ວັນທີ 26 ພຶດສະພາ 2024 ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ພ້ອມດ້ວຍຄະນະ, ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ແລະ ພາກສ່ວນທີ່ກ່ຽວຂ້ອງຂັ້ນສູນກາງ, ຂັ້ນແຂວງ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ບໍລິສັດ ຊີໂນ-ອາກຣີ ໂປຕາສ ບ້ານດົງໃຕ້ ເມືອງທ່າແຂກ ແຂວງຄຳມ່ວນ ໂດຍມີ ຄະນະອຳນວຍການ ແລະ ພະນັກງານພາຍໃນບໍລິສັດຮ່ວມຕ້ອນຮັບ.
ທ່ານ ເຈິ່ງ ໂຢເຢ່ ຮອງຜູ້ອຳນວຍການໃຫຍ່ ບໍລິສັດ ຊີໂນ-ອາກຣີ ໂປຕາສ ຈຳກັດ ໄດ້ລາຍງານໂດຍຫຍໍ້ກ່ຽວກັບຄວາມເປັນມາຂອງບໍລິສັດ, ການສ້າງຕັ້ງ ແລະ ການດຳເນີນກິດຈະການໃນຜ່ານມາ, ການປະກອບສ່ວນຊ່ວຍເຫຼືອສັງຄົມ, ການຊຸກຍູ້ດ້ານວຽກເຮັດງານທໍາແກ່ປະຊາຊົນໃນທ້ອງຖິ່ນ ລວມເຖິງການມອບພັນທະໃຫ້ແກ່ລັດຖະບານ ແລະ ແຜນພັດທະນາໂຄງການໃນໄລຍະຕໍ່ໄປ ລວມເຖິງບັນຫາຂໍ້ສະເໜີຕໍ່ລັດຖະບານ ຊ່ວຍຄົ້ນຄວ້າ ເພື່ອເຮັດໃຫ້ບໍລິສັດໄດ້ດຳເນີນໄປໄດ້ຢ່າງມີປະສິດທິພາບ ແລະ ປະສິດທິຜົນ ເປັນຕົ້ນ ນິຕິກຳໃນການຄຸ້ມຄອງ ແລະ ນະໂຍບາຍສົ່ງເສີມການລົງທຶນໃນເຂດນິຄົມອຸດສາຫະກຳ ອາຊີ-ໂປຕາສ ສາ ກົນ ແຂວງຄໍາມ່ວນ.
ໂອກາດນີ້ທ່ານຮອງນາຍົກລັດຖະມົນຕີ ກໍ່ໄດ້ມີຄໍາເຫັນຊີ້ນຳ ເຊິ່ງບໍລິສັດຊີໂນ-ອາກຣີ ໂປຕາສ ແມ່ນບໍລິສັດໜຶ່ງທີ່ໄດ້ປະກອບສ່ວນອັນສຳຄັນໃນການພັດທະນາເສດຖະກິດ-ສັງຄົມ ຂອງ ສ ປປ ລາວ, ເປັນບໍລິສັດອຸດສາຫະກຳເປັນລະບົບຕ່ອງໂສ້ ແລະ ການພັດທະນາແບບກົມກຽວ, ເປັນບໍລິສັດແບບຢ່າງທີ່ມີຄວາມໂດດເດັ່ນໃນການປະຕິບັດລະບຽບກົດໝາຍ ຕາມສັນຍາທີ່ໄດ້ລະບຸໄວ້ ພ້ອມທັງໄດ້ປະກອບສ່ວນສ້າງວຽກເຮັດງານທຳ ໃຫ້ແກ່ປະຊາຊົນທັງພາຍໃນທ້ອງຖິ່ນໃກ້ຄຽງ ກໍ່ຄືເຂດອື່ນໆໃນ ສ ປປ ລາວ ແລະ ໄດ້ປະກອບສ່ວນຊ່ວຍສັງຄົມຢ່າງຕັ້ງໜ້າ ໂດຍສະເພາະແມ່ນການປັບປຸງພື້ນຖານໂຄງລ່າງ, ການພັດທະນາທາງດ້ານກະສິກຳຂອງພໍ່ແມ່ປະຊາຊົນ. ເຊິ່ງຄຽງຄູ່ກັບການຜະລິດ ເພື່ອສົ່ງອອກ ສະເໜີໃຫ້ບໍລິສັດມີການຜະລິດເພື່ອຊົມໃຊ້ພາຍ ໃນໃຫ້ຫຼາຍຂຶ້ນ ເພື່ອຊຸກຍູ້ໃຫ້ແກ່ການຜະລິກກະສິກຳ ຮັບປະກັນຄວາມໝັ້ນຄົງທາງດ້ານສະບຽງອາຫານຢູ່ໃນ ສ ປປ ລາວ, ມີການຄຸ້ມຄອງບັນດາບໍລິສັດທີ່ເຂົ້າມາລົງທຶນພາຍໃນເຂດດັ່ງກ່າວໃຫ້ດີ ແລະ ມີການປະສານງານກັນຢ່າງກົມກຽວ ເພື່ອເຮັດໃຫ້ກິດຈະກຳໂຄງການດຳເນີນໄປໄດ້ດີ, ສ້າງ ແລະ ພັດທະນາແຮງງານລາວໃຫ້ມີຄວາມຊໍານານ ເພື່ອສືບທອດໃນບາງຕຳແໜ່ງງານຕາມຄວາມເໝາະສົມ.
ສຳລັບຄຳສະເໜີຂອງບໍລິສັດ ໃນການສ້າງນິຄົມອຸດສາຫະກຳ ປະຈຸບັນລັດຖະບານກຳລັງເລັ່ງໃນການປັບປຸງກົດໝາຍວ່າດ້ວຍການສົ່ງເສີມການລົງທຶນ ເພື່ອເຂົ້າສະເໜີຄົ້ນຄວ້າໃນກອງປະຊຸມສະພາ ເພື່ອຮັບຮອງ ເຊິ່ງຈະສ້າງເງື່ອນໄຂອຳນວຍຄວາມສະດວກໃນຫຼາຍດ້ານໃນການສົ່ງເສີມ ແລະ ຄຸ້ມຄອງນິຄົມອຸດສາຫະກຳ ເຊິ່ງແມ່ນເປົ້າໝາຍຂອງລັດຖະບານ ທີ່ຈະຊຸກຍູ້ສົ່ງເສີມ. ພ້ອມນັ້ນກໍ່ ໃຫ້ສືບຕໍ່ປຶກສາຫາລື ແລະ ສ້າງກົນໄກປະສານງານກັນ ລະຫວ່າງບໍລິສັດ ກັບອຳນາດການປົກຄອງທ້ອງຖິ່ນໃຫ້ດີຂຶ້ນ ເພື່ອປັບປຸງບັນຫາຂໍ້ຫຍຸ້ງຍາກດ້ານຕ່າງໆໃຫ້ໄດ້ຮັບການແກ້ໄຂໂດຍໄວ.
ຂ່າວ-ພາບ: ກອງຄໍາ
