ່ວມແຮງຮ່ວມໃຈ ເຮັດອະນາໄມໃຫ້ນະຄອນປາກເຊ ສະ ອາດງາມຕາ, ການອະນາໄມລວງຄອງ-ຮ່ອງລະບາຍນໍ້າ ເພື່ອບໍ່ໃຫ້ນໍ້າຖ້ວມຂັງໃນຕົວເມືອງ, ພິທີປຸກຕົ້ນໄມ້ສະຖານທີ່ທ່ອງທ່ຽວ ທາດ 3 ປາງ, ປ່າທໍາມະຊາດ ທີ່ເມືອງສຸຂຸມາ ແລະ ພິທີສະເຫຼີມສະຫຼອງວັນເດັກນ້ອຍສາກົນ ທີ່ຫໍວັດທະນະທໍາຂອງແຂວງ, ພິທີສະເຫຼີມສະຫຼອງວັນປູກຕົ້ນໄມ້ແຫ່ງຊາດ, ວັນສິ່ງແວດລ້ອມໂລກ ແລະ ວັນສິ່ງ ແວດລ້ອມແຫ່ງຊາດ ດ້ວຍການຈັດກິດຈະກຳຍ່າງ ເພື່ອສຸຂະພາບ, ກິດຈະກຳປ່ອຍປາ, ກິດຈະກຳປູກຕົ້ນໄມ້ ແລະ ການແຂ່ງຂັນກິລາກະຕໍ້.

ສະເພາະກິດຈະກຳຍ່າງເພື່ອສຸຂະພາບ ແມ່ນເລີ່ມຕົ້ນອອກຈາກສໍານັກງານຫ້ອງວ່າການແຂວງ ໄປຍັງຫໍຫຼັກເມືອງປາກເຊ ໄລຍະທາງຍາວ 800 ແມັດ, ຈາກນັ້ນ ກໍ່ໄດ້ທຳພິທີສັກກາລະບູຊາ ຫໍຫຼັກເມືອງ ແລະ ປ່ອຍປາລົງໃສ່ວັງສະຫງວນປາກນໍ້າເຊໂດນ ທີ່ທ່າວັດຫຼວງປາກເຊ (ວັງສະຫງວນຂອງແຂວງ), ແລ້ວສືບຕໍ່ຍ່າງເພື່ອສຸຂະພາບ ຈາກວັດຫຼວງປາກເຊ ມາຍັງສວນສາທາລະນະແຄມຂອງ ຊຶ່ງມີໄລະທາງ 1.700 ແມັດ ເພື່ອຮ່ວມກັນປູກຕົ້ນໄມ້ ທີ່ສວນສາທາລະນະ ເຊິ່ງການຈັດກິດຈະກໍາຄັ້ງນີ້ ກໍ່ເພື່ອປູກຈິດສໍານຶກ ແລະ ປຸກລະດົມທົ່ວສັງຄົມ ໃຫ້ຄວາມສຳຄັນ ຮ່ວມກັນປູກ ແລະ ປົກປັກຮັກສາຕົ້ນໄມ້, ປ່າໄມ້ ແລະ ຮັກສາສະພາບແວດລ້ອມ ໃຫ້ເປັນຂະບວນຢ່າງກ້ວາງຂວາງ, ສືບຕໍ່ສ້າງທຸກເງື່ອນໄຂໃຫ້ແຂວງຈໍາປາສັກ ມີສະພາບແວດລ້ອມທີ່ດີ, ສີຂຽວ ແລະ ຍືນຍົງ, ທັງມີຄວາມສະອາດ, ສວຍງາມ, ໜ້າຢູ່ອາໄສ ແລະ ໜ້າທ່ຽວຊົມ ຢ່າງແທ້ຈິງ.

ພາບ ແລະ ຂ່າວ: ກົມປະຊາສຳພັນ, ຫສນຍ.