ວັນທີ 27 ພຶດສະພາ 2024 ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແຫ່ງ ສປປ ລາວ, ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ແລະ ພາກສ່ວນທີ່ກ່ຽວຂ້ອງຂັ້ນສູນກາງ, ຂັ້ນແຂວງ ໄດ້ລົງເຄື່ອນໄຫວຢ້ຽມຢາມ ຟາມລ້ຽງງົວ ຂອງບໍລິສັດ ຄຳມ່ວນ ອິມພອດ-ເອັກພອດ ຈຳກັດຜູ້ດຽວ ບ້ານນາກະຕັງ ເມືອງຍົມມະລາດ ແຂວງຄຳມ່ວນ ໂດຍມີ ຄະນະປະທານ ແລະ ພະນັກງານພາຍໃນບໍລິສັດດັ່ງກ່າວເຂົ້າຮ່ວມຕ້ອນຮັບ.
ທ່ານ ໂຍມາ ອິນທະວົງ ຮອງປະທານບໍລິສັດຄຳມ່ວນ ອິມພອດ-ເອັສພອດ ຈຳກັດ ໄດ້ລາຍງານຄວາມຄືບໜ້າ ໃນການພັດທະນາໂຄງການລ້ຽງງົວ ເພື່ອເປັນສິນຄ້າ. ເຊິ່ງໃນໄລຍະ 1 ປີຜ່ານມາ ທາງກຸ່ມ ບໍລິສັດ ໄດ້ເຊັນສັນຍາສໍາປະທານກັບອົງການປົກຄອງ ແຂວງຄໍາມ່ວນ ໃນເນື້ອທີ່ 600 ເຮັກຕາ ຢູ່ເຂດບ້ານນາກະຕັງ ເມືອງຍົມມະລາດ ແຂວງຄໍາມ່ວນ. ມີຈຸດປະສົງ ໃນການຊຸກຍູ້ ແລະ ສົ່ງເສີມການພັດທະນາກະສິກຳແບບຍືນຍົງ ເພື່ອຮັບປະກັນດ້ານສະບຽງອາຫານ ແລະ ການມີສ່ວນຮ່ວມຂອງປະຊາຊົນໃນເຂດໂຄງການ ແລະ ເຂດໃກ້ຄຽງ, ເພື່ອພັດທະນາໂຄງການ ໃນການສະໜອງຊີ້ນງົວທີ່ມີຄຸນນະພາບ ໃຫ້ແກ່ສັງຄົມ ແລະ ເປັນສິນຄ້າສົ່ງອອກ ເຊິ່ງໃນນັ້ນປະກອບມີ ການລ້ຽງງົວສາຍພັນບຼາມັນ, ການລ້ຽງງົວສາຍພັນທ້ອງຖິ່ນ, ການປູກຫຍ້າເພື່ອເປັນອາຫານງົວ, ປູກຕົ້ນໄມ້ໃຫ້ໝາກ, ສູນການຮຽນຮູ້ການລ້ຽງງົວ ຄົບວົງຈອນ ເພື່ອພັດທະນາເຂດດັ່ງກ່າວ ໃຫ້ກາຍເປັນບ່ອນຜະລິດສະບຽງອາຫານສະໜອງໃຫ້ແກ່ສັງຄົມ.
ໂອກາດນີ້ ທ່ານຮອງນາຍົກລັດຖະມົນຕີ ກໍ່ໄດ້ມີຄຳເຫັນ ເຊິ່ງຕາມແຜນພັດທະນາຂອງບໍລິສັດ ໂຄງການດັ່ງກ່າວ ແມ່ນສ້າງເງື່ອນໄຂໃຫ້ປະຊາຊົນໄດ້ພັດທະນາໃນອາຊີບການລ້ຽງສັດ, ການປູກໄມ້ໃຫ້ໝາກ ທັງປະກອບສ່ວນພັດທະນາຊົນນະບົດ ທີ່ມີສ່ວນຮ່ວມຂອງປະຊາຊົນ ໃນການພັດທະນາ ກາຍເປັນບ່ອນຮຽນຮູ້, ບ່ອນທ່ອງທ່ຽວ, ບ່ອນສຶກສາທົດລອງໃຫ້ປະຊາຊົນໄດ້ພັດທະນາຕົນເອງ. ພ້ອມນີ້ກໍ່ສະເໜີໃຫ້ບໍລິສັດມີການພັດທະນາເນື້ອທີ່ ທີ່ມີຢູ່ແລ້ວ ໃຫ້ເກີດໝາກຜົນສູງສຸດ ເຮັດໃຫ້ປະຊາຊົນ ແລະ ການນຳ ພັກ-ລັດ ເຊື່ອໝັ້ນ ໃນການມຸ້ງໝັ້ນ ແລະ ຄວາມຕັ້ງໃຈພັດທະນາ ສ້າງຜົນກຳໄລແກ່ບໍລິສັດ ແລະ ນໍາເອົາຜົນປະໂຫຍດ ເພື່ອປະກອບສ່ວນພັດທະນາເສດຖະກິດ-ສັງຄົມປະເທດຊາດ ກໍ່ຄືທ້ອງຖິ່ນ. ພ້ອມນີ້ກໍ່ສະເໜີໃຫ້ການນຳຂັ້ນແຂວງ, ຂັ້ນເມືອງ ໃຫ້ການຊີ້ນໍາຢ່າງໃກ້ຊິດ ຊ່ວຍເຫຼືອໃນການພັດທະນາບໍລິສັດ, ໃຫ້ອຳນາດການປົກຄອງບ້ານອ້ອມຂ້າງ ປຸກລະດົມພໍ່ແມ່ປະຊາຊົນມີສ່ວນຮ່ວມໃນການພັດທະນາ ເຂົ້າເຮັດວຽກໃນໂຄງການ ເພື່ອສ້າງລາຍຮັບພັດທະນາຊີວິດການເປັນຢູ່ ພັດທະນາຄອບຄົວໃຫ້ດີຂຶ້ນ, ໃຫ້ທຸກຂະແໜງການສະໜັບສະໜູນ ແລະ ຊ່ວຍເຫຼືອໃນການພັດທະນາບໍລິສັດ ໃຫ້ໄດ້ຮັບການຈັດຕັ້ງປະຕິບັດຢ່າງມີຜົນສຳເລັດຕາມເປົ້າໝາຍ, ສະເໜີໃຫ້ບໍລິສັດພັດທະນາໄປຕາມແຜນ, ປະຕິບັດຕາມແນວທາງນະໂຍບາຍຂອງພັກ-ລັດ ແລະ ເຄົາລົບລະບຽບກົດໝາຍ ຂອງບ້ານເມືອງ ແລະ ມີສ່ວນຮ່ວມໃນການພັດທະນາສັງຄົມ ກໍ່ຄືພັດທະນາທ້ອງຖິ່ນ ແລະ ພັດທະນາຊີວິດການເປັນຢູ່ຂອງປະຊາຊົນຢູ່ບັນດາບ້ານອ້ອມຂ້າງ. ສ່ວນຂໍ້ສະເໜີຕ່າງໆ ທີ່ບໍລິສັດໄດ້ສະເໜີ ແມ່ນມອບໃຫ້ອຳນາດການປົກຄອງແຂວງ ກໍ່ຄືຂະແໜງການກ່ຽວຂ້ອງໃນຂັ້ນທ້ອງຖິ່ນ ສົມທົບປຶກສາຫາລືຊອກຊ່ອງທາງວິທີການແກ້ໄຂໃນຕໍ່ໜ້າ.
ຂ່າວ-ພາບ: ກອງຄຳ
